Guna nu noto ka kita
2
He anaku, epemo tesa-tesakubo toramo pepatudukiku ka iko.
2 Epe bo tanondoakamo pepatuduki noto dako nte Alatala,
bo pasimbukumo ala rasanimiu batuana.
3 Pasimbukumo ala matau mompekiri,
bo mpuu-mpuu merapi kanipi nu rara.
4 Elomo pura-pura haitu eva mangelo salaka
bara nompasimbuku manggava kakalumana anu natetabuniaka.
5 Ivesiamo iko mombapaha berimbana meose nte TUPU Alatala,
ala iko mpuu-mpuu mosisani nte Ia.
6 Apa aga TUPU anu nombadekei noto,
bo dako ri tesa-tesaNa manusia nanggava katau bo pompaha.
7 Ia nombadekei pompakule mombatimba parakara ka tona nanoa rarana
Ia eva kaliavo nombalenduti tona anu nagasa rarana.
8 Ia nombajagai tona nokainggu nanoa
bo nombalenduti todeaNa anu natutu neose nte Ia.
9 Anaku, ane iko matutu mangoseaka tesaku
musani berimbana mokainggu makana, mokainggu manoa bo iko ledo mompelenje,
bo musani berimbana dala nggatuvu mabelo.
10 Apa ane muoseaka tesaku haitu, noto dako nte Alatala mariamo riara ntaimu
bo masana raramu sabana pura-pura anu nisanimu.
11 Rasanimiumo mompekiri bo mombapaha mbana pokainggu nabelo.
Haitu mombajagai komiu [ala ledo mokainggu madaa].
12 Ane iko matau mompekiri, iko domo mangose dala nggatuvu anu ledo nabelo,
bo domo mantuntuni tesa-tesa ntopebagiu.
13 Tona nadaa domo nangose dala nggatuvu nanoa,
bo aga natuvu ri kalandana.
14 Nasana rarara nokainggu nadaa,
bo nadamba rarara nebagiu.
15 Ira ledo nokainggu nanoa
aga nasaro nombabagiu tona.
16 Anaku, [epemo tesaku,] ane maria noto dako nte Alatala riara ntaimu, ledo mamala iko rarasaki nu mombine nadaa
anu nipokonona nobualo, bo tesa-tesana namomi ledo mamala mombarasaki iko.
17 Ia nompalaisi bereina langgai
bo nombakalingasi pojanji poberei ri ngayo nu Alatala.
18 Ane iko hau ri banuana, nasimbayu mpo iko nangose dala kamatea,
dala niose ntona hau ri dunia ponturo malaeka ntomate.
19 Tona anu hau nte mombine haitu, katuvuana domo manjili batena,
bo domo manggava dala nggatuvua mabelo.
20 [Jadi anaku,] pasialamo pokainggu ntona nanoa,
bo oseakamo dala nggatuvu ntona nabelo.
21 Apa tona nanoa, haitumo tona anu nagasa rarana,
aga iramo maroo ri tana nipejanjika nu Alatala.
22 Tapi tona nadaa raropusi nu Alatala
bo tona ledo namala raparasaya rapopalaiNa dako ri ngata haitu.