Petevai i Salomo
AMSAL
Petevai-petevai noto dako nte i Salomo
Patuju petevai i Salomo
1
Hitumo petevai noto dako nte Alatala nipasiromu i Salomo magau Israel, ana i Daud.2 Patuju petevai hitu ala rasani ntona mompekiri manoto bo berimbana matuvu masiayu,
bo ala rapahana tesa-tesa noguna riara nggatuvuna.
3 Petevai-petevai hitu noguna mompatuduki tona matau mompekirika anu mabelo
bo matau mokainggu makana, manoa, bo ledo mompelenje.a
4 Petevai hitu mompakatada pekiri ntona anu dopa nisanina gaga dala nggatuvu,
bo ala rasanina pangisani dako nte Alatala bo maria katau nompekiri ka tona da nangura tuvuna.
5 Aginamo tona nanoto pompekirina mangepe bo mantambai anu nisanina,
aginamo tona nompaha rakeniaka petevai noto hitu.
6 Petevai hitu noguna ala rasanira batua nu petevai, porapa,
tesa-tesa bo jalili ntona nanoto.
7 Meose nte TUPU, haitumo puna pangisani
tapi tona nadoyo nompoara noto bo pepatuduki.
Petevai ka tona da nangura tuvuna
8 Anaku, oseakamo pepatuduki ntotuamu
bo nemo rasapuaka pangajarira
9 apa pepatudukira haitu,
nasimbayu mpo bunga nombarambaki balenggamu bo eva bili nompakagaya iko.
10 Anaku, ane tona nokainggu nadosa mombarasaki iko
nemo raoseaka ira.
11 Ane ira manguli, “Kamaimo kita mangelo tona bo rapatesita ia,
raelota tona ledo nasala bo raduu bobata ia.
12 Naupa tempo hitu ia da nabelo bo naroso,
sampesanika rapatesita bo ratanasita ia.
13 Raalasita mbara-mbarana anu noali,
bo mombaisi banuata ante mbara-mbara anu niagota.
14 Kamai tuntunimo kami,
aselena haitu ngena rabagita njimbayu.”
15 Anaku, ane ivehaitu tesa-tesa raulira ka iko,
nemo mosimporoa nte ira.
Tumo mosinggani nte ira mangoseaka pokainggura,
16 apa dota nu rarara aga mokainggu madaa
bo mepatesi.
17 Ane tonji mompeinta tona mombataa tolia ri ngayona
tantu ledo madota ia mangose tolia,
18 tapi tona nadaa gahaitu nompataa tolia aga mompakamate ira mboto
bo mompakarugi karora mboto.
19 Ivesia ngena majadi ri katuvu ntona anu nangelo kakalumana ante dala ledo nanoa
apa pura-pura pokainggura nadaa haitu rabayarira ante nyawara.
Nemo rapoara noto dako nte Alatala
20 Noto nirapaka tona notesa namangga ri dala jama,
nompopaepe suarana ri tana lapa ri kasiromu ntona nadea.
21 Ri bavo nu tembo ia notesa namangga,
ri vamba bobaa nu ngata ia nompopaepe tesa-tesana.
22 “He komiu anu dopa nangisani gaga dala nggatuvu!
Tumo rapokonomiu dala nggatuvu ivetutu!
Hee topesayu, tumo rapokonomiu pesayu!
Hee tona nadoyo, tumo rapoaramiu pangisani nabelo!
23 Epemo yaku mombatuenaka pokainggumiu.
Pura-pura isi mpekiriku kuuvaraka ka komiu
bo tesa-tesaku kuuli ka komiu.
24 Nirondekumo komiu tapi aga nipoaramiu,
bo ledo niparantaikamiu.
25 Pura-pura pepatudukiku ledo niparantaikamiu
bo pombatuenakaku pokainggumiu ledo niparasayamiu.
26-27 Jadi ane komiu rakava silaka anu mepakaeka
bara komiu rakava kandasa bo kasusa eva tambusisi rimboso nombabungusi komiu,
yaku mompongirika bo mompongeika komiu.
28 Tempo haitu komiu mompongare-ngare yaku,
tapi ledo kupesanaka komiu.
Komiu mpuu-mpuu mangelo yaku,
tapi ledo rakavamiu yaku.
29 Sabana ledo nipokonomiu nipatuduki,
bo ledo nadota neose nte TUPU,
30 bo ledo nadota nantarima pepatudukiku,
bo ledo nipokonomiu pombatuenakaku pokainggumiu.
31 Jadi komiu manggava asele pokainggumiu,
bo nia-niamiu nadaa.
32 Tona anu dopa nisanina gaga dala nggatuvu mamate sabana ledo nangoseaka yaku,
tona nadoyo maropu sabana ledo noparantaika yaku.
33 Tapi isema-sema nompetalingai yaku, ia matuvu matinonto,
bo ledo maeka rakava silaka.”