Peeva i Seba
20
Ri ngata Gilgal naria saito topegado nosanga i Seba. Ia ana i Bikri, dako ri valaa Benyamin. Tempo nakava i Daud bo todeana, i Seba notavusi tabue bo nanguli, “Kita ledo manggava bagia dako nte i Daud. Nakuya bo ratuntunikata ia? Hee toIsrael, mavolimo kita ri potendata mboto!” 2 ToIsrael nompalaika i Daud bo nantuntuni i Seba. Tapi toYehuda kana batena nosangganika i Daud bo nanggeni ia dako ri binangga Yordan sampe ri Yerusalem.3 Nakavapa i Daud ri banua kamagauana ri Yerusalem, sapulu berei piarana anu nibolina nombajaga banua kamagaua, nipoponturona ri banua nijaga ntantara. Ira ninapai i Daud pura, tapi ia domo ria naturu sanggani ante ira. Jadi ira nitaniaka bo katuvura natimbala sampe namate.
4 Magau nanguli ka i Amasa tadulako tantarana, “Pasiromumo toYehuda, bo eo katataluna kakavamo tumai mosanggani nte ira.” 5 Jadi haumo i Amasa mompasiromu ira, tapi ia ledo nanjili ri tempo nipakatantu nu magau ka ia. 6 Pade nangulimo magau ka i Abisai, “Nelabipa pompakasusa i Seba kita pade i Absalom. Jadi kenimo todeaku bo ragamo ia. Nee sampe ia hau metabuni ri ngata nobente, bo mamala malai.” 7 Tantara i Yoab bo tantara topojaga magaua bo pura-pura tantara ntanina nibalenggai i Abisai, neanggataka dako ri Yerusalem hau mombaraga i Seba. 8 Tempo ira nakava ri vatu mbaso ri ngata Gibeon, nakava i Amasa nosinggavaka ira. Tempo haitu i Yoab da nompake baju mposieva bo nantaka guma. Ivesia ia nolempa hau, valombo guma haitu nanavu bo gumana nategoli ri pale njidina. 9 I Yoab nangulika i Amasa, “Berimba kareba, sampesuvu?” Janggo i Amasa nitipalena ante pale nggana bo narapa ntoto liona ante lio i Amasa eva mosiekimo ira. 10 Ledo nipeinta i Amasa guma ri pale njidi i Yoab. Sampesanika guma haitu nitosukana tai i Amasa. Sampe isi rarana nauvaraka ri tana. Ia kaliu-liu namate, bo domo nitosu i Yoab hanupa.
Naupu sia i Yoab bo tueina i Abisai, napola nombaraga i Seba. 11 Saito tantara i Yoab neangga ri sinjori mboa i Amasa bo nanguli, “Isema mosabingga ka i Yoab bo i Daud, tuntunimo i Yoab!” 12 Mboa i Amasa nandiu raa nateduli ri tatanga nu dala. Pura-pura tona noliu ri sia netaa nompeinta mboa i Amasa. Jadi tantara i Yoab noumbusaka mboa haitu hau rantalua napara ri sia bo nitampunisira nte kae. 13 Nilelakapa mboa haitu dako ri dala, pura-pura topoliu nipapolaramo polipara nombatuntuni i Yoab nombaraga i Seba ana i Bikri.
14 Pura-pura ngata niponturo valaa ntoIsrael nipoliu i Seba, sampe nakava ri ngata Abel-Bet-Maakha. Pura-pura toBikri nasiromu bo nantuntuni ia. 15 Niepe ntodea i Yoab, i Seba naria ri sia, nipatikuramo ngata haitu. Ri savaliku nu tembo nitambunakara tana bo ri tambe tembo haitu nikaera mombaombosaka tembo haitu. 16 Ri ngata haitu naria saito mombine natau notimba parakara, ia neangga ri bavo nu tembo bo nanguli, “Epe! Epe! Ulikamo i Yoab tumai. Yaku madota motesa nte ia.” 17 Nakavapa i Yoab nekutanamo mombine haitu, “Pua, komiumo i Yoab?”
Nesana i Yoab, “Iyo.”
Nanguli vai mombine haitu, “Epemo tesaku hitu, pua.”
Nesana i Yoab, “Iyo, kutalingai.”
18 Nanguli mombine haitu, “Ruru biasana tona nanguli ivei, ‘Ane maria parakara, perapi panggava ri ngata Abel bo ri ngata Dan,’ bo parakara haitu rapakaupu ante mabelo. 19 Ngata kami Abel hitu nambaso, sangu ngata natinonto bo natutu neose ri tana Israel. Berimba bo ragerosimiu? Komiu madota mombagerosi tana nTUPU?”
20 Nesana i Yoab, “Ledo ntoto yaku mombagerosi ngatamu! 21 Ledo ivesia dota kami. Tapi naria tona nosanga i Seba ana i Bikri, dako ri bagia anu niponturo valaa ntoEfraim, nombaeva Magau Daud. Dekei ka kamimo ia, bo malaimo kami.”
Nanguli mombine haitu, “Balengga ntona haitu ranavusaka kami ka komiu dako ri tembo hitu.” 22 Bo haumo mombine haitu nanguli anu nipodota i Yoab ka toponturo ri ngata haitu. Naliu haitu tambolo i Seba nitampa bo balenggana ninavusaka ka i Yoab. Naupu sia nitavusi i Yoabmo tabue bo todeana nalaimo dako ri ngata haitu hau nanjili ri banuara mboto. I Yoab nanjili hau ri Yerusalem mosinggavaka magau.
Topokarajaa ka i Daud
23 Hitumo sanga ntona anu nianggataka i Daud: Tadulako ri njumangu Israel iamo i Yoab. Pakeni ntantara topojaga i Daudb, i Benaya ana i Yoyada. 24 Pakeni ntopokarajaa nipakasa: i Adoram. Topourusi doi kamagaua: i Yosafat ana i Ahilud. 25 Topotulisi ri kamagaua: I Seya. Pakeni ntopanggeni pesomba: i Zadok bo i Abyatar. 26 Pakeni ntopourusic ri banua kamagaua: i Ira dako ri ngata Yair.