Kabuku rara i Daud
19
Pade niuli ntona ka i Yoab, “Magau Daud nasusa rarana bo notumangi ka i Absalom”. 2 Padagi ri eo haitu, nabali najadi kabuku rara ka pura-pura tantara i Daud sabana niepera magau nantangisi anana. 3 Navoli nggalinomo ira hau riara ngata, eva tantara anu naeya matana sabana nalai dako ri posieva. 4 Magau nombatutui lenjena bo notumangi ante suara namangga, niulina, “O ranga anaku! Anaku i Absalom! O Absalom, anaku!”5 Jadi i Yoab hau nosinggavaka magau bo nanguli, “Pua, eo hitu komiu nompakaeya pura-pura todeamiu. Iramo anu nompakasalama nyawamiu, nyawa anamiu langgai, anamiu mombine, nyawa berei-bereimiu bo berei-berei piaramiu.” 6 Komiu nompotove tona nomporayu komiu, tapi komiu nomporayu tona anu nompotove komiu. Nipopakitamiumo ka pura-pura tantara, tadulako bo todea domo ntoto naria batuana ira ri matamiu. Hitupa nisanikumo, masana ntoto raramiu ane eo hitu, i Absalom da natuvu bo kami pura-pura mamate. 7 Sabana haitu, peanggamo, bo koimo pesuvu mompakasana rara ntodea. Ane komiu ledo mesuvu bo hau mosinggavaka ira, kuuli mpuu-mpuu ka komiu ri ngayo nTUPU, bongi hitu muni domo ria saitoa tona madota mosabinggaka komiu. Bo haitu majadi silaka mambasopa pade pura-pura silaka ntanina anu nombarumpa komiu dako ri kakodimiu sampe eo hitu.” 8 Pade neanggamo magau hau nesuvu, bo nonturo napara ri vamba bobaa ngata Mahanaim. Niepe ntodeana ia naria ri sia, bo nesuvumo ira hau nosinggavaka ia. Tapi toIsrael anu nidagi, nalai nanjili hau ri banuara mbotomo.
I Daud nanjili hau ri Yerusalem
Tempo haitu toIsrael anu nalai, da ranja hau nanjili ri banuara mbotomo.
9 Pura-pura tona lako ri valaa ngata ntoIsrael nosipobali nte roara mboto. Niulira, “Magau Daud nompakasalama kita dako nte toFilistin bo nombakabasaka kita dako nte balita ntanina, tapi hitupa ia nalaimo dako nte i Absalom bo nipalaikanamo ngata hitu. 10 I Absalom nianggatakata najadi magau, tapi ia namatemo riara mposieva. Nakuya ledoria saitoa tona nompasimbuku manggeni Magau Daud manjili?”
11 Tesa-tesa ntoIsrael haitu niepe i Daud muni. Sabana haitu nituduna i Zadok bo i Abyatar pakeni ntopanggeni pesomba mompekutana pakeni-pakeni ntoYehuda ivei, “Nakuya nonggai raramiu manggeni yaku manjili hau ri banua kamagaua? 12 Apa ledo sampesuvumiu yaku? Berimba bo nonggai raramiu merapi yaku manjili?” 13 I Daud muni nombatudu ira mangulika i Amasa ivei, “Apa ledo sampesuvuku komiu? Hitupa iko kuanggataka majadi pakeni ntantaraku manjambei i Yoab. Damo Alatala mompatesi yaku ane ledo kupovia!”
14 Ivesiamo i Daud namala nangala rara ntoYehuda sampe ira nombatevai magau manjili hau ri banua kamagaua mosanggani ante batua-batuana.
Magau meanggataka manjili-i Simei mombatomunaka magau
15 Pade neanggatakamo magau bo nakava ri binangga Yordan. Tempo haitu toYehuda nakavamo ri ngata Gilgal mombatomunaka magau bo manggeni ia mevote binangga haitu. 16-17 I Simei ana i Gera, toBenyamin dako ri Bahurim haitu nanggeni sanjobu (1000) tona dako ri valaa Benyamin bo nasalisa nakava nte toYehuda mombatomunaka magau. Ivesia muni i Ziba batua i Saul, bo sapulu alima anana langgai bo ropulu batuana. Dopame nakava magau, nivoteramo binangga Yordan. 18 Ira nombatulungi nombavotesaka magau njamboko ntaliana bo mombakarajaa bara nuapa ratudu nu magau.
Tempo magau da mevote, i Simei nantaputu ri ngayona bo nanguli, 19 “Pua, yaku merapi, nemo rapakasalamiu njuu yaku. Bo tumo ratoramiu salaku tempo komiu nalai dako ri Yerusalem. 20 Nanotomo raraku, bo yaku nadosamo. Sabana haitu, dako ri valaa-valaa ntoIsrael anu nonturo ri bagia tasina, yakumo nokolu nakava nombatomunaka komiu eo hitu.”
21 Nangepe haitu i Abisai ana Zeruya nanguli, “I Simei masipatomo rahuku mate sabana nipindasina magau nipelisi nTUPU.”
22 Tapi i Daud nangulika i Abisai bo tuakana i Yoab, “Nemo ragalomiu urusaku. Nakuya komiu mompakasusa yaku? Eo hitu yaku najadi magau vaimo ri Israel, bo ledo maria toIsrael mamala rahuku mate.” 23 Pade nojanjimo magau nte i Simei, “Iko ledo rahuku mate.”
I Mefiboset nombatomunaka magau
24 I Mefiboset tupu i Saul, nakava muni nombatomunaka magau. Kadana ledo nitoposina, janggona ledo nilompona, bo pakeana ledo nitoposina dakome magau nalai dako ri Yerusalem sampe ia nanjili nasalamaa. 25 Tempo i Mefiboset nakava dako Yerusalem mombatomunaka magau, nangulimo magau ka ia, “Mefiboset, nakuya ledo nituntunimu yaku tempo haitu?”
26 Nesana i Mefiboset, “Pua, nisanimiu yaku hii napunggu. Nituduku batuaku i Ziba mompasadia keledai kupesavi mombatomunaka komiu. Tapi yaku aga nibagiuna. 27 Nitunturakana yaku nte komiu. Niulina yaku ledo nadota hau.Tapi komiu eva malaeka nu Alatala anu nanoto pekirina. Jadi poviamo anu nirasaimiu mabelo. 28 Pua, nau pura-pura sampesuvu ntuamaku masipato rahuku mate, tapi yaku nidekeikamiu loga mangande ri banua kamagaua. Hitupa domo masipato yaku merapi nuapa-nuapa dako nte komiu.”
29 Nesana magau, “Tumo mutesa hanupa anu tutu. Nibotusikumo, kudekei pura-pura kakalumana i Saul ka iko bo i Ziba.”
30 Nesana i Mefiboset, “Dekeikamo raala i Ziba pura. Nasanamo raraku sabana komiu nanjili nasalama.”
I Barzilai netuntuni nanggeni magau
31 I Barzilai toGilead haitu notua dako ri ngata Rogelim ala momporoa magau mevote binangga Yordan. 32 I Barzilai natua mpuumo, umuruna valu pulu mpaemo. Ia nakalumana mpuu bo tempo magau nonturo ri ngata Mahanaim, i Barzilai nompasadia pangande ka magau. 33 Nangulimo magau ka ia, “Tuntunimo yaku hau ri Yerusalem, pura-pura anu muparaluu hamai damo kupasadia.”
34 Nesana i Barzilai, “Pua, domo masae yaku matuvu. Jadi nuapamo gunana yaku mombatuntuni komiu hau ri Yerusalem? 35 Umuruku valu pulu mpaemo, bo domo ria anu mamala mompakadamba yaku. Domo kurasai nuapa-nuapa kukande bo kuinu, bo topodade domo kuepe. Yaku aga mompakasesa komiu. 36 Domo masipato yaku mantarima tambo madea ivetutu. Yaku aga madota mosinggani nte komiu, nau aga bara sako lempa dako ri sambote binangga Yordan. 37 Maliu haitu, dekeimo yaku manjili hau ri banuaku bo ane yaku mamate, ratana ri sinjori dayo ntotuaku. Tapi siimo anaku i Kimham. Dekeimo ia mantuntuni komiu bo poviamo ka ia anu rarasaimiu mabelo.”
38 Nesana magau, “I Kimham kukeni bo kuurusi eva pomperapimu, bo pura-pura anu muperapi kana kudekei.” 39 Pade i Daud bo todeana nevote binangga Yordan. I Daud nombaeki i Barzilai bo nopalakana nte ia. Naliu haitu i Barzilai hau nanjili ri banuana mbotomo.
ToIsrael bo toYehuda nosinggarauka magau
40 Pura-pura toYehuda bo santanga toIsrael nantuntuni magau nombavote binangga. Naliu haitu magau napola hau ri ngata Gilgal, bo i Kimham nantuntuni ia. 41 Tapi nakava puramo toIsrael nosinggavaka magau bo nongalu, “Pua, nakuya sampesuvu kami toYehuda nompelea magau? Aga iramo nombatomunaka bo manggeni komiu njamboko ntaliana bo pura-pura todeamiu mevote binangga Yordan. Tantu nisarumakara iramo masipatopa pade kami!”
42 Nesana toYehuda, “Natantumo, sabana magau sampesuvu kami. Nakuya komiu bo narau? Apa pangande kami nitanggu magau, bara kami nidekeikana hadia?”
43 Nesana toIsrael, “Nadeapa kami toIsrael pade komiu, kami sapulu valaa. Komiu toYehuda aga randua valaa, masipatopa kami pade komiu, naupa magau sampesuvumiu! Nakuya natio matamiu nanggita kami? Bo kamimo pamulana nerapi magau manjili mpanjili.”
Tapi toYehuda nakaapa pade toIsrael bo ledo nadota radagi.