I Daud nosintomu nte i Ziba
16
Notuapa i Daud dako ri buntina, sampesanika nakavamo i Ziba batua i Mefibosetb, nosintomu ka ia bo nanggeni sapasa keledai nangulaya roti roatu (200) anguna, vua anggur ngau saatu (100) ntikoena, vua-vua ntanina saatu (100) mpounaa bo uve anggur sangu kanto kuli. 2 Nekutana i Daud, “Rapokuya pura anu hitu?”Nesana i Ziba, “Keledai-keledai hitu rapake magau njamboko ntaliana, roti bo vua-vua hitu ka komiu bo todeamiu, bo uve anggur hitu ka isema anu maleo ri karava bai ngena.”
3 Nekutana vai i Daud, “Ri umba i Mefiboset tupu nu madikamu i Saul?”
Nesana i Ziba, “Ia da batena ri Yerusalem, sabana niparasayana eo hitu rapopanjili ntoIsrael kamagaua ntupuna i Saul ka ia.”
4 Pade nanguli magau ka i Ziba, “Mompamula hitu-hitu pura-pura anu i Mefiboset ikomo tupuna.”
Nesana i Ziba, “Tarima kasi, pua. Kambou batena masana raramiu nte yaku!”
I Daud bo i Simei
5 Nakavapa i Daud ri ngata Bahurim, nakavamo saito tona dako rahaitu, bo nombakaparai ira. Ia nombapindasi i Daud. Sanga ntona haitu i Simei ana i Gera, sampesuvu i Saul. 6 I Daud nte tomaogena nirempe i Simei ante vatu, naupa i Daud niparitatanga tadulako ante tantara-tantarana. 7 I Simei nombapindasi ia bo nanguli, “Koimo! Koimo! Topepatesi! Tona daa! 8 Iko nangagosi kamagaua i Saul! Hitupa iko rahuku nTUPU sabana nadea sampesuvu i Saul nipatesimu. Kamagauamu radekei nTUPU ka anamu i Absalom. He topepatesi, hitupa mandasamo iko!”
9 I Abisai tuei i Yoab ana i Zeruya, nanguli ka magau, “Pua, nakuya komiu nompalamba tona ledo noguna nopindasi komiu? Dekeimo yaku motampa tambolona!”
10 Tapi magau nangulika i Abisai bo i Yoab tuakana, “Dekeikamo rapindasina yaku. Palambakamo ia. Apa ane TUPU nombatudu ia, isema mamala mombatagi ia?” 11 Nanguli vai i Daud ka i Abisai bo ka pura-pura batuana, “Anaku mboto nompasimbuku mompatesi yaku; nakuya komiu nokumaa nanggita panggavia ntoBenyamin haitu? TUPU nombatudu ia nombapindasi yaku; sabana haitu nemo rakuya-kuya ia bo dekeikamo ia mepindasi. 12 Bara rapariara nTUPU kasusa hitu bo mombadekei belo ka yaku raposambei pepindasi haitu.” 13 I Daud nte todeana nompapola polipara. I Simei nantuntuni ira njuu nolipa ri pipi nu bulu nepindasi bo nerempe nte vatu bo tana. 14 Magau nte todeana mpuu-mpuu nalengemo tempo ira nakava ri binangga Yordan, bo nangosanakamo ira ri sia.
I Husai bo i Ahitofel nosinggavaka i Absalom
15 Tempo haitu i Absalom bo todea toIsrael anu nosabinggaka ia nesua ri ngata Yerusalem, bo i Ahitofel netuntuni muni. 16 Tempo i Husai anu mpuu-mpuu niparasaya i Daud, nosintomu nte i Absalom, niulina, “Mandoe umuru magau! Mandoe umuru magau!”
17 Tapi nekutana i Absalom, “Umbamo karoso posimporoa ntumaku i Daud nte komiu? Nakuya ledo nituntunimu ia?”
18 Nesana i Husai, “Ledo! Tapi yaku mosabingga ka tona nipelisi nTUPU, tona anu nianggataka ntodea ntoIsrael. Iamo kutuntuni. 19 Bo muni, isemapa vai kutande? Apa ledo ana i Daud? Yaku nombatande tuamamiu baipia, ivesia muni kutande komiu, pua.”
20 Jadi nanguli i Absalom ka i Ahitofel, “Ulimo nuapa rapoviata.”
21 Nesana i Ahitofel, “Koi totoakamo berei-berei piara ntomamu anu nipalaikana, anu nituduna mbajagai banua kamagaua. Peroukamo ira. Poviamo ivesia ala rasani ri njumangu Israel, iko rapovuu mata ntomamu sabana poviamu haitu. Bo pura-pura tona nosabingga ka iko mantambai mabia.” 22 Jadi, i Absalom nipoviaka tenda ri bavo nu ata ri banua kamagaua haitu. Nesua ia riara ntenda haitu bo nosampaturu nte berei-berei ntomana. Pura-pura tona nanggita anu nipoviana haitu.
23 Tempo haitu pura-pura pepatotosi i Ahitofel nitarima bo nirekera mpo tesa Alatala mboto. Jadi nau i Daud, bara i Absalom, nituntunira pepatotosina.