I Absalom nonia meeva
15
Bara sakuya kasaena naliu haitu i Absalom nompasadia ka ia mboto sangu doka posieva bo jara ante alima pulu topojaga nangova ri koluna.a 2 Eo-eo i Absalom nembangu mpadondona ntoto bo neangga ri bivi dala napara bobaa ngata Yerusalem. Nipokiona tona noliu hau mangadu parakarara nte magau bo niulina ivei: “Dako ri umba iko?” Bo ane tona haitu mesana, “Yaku dako ri valaa Israel, ri bagia ngata hamai,” 3 i Absalom manguli ka ia, “Nangoseaka huku, iko nakana, tapi ledoria saitoa wakele magau mangepe pangadumu.” 4 Nanguli vai i Absalom, “Pesoba ane yaku raanggataka majadi topotangara ri ngata hitu! Pura-pura tona naria posisalara bara posinggaraura mamala makava nte yaku, bo yaku manoa mombatangara ira.” 5 Ane naria tona nanggaparai bo nantaputu mombasomba ia, i Absalom nanguluraka palena ka tona haitu pade nikapuina bo niekina. 6 Ivesiamo akala nipovia i Absalom ka toIsrael anu hau nangadu posisalara ka magau. Ante akalana ivehaitu, i Absalom namalamo nangala rara ntoIsrael.7 Pata mpae naliu haitu, nangulimo i Absalom ka Magau Daud, “Tata, dekeimo yaku hau ri ngata Hebron mompakadupa janjiku ka TUPU. 8 Apa tempo yaku da nonturo ri Gesur ngata ntoSiria ruru, yaku nojanji ane radekei nTUPU loga ka yaku manjili ri Yerusalem, yaku hau mombasomba Ia ri ngata Hebron.”
9 Nangulimo magau, “Koimo. Pakabelo-belo ri dala.” Pade nanggalivomo i Absalom hau ri ngata Hebron. 10 Tapi dopame haitu, nituduna nggalino mamimo suro-suro hau ri njumangu ngata ntoIsrael manggeni tevai ivei, “Ane raepemiumo oni ntabue ratavusi, pongaremo ivei: ‘I Absalom najadi magaumo ri ngata Hebron!’ ” 11 Roatu (200) tona dako ri Yerusalem nantuntuni i Absalom hau ri ngata Hebron. Ledo nisanira anu majadi bo ledo nonggai-nggai rarara. 12 I Absalom da ranja nompesombaka pesomba, nituduna muni suro hau ri ngata Gilo mompokio i Ahitofel, iamo tona nasaro nipomperapi i Daud panggava. Ivesiamo nia i Absalom mangeva magau nantambai karosona bo nantambai munimo kadea ntona nantuntuni ia.
I Daud nalai dako ri Yerusalem
13 Naliu haitu saito tona nanggeni kareba nanguli ka i Daud, “ToIsrael nosabingga ka i Absalommo.”
14 Nangulimo i Daud ka tomaogena ri Yerusalem, “Kamaimo kita malai. Hitu dala sangu-sanguna raoseta ala kita ledo mamala rakuya-kuya i Absalom. Panggalivomo, makavamo ia! Masalisa, nemo sampe kita raraga bo radagina, bo pura-pura toponturo rangata rapatesi!”
15 Nesanamo ira, “Damo dotamiu, pua. Kami masadia movia nuapa-nuapa nipodotamiu.” 16 Jadi nanggalivomo magau sambanua nituntuni pura-pura tomaogena bo topokarajaa ri banua kamagaua, nibolina aga sapulu mombine berei piarana mombajagai banua kamagaua.
17 Tempo magau bo pura-pura tona anu nantuntuni ia da ranja mpolipa nompalaisi ngata, ira netaa napara banua kaupuna ri ngata Yerusalem. 18 Tomaoge, bo tantara anu nombajagai magau nobaresi bo nolipa nombaliunaka ia. Bo muni ono-atu (600) tantara nombatuntuni ia dako ri ngata Gatb, nobaresi nolipa nombaliunaka ia. 19 Nompeinta haitu, nangulimo magau ka i Itai topanggeni ono-atu (600) tantara haitu, “Nakuya tano nituntunimu ka kami? Mabelopa iko manjili hau ri Yerusalem bo monturo hamai mosanggani nte magau baru. Apa ledo tano iko tosangatana anu nalai dako ri ngatamu mboto? 20 Iko dopa nasae nonturo ri sii, berimbana bo kuulika iko malai singgani nte yaku? Yaku mboto ledo nisaniku hau ri umba kukalau. Panjilimo bo keni munimo roa-roamu sangata. Damo TUPU mompotove bo mojagai komiu.”
21 Tapi nesana i Itai, “Yaku nojanji nte TUPU anu Natuvu sampe ri kasae-seana bo nte komiu, pua: nau damo hau riumba rakalaumiu, kana kutuntuni komiu, nau mate kutingayo mombajagai komiu.”
22 Nesana i Daud, “Ane ivesia tano, kapolamo!” Bo napolamo i Itai nolipa nosanggani-nggani ante pura-pura tantarana, bereira bo ana-anara. 23 Tempo tantara-tantara i Daud nolipa nompalaisi ngata, pura-pura todea namangga notumangi. Bo nevotemo magau ri binangga Kidron nituntuni pura-pura tantarana nolipa hau ri karava bai.
24 I Zadok bo i Abyatar pakeni ntopanggeni pesomba, naria muni ri sia nosanggani nte pura-pura toLewi anu nanggeni Peti Pojanji nu Alatala. Peti Pojanji haitu nituura, bo ledo raanggataka dopame pura-pura todea mompalaisi ngata haitu. 25 Nangulimo magau ka i Zadok, “Keni mpanjilimo Peti Pojanji tutu hau ri ngata. Ane da maria asi mata nTUPU manggita yaku, natantumo da radekeiNapa loga ka yaku manjili mompeinta Peti Pojanji tutu ante banua pombolina. 26 Tapi ane domo ria asi mata nTUPU manggita yaku, damo TUPU tongana, bara nuapa rapoviaNa ka yaku.” 27 Nanguli vai magau ka i Zadok, “Ivei niaku: panjilimo komiu bo i Abyatar hau ri ngata Yerusalem ante mabelo. Keni munimo anamu i Ahimaas, bo i Yonatan ana i Abyatar. Pomata nuapa majadi hamai. 28 Kupopea ira ri binangga ri pevotena hau ri karava bai sampe mantarima kareba rakenira.” 29 Jadi haumo i Zadok bo i Abyatar nanggeni mpanjili Peti Pojanji hau ri Yerusalem bo naboli hamaimo ira.
30 Naupu haitu i Daud bo pura-pura tona nombatuntuni ia notumangi sabingga nantende ri Bulu Zaitun. Nibonggora balenggara bo i Daud novonju sandalena, tanda nggasusa rarara. 31 Niulikara ka i Daud, i Ahitofel topodekei panggava ka ia baipia, hitupa nantuntuni i Absalom. Jadi i Daud nerapi doa ivei: “O, PUE, kambou ratenggoakaMiu pepatotosi i Ahitofel!”
32 Tempo i Daud masavimo ri bavo nu bulu nakava ri posomba ntona TUPU, ia nitomunaka i Husai toArki, vega rapa i Daud. Pakea i Husai nabite bo balenggana nidikana avu tanda nggasusa rara. 33 Nangulimo i Daud ka ia, “Ane iko metuntuni, aga mompakandasa yaku. 34 Tapi ane iko manjili hau ri ngata, iko mamala mombatulungi yaku. Ulika i Absalom, hitupa iko matutu mantulungi ia, eva iko nombatulungi tuamana ruru. Ivesiamo iko mamala mompalevasi pepatotosi i Ahitofel. 35 Bo muni i Zadok bo i Abyatar naria hamai. Ulimo ka ira pura-pura bara nuapa muepe riara banua kamagaua. 36 I Ahimaas ana i Zadok bo i Yonatan ana i Abyatar nantuntuni tuamara, jadi hamai muni ira. Kabilasa gahaitumo mai mutudu makava nte yaku manguli kareba muepe.”
37 Jadi navolimo i Husai vega i Daud haitu hau ri Yerusalem. Eva nisuka, i Absalom nesua hau riara ngata muni.