I Amnon bo i Tamar
13
I Absalom ana langgai i Daud notuei saito mombine nagaya nosanga i Tamar. I Amnon, ana langgai i Daud muni tapi ntanina tinana. I Amnon nompokono i Tamar 2 bo madota momperouka ia. Tapi ledo mamala, apa i Tamar da narandaa bo niporoa ntona njuu ala ledo mamala moroa ante langgai. Nipekirika i Amnon njuu anu haitu sampe najadi duana.3 Naria saito sampesuvu sanggani i Amnon anu natau noakala, sangana i Yonadab ana i Simea tuaka i Daud. 4 Nangulimo i Yonadab ka i Amnon, “Hee ana magau, eo-eo nikitaku nasusa njuu raramu. Nakuya tano?”
Nesanamo i Amnon, “Nipokonoku i Tamar, tuei i Absalom sampesuvuku.”
5 Nanguli i Yonadab ka ia, “Ledo nakaja tu! Paturumo iko ri paturumu bo petiduamo. Ane makava tuamamu mompeinta iko, ulimo ka ia, ‘Tata, dekeimo i Tamar tumai manggeni pangande ka yaku. Ane kukita ia mompakangongo pangande haitu ri sii, mamala yaku mangande.” 6 Jadi naturumo i Amnon ri paturuna mpo tona nadua mpuu.
Tempo Magau Daud nakava nompeintana, nangulimo i Amnon ka ia, “Tata, dekeimo tueiku i Tamar tumai movia nte roangu roti ri ngayoku bo ralinjona ka yaku.”
7 Pade nipakatu i Daudmo tevai ka i Tamar ri banua kamagaua ivei, “Koimo ri banua ntuakamu i Amnon, bo poviamo pangande ka ia.”
8 Haumo i Tamar ri banua ntuakana i Amnon. Nikavana i Amnon naturu ri paturuna. Naliu haitu, niala i Tamar sakide gando bo nipovianamo roti ri mata i Amnon. Nitununa roti haitu sampe nangongo. 9 Naupu haitu nisore i Tamarmo potunu roti, bo nialana roti dako riara potunu haitu radekeina ka i Amnon. Tapi ledo nadota i Amnon nangandena. Niulina, “Pesuvu pura komiu dako ri sii!” 10 Nesuvupa pura tona dako rantombi haitu, nangulimo Amnon ka i Tamar, “Keni tumai ri paturuku roti-roti tutu, bo linjo ka yaku.” I Tamar nangala roti haitu bo nikenina ka tuakana i Amnon riara ntombi. 11 Tempo i Tamar nombaduduaka palena molinjo roti hau ri sumbana, i Amnon nombasaka mombine haitu bo nanguli, “Tamar, kamaimo maturu singgani nte yaku!”
12 Nesanamo i Tamar ka tuakana, “Ah, nemo! Nemo rapakasa yaku movia anu ledo nabelo tutu! Ledo naria sanggania anu vehitu nipovia ri Israel. 13 Ane majadi ngena vehitu, aga hau ri umba kupantabuniaka eya mataku? Bo muni iko mompakaeya matamu mboto ri mata ntoIsrael ri sii ngena. Aginapa mutesaka magau. Ledo ratagi nu magau iko mompoberei yaku.” 14 Tapi ledo niepe i Amnon jarita ntueina, bo nipogaunamo tueina sabana narosopa ia pade tueina.
15 Tapi naliu haitu navuumo mata i Amnon nanggita i Tamar. Nambasopa vuu matana pade pompokonona tueina dopame nipogauna, bo niulikana tueina, “Pesuvu haumo iko!”
16 Nesanamo i Tamar ka tuakana, “Ah nemo vesia, apa nambasopa salamu ngena nepopalai pade anu nipoviamu ante yaku pangane!”
Tapi ledo nadota i Amnon nangepe jarita ntueina. 17 Nirondena tona nipotuduana bo niulikana, “Keni mpesuvumo mombine hitu bo kuncisimo vamba.” 18 Tona nipotudua haitu nangoseaka parentana.
I Tamar nobaju ndoe bo nandate pale sabana ivesia mami baju ana mombine nu magau anu dopa noberei tempo haitu. 19 Pade nalaimo i Tamar. Nidikana avu ri balenggana, nibitesina baju ndoena bo nitutuina lenjena ante palena, tanda nggabuku rarana bo namangga notumangi. 20 Tempo i Absalom, tuaka i Tamar nanggita ia, nipekutananamo, “Nakuya iko? Nipogau i Amnon iko pangane? Tamar, tumo motumangi, tumo mumpekirika njuu. Nee muuli ka isema-sema anu hitu. Ia tuakamu.” Jadi i Tamar nonturo saitona ante buku nu rarana ri banua ntuakana i Absalom.
21 Narau mpuu rara Magau Daud nangepe kareba haitu. 22 I Absalom nompovuu mata i Amnon, bo domo nosituenaka ira, sabana i Amnon nompogau tueina i Tamar.
I Amnon nipatesi, i Absalom nalai
23 Rompae kaliuna haitu, i Absalom novia posusa pogunji bulu nu bimba ri ngata Baal-Hazor, napara ngata Efraim bo nigagana pura ana langgai magau. 24 Hau ia mantingayo Magau Daud bo niulina, “Tata, yaku movia posusa pogunji bulu bimba. Kuperapi komiu ante tomaoge riara banua kamagaua makava ri posusa haitu.”
25 Tapi nesana magau, “Neemo, anaku. Sabana ane makava pura kami aga mompakasusa iko.” I Absalom nepasimbuku njuu, tapi tuamana ledo nadota hau ri posusa. Ia aga nerapi doa ka i Absalom.
26 Nanguli vai i Absalom, “Ane vesia, dekeimo sampesuvuku i Amnon hau mosanggani ante kami.”
Nanguli magau, “Ledo kudekei ia mantuntuni posusa.”
27 Tapi kana nipasimbuku i Absalom njuu. Kaupuna nidekei i Daudmo i Amnon bo ana-ana langgaina ntanina hau ri posusa i Absalom.
[Jadi nipasadia i Absalom puramo pangande rasa.]a 28 Niulikana batua-batuana, “Pariara pakabelo-belo. Ane malimpunomo i Amnon manginu anggur, kudekei tanda, pade patesimo ia. Nemo maeka. Yaku pura manjibuaka panggaviamiu tutu. Pokainggumo mpo tomalanggai bo nee maeka-eka!” 29 Batuana gahaitu nangoseaka parenta i Absalom, bo nipatesira i Amnon. Nompeinta anu najadi haitu, ana-ana langgai i Daud ntanina nalaimo bo nesavi keledai.
30 Tempo ana-ana nu magau da ri dala hau manjili, niuli ntonamo kareba ka i Daud, “I Absalom nompatesi pura-pura ana langgai nu magau. Domo naria saitoa natuvu!”
31 Neangga magau. Nibitesinamo bajuna, tandana nabuku rarana bo nekadungga ri tana. Pura-pura tomaogena nobitesi bajura muni. 32 Tapi i Yonadab ana i Simea tuaka i Daud nanguli, “Nemo maeka, pua. Ledo namate pura anamiu langgai. Aga i Amnon namate, anu nasaemo nipodua rara i Absalom sabana nompogau tueina i Tamar. 33 Neemo raparasaya namate puramo anamiu langgai. Aga i Amnon saitona namate.”
34 Tempo haitu i Absalom nalaimo. Topojaga ri kamagaua i Daud nompeinta nadea tona notua dako ri bulu bagia Horonaim. 35 Pade haumo i Yonadab nte magau bo nanguli, “Tutumo ana-anamiu langgai, pua! Nakana eva niuliku pangane.” 36 Dako naupu ntoto ia notesa, nakava puramo ana-ana langgai i Daud. I Daud ante tomaogena bo ana-ana langgaina notumangi puramo sabana nabuku rarara.
37-38 I Absalom nalai hau nte [tupuna] magau Gesur, nosanga i Talmaib ana i Amihur. Talu mpae kasaena ia nonturo hamai. Nasae mpuu i Daud nombatangisi kamate i Amnon 39 tapi nasae-sae domopa nipekirikana gaga i Amnon, nalentoramo rarana ante i Absalom.