I Nabi Natan nompopatora i Daud, bo nanjosomo rara i Daud
12
Naliu haitu TUPU nantudu i Nabi Natan mosinggavaka i Daud. Haumo Nabi Natan nte ia bo nanguli, “Naria randua tona nonturo riara sangu ngata; saito nakalumana bo saito napakasi. 2 Nadea mpuu bimba, tovau bo japi nipatuvu ntona nakalumana haitu, 3 tapi tona napakasi aga nompatuvu sambaa ana bimba besina anu nialina. Bimba haitu nipatuvuna sampe najadi nambaso riara banuana nosanggani-nggani ante ana-anana. Ana bimba haitu nipakande kandea nikandena mboto, nipainuna dako ri bodana muni, nipopaturuna ri timpuna bo nipotovena mpo anana mboto. 4 Naria saeo tona nakalumana nikakava toratana. Tona nakalumana haitu natove ntoto rarana mombasambale bimba bara japina mboto raporiapu ka toratana haitu, tapi ia aga hau nangala ana bimba tona napakasi haitu pade niporiapuna ka toratana.”5-6 Nangepe tesa haitu narau mpuu rara i Daud nte panggavia ntona nakalumana pangane bo nangulimo ia, “Nasodo mpuu tosugi haitu! Yaku nosumpa ante sanga nTUPU anu Natuvu sampe ri kasae-seana, tona haitu kana mombasambei ana bimba pangane patanggani kadeana bo ia kana rahuku mate!”
7 Nangulimo i Natan ka i Daud, “Pua, komiumo tu nirapaka tosugi haitu! Bo hitumo anu niuli nTUPU, Alatala nisomba ntoIsrael, ivei: ‘Nianggatakakumo iko najadi magau ntoIsrael bo nipakasalamaKumo iko dako nte i Saul. 8 Kamagaua i Saul bo berei-bereina nidekeiKumo ka iko, bo nianggatakaKu iko najadi magau ntoIsrael bo ntoYehuda. Ane dopa magana, da Kudekeipa vai tambaina ka iko. 9 Nakuya ledo niturusimu parenta-parentaKu? Nakuya nipoviamu inggu nadaa ivehaitu? Iko nomparenta i Uria rapatesi riara mposieva. Nipalambamu ia nipatesi ntoAmon, bo nialasimu bereina! 10 Nipandaentemu Yaku, nialasimu berei i Uria. Jadi muli nu mulimu kana maria mamate rapatesi. 11 Kupambela kasusa ka iko dako ri mulimu mboto. Kualasi berei-bereimu ri mata-matamu bo Kudekei ka tona ntanina mosampaturu nte ira ri ngayo ntodea. 12 Nipoviamu nggalino dosa haitu, tapi pehukuKu Kupambela ka iko ri ngayo ntoIsrael.’ ”
13 Pade nangulimo i Daud ka i Natan, “Nadosamo yaku nte TUPU.”
Nesana i Natan, “Niampungi nTUPUmo dosamiu, pua. Jadi ledo mamate komiu. 14 Tapi nipakaeyamiumo TUPU ante pokainggumiu haitu. Jadi anamiu anu dako nipoanaka haitu mamate.” 15 Naupu haitu nanjilimo i Natan hau ri banuana.
Ana langgai i Daud anu dako nipoanaka namate
Ana langgai i Daud anu nipoanaka i Batsyeba timbala i Uria, nadua sabana dota nTUPU. 16 Nosambayamo i Daud nerapi nte Alatala ala mabelomo ngana haitu. I Daud ledo nangande bo bongi-bongi ia naturu ri jaula. 17 Tomaoge riara banua kamagaua nakava mombatinarasi ia ala madota ia membangu, tapi ledo nadota ia bo ledo muni nadota nangande nosinggani-nggani nte ira. 18 Kapapitu eona nadua, namatemo ngana haitu bo topokarajaa ri kamagaua i Daud naeka mompopaisani ka ia. Niulira, “Da natuvu ngana haitu, ledo niepe magau ane kita notesa nte ia. Nemopa hitu, anana namatemo! Nee-nee ia mombaduasi karona mboto!”
19 Nipeinta i Daud batuana nanggalivaya, nisaninamo ngana haitu namatemo. Nekutanamo ia, “Namatemo tano ngana haitu?”
Nesana ira, “Iyo, pua. Namatemo.”
20 Pade nembangumo i Daud dako ri jaula, hau nandiu, nosambei bajuna bo nosalaga buluana. Bo haumo ia ri banua nTUPU mosambaya. Naupu haitu nanjilimo ia hau ri banua kamagaua. Nerapimo ia rapasadiaka kandea rakandena, pade nangandemo. 21 Nanggita haitu, nangulimo batua-batuana ka ia, “Pua, nuapa batuana anu nipoviamiu ivehitu? Da natuvu ngana haitu, komiu nantangisi ia bo ledo nadota nangande, tapi namatepa ia, komiu nembangumo bo nangandemo!”
22 Nesana i Daud, “Iyo, nakana yaku nantangisi bo ledo nangande da natuvu ngana haitu sabana nipekiriku, bara maasi mata nTUPU manggita yaku bo ngana haitu kana matuvu. 23 Tapi hitupa namatemo ia. Nuapa gunana yaku ledo mangande? Mamala kupatuvu mpanjili ia? Maria tempona ngena yaku hau mantuntuni ia, tapi ia domo manjili nte yaku.”
24 Naliu haitu i Daud nompakasana rara i Batsyeba bereina, pade nosimperoumo ira. I Batsyeba nompoanaka saito ngana langgai vai bo nipoposanga i Daud ngana haitu i Salomo. TUPU nompotove ngana haitu, 25 bo nantudu Nabi Natan mompoposanga ngana haitu i Yedijaa, sabana ngana haitu nipotove nTUPU.
I Daud nombaago ngata Raba
26 Tempo haitu i Yoab da nosieva njuu nte ngata Raba, ngata mbaso toAmon, bo sakidepa mamalamo raagosira. 27 Pade nipakatuna vai suro hau nte i Daud bo niulina ivei, “Nisuukumo ngata Raba bo namalamo niagosiku ngata pangalara uve. 28 Sabana haitu, pua, pasiromu labi nu tantarata bo keniakamo ira mombasuu bo mangagosi ngata haitu. Nee-nee rauli ntona ngena aga yaku nangago ngata haitu.” 29 Pade nipasiromu i Daud puramo tantarana hau mosieva nte ngata Raba. Nisuuna bo nidagina ngata haitu. 30 I Daud nangalasi songgo magau dako ri balengga magaura bo nidikana ri balenggana mboto. Songgo kamagaua haitu nitasere talupulu alima kilo ntamona bo nirambaki ante vatu mpoali anu nenggila. Nadea mbara-mbara nikenira anu niagora dako ri ngata haitu. 31 Bo muni, tonana nisuvurakara dako rangata bo nipopokarajaa ntamo ante garagaji, pomanggi, baliu, bo ira muni nipopokarajaa ri potepe tana. Ivesia muni nipoviara ka tona ri pura-pura ngata ntoAmon ntanina. Naliu haitu, i Daud ante tantara-tantarana nanjili hau ri Yerusalem.