I Daud bo i Batsyeba
11
Ri tempo mpae baru bo tempo nggapane eo, biasana magau-magau hau mosieva. Ri mpae baru haitu i Daud nantudu i Yoab manggeni tantara ntoIsrael hau mosieva. Niropusira toAmon bo nipatikura ngata Rabaa. Tapi i Daud naboli ri Yerusalem.2 Naria sanggovia, tempo i Daud nembangu dako ri paturuna, nolipa-lipamo ia ri bavo ata banua kamagaua nalumbu. Nikanotona saito mombine nagaya mpuu da ranja mpandiu. 3 Pade nituduna tona mompekutana isema mombine haitu. Niulinamo ka i Daud, mombine haitu nosanga i Batsyeba. Tuama i Batsyeba nosanga i Eliam bo bereina langgai nosanga i Uria toHet. 4 Naliu haitu nitudu i Daudmo tona hau mangala mombine haitu. Nakavapa i Batsyeba, niperouka i Daudmo. I Batsyeba dako naupu nompegasa karona, apa tempo haitu ia dako naupu ntoto nanggava bulana. Naupu sia nanjilimo i Batsyeba hau ri banuana. 5 Bara sakuya kasaena naliu haitu, i Batsyeba nompakatu karebamo ka i Daud, nangidamo ia.
6 I Daud nasalisa nompakatu parenta ka i Yoab, niulina ivei: “Tudu masalisa i Uria toHet makava nte yaku.” Bo nitudu i Yoabmo i Uria hau mosinggavaka i Daud. 7 Nosinggavapa i Uria bo i Daud, magau nompekutana kareba i Yoab bo tantara ntoIsrael riara mposieva hamai. 8 Naupu haitu nangulimo i Daud ka i Uria, “Kavoli hau ri banuamumo ruru iko bo pangosanakamo sampalai.” Nalaipa i Uria dako ri banua kamagaua, nipakatu i Daudmo pedekei hau ri banua i Uria. 9 Tapi i Uria ledo nanjili hau ri banuana, ia aga naturu ri vamba bobaa banua kamagaua nosanggani-nggani ante topojagai magau.
10 Niulikaramo i Daud ivei: “I Uria ledo nanjili hau ri banuana.”
Pade nangulimo i Daud ka i Uria: “Iko nanjili dako ri polipa nggavao, nakuya ledo nanjili hau ri banuamu?”
11 Nesana i Uria, “Tantara ntoIsrael bo toYehuda santanga matemo riara mposieva bo Peti Pojanji nTUPU hamai nte ira. I Yoab pakeni kami bo tantara aga notenda ri karava. Yaku hii aga batua. Ledo masipato yaku manjili hau ri banua aga mangande, manginu bo maturu nte bereiku. Yaku mpuu-mpuu nosumpa, ledo kupovia anu ivehaitu.”
12 Nangulimo i Daud, “Domo ya, pangosanaka ri siimo eo hitu bo maile pade kudekei iko hau manjili ri posieva.” Jadi naturumo i Uria ri Yerusalem bongi haitu. Kamailena, 13 i Daud nombaronde i Uria mangande bo manginu, pade nilimpunosina. Tapi bongi haitu i Uria ledo muni nanjili hau ri banuana, ia aga naturu ri tombi pojaga banua kamagaua.
14 Kamaile mpadondona i Daud notulisi bo nompakatu sura nikeni i Uria mboto ka i Yoab. 15 Nitulisina riara sura ivei: “Tudumo i Uria hau ri ngayona ntoto riara mposieva ntamo, pade pouramo komiu dako nte ia, ala ia rapatesi nu tantara balita.” 16 Tempo i Yoab nompatiku ngata Raba, i Uria nituduna hau ri bagia anu nisanina naria bali naroso nojaga ri sia. 17 Tempo tantara ngata haitu nesuvu nosisuu ante tantara i Yoab, bara sakondua tantara i Daud namate bo i Uria namate munimo riara mposieva haitu.
18 Nitudu i Yoabmo suro hau mosinggavaka i Daud manguli kareba posieva haitu. 19 Suro haitu niparenta i Yoab ivei: “Raepepa Magau Daud ngena kareba posieva hitu, 20 ane bara marau ia bo mekutana nte iko, ‘Nakuya komiu napara ntoto nte ngata haitu? Ledo nisanimiu nu balimiu mepana dako ri bavo nu tembo? 21 Nalingamo tano raramiu berimbana kamate i Abimelekh ana i Gideon ri Tebes? Ia namate niparunju mombine ante vatu pogili gando dako ri bavo nu tembo. Nakuya nikaparaikamiu tembo haitu?’ Ane mekutana ivesia magau, ulikamo, ‘I Uria batuamiu namatemo!’ ”
22 Haumo nu suro haitu mosinggava ka i Daud bo nanguli pura anu niparenta i Yoab ka ia. 23 Suro haitu nanguli, “Bali kami naroso mpuu, ira nesuvu dako rangata mombasuu kami ranggarava. Tapi namala kami nombaeva ira sampe ri vamba pesua rangata. 24 Bo dako ri bavo nu tembo ira nombapana kami, bo bara sakondua tantara nu magau ante i Uria namatemo.”
25 Nanguli i Daud ka suro haitu, “Pakarosomo rara i Yoab bo ulikamo ia, nee manjoso rarana, sabana ledo mamala ratasere isema ngena mamate riara mposieva. Ulikamo ia tambaipa karosona mombasuu ngata haitu, sampe ngata haitu radagi.”
26 Niepepa i Batsyeba namatemo bereina, nasusa mpuu rarana. 27 Naliupa tempo nggasusa rarana, nitudu i Daudmo tona hau mangala mombine haitu rakeni hau ri banua kamagaua bo nipobereinamo. Bara sako mbula naliu haitu nipoanakanamo saito ngana langgai. Tapi ledo nasana rara nTUPU ante panggavia i Daud haitu.