I Daud nombadagi toAmon bo toSiria
10
Naliu haitu namatemo i Nahas magau ngata Amon, bo i Hanun anana langgai nosambei ia najadi magau. 2 Notesamo i Daud, “I Nahas roaku nabelo. Jadi yaku kana moroa muni ante i Hanun anana.” Sabana haitu i Daud nantudu suro hau ri ngata Amon mompakasana rara i Hanun sabana kamate ntomana.3 Nakavapa ira ri ngata Amon, notesamo tomaoge-tomaoge ri ngata haitu ka magau Hanun, “Pua, nemo ntoto rapekirimiu i Daud nantudu surona haitu mombabila tuamamiu! Ia nombasuro tona gahaitu tumai, aga nompomata ngata hitu ala mamala ragerosira.”
4 Jadi nitudu i Hanunmo mombasaka suro anu nitudu i Daud haitu. Janggo nu suro gahaitu nigausira sabingga, pakeara nikotosi pakaede sampe ri palora, pade nitudura nalai. 5 Tapi naeya mpuu mata nu suro gahaitu manjili hau ri ngatara. Niulikara i Daud anu najadi haitu. Jadipa nipakatu i Daudmo tevai ala suro-suro gahaitu monturo ri ngata Yerikho ruru sampe janggora metumbu mpanjili.
6 Naliu haitu nisani ntoAmon anu nipoviara ante suro-suro pangane nompakarau rara i Daud. Sabana haitu nibayarira tantara ntoSiria ropulu njobu (20.000) kadeana anu nonturo ri ngata Bet-Rehob bo ri ngata Zoba. Nibayarira muni tantara dako ri ngata Tob sapulu ronjobu (12.000) deana bo magau dako ri ngata Maakha nanggeni sanjobun(1000) tantarana. 7 Niepepa i Daud kareba haitu, nitudunamo i Yoab ante pura-pura tantara mposieva hau mosieva ante balira. 8 ToAmon nesuvu bo nompasiayu tantarana, ri ngayo bobaa vamba pesua ri ngata Raba. ToSiria, toTob bo toMaakha nompasiayu tantarara ri karava.
9 I Yoab nompeinta, ia rapatiku nu tantara-tantara balina dako ri ngayona bo dako ri bengona. Sabana haitu nipelisina tantara ntoIsrael tobelona ntoto, mompasiayu baresi mosintingayo ante tantara ntoSiria. 10 Tantara ntoIsrael labina haitu nidekeina ka tueina i Abisai, mompasiayu baresi tantarana mantingayo tantara ntoAmon. 11 Nanguli I Yoab ka tueina: “Ane domo kupakule mangeva tantara ntoSiria ngena, masalisa mutulungi yaku. Ivesia muni ngena iko, ane domo mupakule mangeva tantara ntoAmon, yaku vai mantulungi iko. 12 Pakaroso raramu! Anumo, mosievamo kita nte roo rara mombasaliku todeata bo ngata niponturota anu nidekei nu Alatala nisombata. Damo TUPU movia anu nipodotaNa.”
13 I Yoab ante tantarana hau nombasuu tantara ntoSiria, bo tantara ntoSiria nalai nangova pura. 14 Nipeinta tantara ntoAmonpa tantara ntoSiria nalai, nalai munimo ira dako ri posievara nte i Abisai bo noura hau riara ngata. I Yoab nanjili hau ri ngata Yerusalem naupu nombasuu toAmon.
15 Nipeinta ntoSiria nidagi ntoIsraelmo ira. Sabana haitu nironderamo pura-pura tantarara ala masiromu mpanjili. 16 Pade Magau Hadadezer nombatudu batuana hau mombaronde toSiria anu nonturo ri sabingga mpandake binangga Efrat. Nakavamo ira ri ngata Helam nikeniaka i Zobakh, tadulako ntantara Magau Hadadezer. 17 Nangepe haitu, i Daud nasalisa nompasiromu pura-pura tantara ntoIsrael, pade haumo ia nevote binangga Yordan, napola ri ngata Helam. Ri sia toSiria nompasiayu tantarara bo nombasuu tantara i Daud. 18 Tapi toIsrael nombadagi tantara ntoSiria. I Daud bo tantarana nompatesi pitu-atu (700) topanggeni kareta mposieva, bo patapulu njobu (40.000) tantara nesavi jara. I Zobakh tadulako ntantara nu bali i Daud nobela oge sampe namatemo riara mposieva. 19 Nipeintapa nu magau-magau anu natundu ante i Hadadezer nidagi nu tantara ntoIsraelmo ira, jadi niperapiramo mosinggabelo bo matundu nte toIsrael. Nompamula dako rahaitu domo nadota toSiria nombatulungi toAmon.