I Daud bo i Mefiboset
9
Naria sanggani i Daud nekutana, “Da nariapa natuvu sampesuvu i Saul? Ane da maria, yaku madota movia belo ka ia sabana toveku nte i Yonatan.”2 I Ziba sanga batua nu sampesuvu i Saul, bo ia nitudu mosinggavaka Magau Daud. Nekutana magau, “Ikomo tu i Ziba?”
Nesanamo ia, “Iyo, pua.”
3 Pade nekutana vai magau, “Da nariapa natuvu sampesuvu i Saul? Yaku madota movia belo ka ia, eva nijanjikumo ante Alatala.”
Nesana i Ziba, “Da nariapa saito ana langgai i Yonatan. Napunggu kadana.”
4 Nekutana vai magau, “Ri umba ia?”
Nesana i Ziba, “Ri ngata Lodebar, ri banua i Makhir ana i Amiel.” 5 Jadi nitudu nu magaumo tona hau mombaronde ana langgai i Yonatan haitu.
6 Ana i Yonatan haitu nosanga i Mefiboset. Tempo ia nakava, ia nantaputu nombasomba i Daud. Nanguli i Daud, “Mefiboset!”
Nesanamo ia, “Hitumo yaku, pua.”
7 Nanguli i Daud, “Nee maeka. Yaku movia belo ka iko sabana tuamamu i Yonatan. Pura-pura tana ntupumu i Saul kupopanjili ka iko. Iko mamala mangande ri banua kamagaua sampe ri kaupu nggatuvumu.”
8 Nantaputu vai i Mefiboset bo nanguli, “Pua, isema tano yaku sampe komiu nompoasi yaku?”
9 Pade nironde magau vai i Ziba, batua i Saul haitu, bo nanguli, “Pura-pura pomboliaka i Saul ntali sampesuvu, kudekei ka i Mefiboset tupu i Saul. 10 Iko, ana-anamu bo batua-batua anu naria ante iko kana mokarajaa tana haitu, bo dekeimo asele ntana haitu ka tupu i Saul, ala mompakagana anu niparaluura. Tapi i Mefiboset mamala mangande ri banua kamagaua sampe ri kaupu nggatuvuna.” (Ana langgai i Ziba sapulu alima kadeana, bo batuana ropulu kadeana).
11 Nesanamo i Ziba, “Pua, pura-pura anu niparentamiu kana kuoseaka.”
Jadi i Mefiboset nangande singgani ante magau mpo ana-ana langgai i Daud mboto. 12 Naria saito ana langgai i Mefiboset nosanga i Mikha. Pura-pura tona anu naria ri banua i Ziba najadi batua-batua i Mefiboset. 13 Ivesiamo katuvu i Mefiboset tona napunggu kadana. Ia nonturo ri Yerusalem bo nasaro nangande ri banua kamagaua.