I Daud padagi riara posieva
8
Naliu haitu i Daud nombasuu toFilistin vai. Ia nombadagi bo nombaagosi tana anu niponturora.2 I Daud muni nombadagi tantara toMoab [bo ira nitavanina.] Nituduna ira naturu ri tana, pade nireke tatalu-tatalu tona haitu bo randua nipatesina. Jadi toMoab natundu nte i Daud bo nombayari paja njuu ka ia.
3 Naupu haitu i Daud nombadagi Magau Hadadezer ana i Rehob anu nomparenta ri ngata Zoba ri Siria. Tempo Magau Hadadezer hau nombakuasai mpanjili kamagaua napara ri binangga Efrat, nidagi i Daudmo ia. 4 I Daud nombatavani sanjobu pituatu (1.700) tantara i Hadadezer anu nesavi jara bo ropulu njobu (20.000) tantara anu nolipa nggada. Nadea mpuu jara nilopusina, tapi sabagia ledo nilopusina ala magana rapake mombataja saatu kareta mposieva.
5 ToSiria dako ri ngata mbaso Damsyik nompakatu tantara mombatulungi Magau Hadadezer. Tapi i Daud nombadagi ira, bo nipatesina ropulu bo ronjobu (22.000) kadeana. 6 Nipopeangga i Daudmo tenda-tenda ntantara riara ngatara, ira natundu bo nombayari paja ka ia. Nau ri umbapa posieva i Daud, TUPU kana nombadekei padagi ka ia.
7 Kaliavo-kaliavo bulava nipake ntantara i Hadadezer niagosi i Daud bo nikenina hau ri Yerusalem. 8 Nadea mpuu gala niala i Daud dako ri Betah bo dako ri Barotai, ngata-ngata anu niparenta i Hadadezer.
9 I Tou magau ri ngata Hamat. Niepena i Daud nombadagi puramo tantara i Hadadezer. 10 Jadi nitudunamo i Yoram anana langgai hau manguli salandoa bo damba rarana ka Magau Daud, sabana i Hadadezer nasaro nosieva ante i Tou. I Yoram nakava nte i Daud nanggeni pedekei nadea, evamo bulava, salaka bo gala. 11-12 I Daud nombadekei pura-pura pedekei haitu ka TUPU ala rapake ri ada pesomba. Ivesia muni nipoviana ante mbara-mbara bulava bo salaka anu niagosina dako nte i Hadadezer bo dako ri ngata-ngata ntanina anu nidagina, haitumo ngata Edom, Moab, Amon, Filistin bo Amalek.
13 Sanga i Daud natolele ntotopa vai, tempo ia nanjili dako nompatesi sapulu valu (18.000) njobu toEdom ri Lemba Gara. 14 Nipopeanggana tenda-tenda ntantara ri njumangu tana Edom bo todea ri Edom haitu natundu nte ia. Ri umba-umbapa posieva, TUPU kana nombadekei padagi ka i Daud.
Tona nokarajaa ka i Daud
15 Ivesiamo i Daud nomparenta ri njumangu Israel, bo todeana nikeniakana nabelo bo nanoa. 16 Hitumo sanga-sanga ntona anu nalanga nturona nianggataka i Daud riara kamagauana: i Yoab ana i Zeruya najadi tadulako nu tantarana. I Yosafat ana i Ahilud najadi topotesa ka kamagaua. 17 I Zadok ana i Ahitub bo i Ahimelekh ana i Abyatar najadi topanggeni pesomba. I Seraya najadi topotulisi ri kamagaua. 18 I Benaya ana i Yoyada, nombabalenggai toKreti bo toPleti topojagai magau. Ana-ana langgai i Daud mboto najadi topourusia riara banua kamagauana.