Petevai Nabi Natan ka i Daud
7
TUPU nombajagai Magau Daud dako ri pura-pura balina, sampe natuvu nasana ri banua kamagauana. 2 Jadi nangulimo magau ka Nabi Natan, “Peinta, Peti Pojanji nu Alatala aga niboli riara tenda nggoo tapi yaku hii nonturo riara banua kamagaua nipovia dako ri kayu kayou dako ri Libanona!”3 Nesana i Natan, “Pua, poviamo anu niponiamiu, sabana TUPU mombatulungi komiu.”
4 Tapi bongi haitu muni nakavamo tesa nTUPU ka i Nabi Natan, ivei: 5 “Koimo bo ulimo petevaiKu hitu ka batuaKu i Daud ivei, ‘Berimba bo iko mompopeangga banua ka Yaku? 6 Nompamula lako ri tempo nikabasakaKu todeaKu toIsrael dako ri Mesir baipia sampe eo hitu, doparia Yaku naroo riara banua. Yaku aga nolinja-linja dako ri potenda sangu hau ri potenda ntanina. 7 Sanggasaenamo polipaKu nosinggani-nggani ante todeaKu toIsrael, nadea pakeni nipelisiKu manggeniaka ira. Ledo ria niuliKu ka ira kana mompopeangga banua dako ri kayu kayou ka Yaku.’
8 Sabana haitu, Natan, ulimo ka batuaKu i Daud, ivei: ‘Yakumo TUPU anu nompajadi dunia bo isina. Yaku nangala iko dako ri pokarajaamu noevu bimba ri karava, bo nianggatakaKu iko najadi magau ntodeaKu toIsrael. 9 Naupa ri umba nukalau, Yaku batena nompoevu iko. Tempo iko nosieva niropusiKu pura-pura balimu. Kupakaoge iko mpo tomaoge nipakaoge ntoto ri dunia. 10-11 NipasadiaKu muni tana raponturo ntodeaKu toIsrael. NipakatantuKu ira maroo ri sia, ala ira mamala matuvu matinonto, bo domo molinja-linja. Sanggakavarame ri tana hitu nggaulu, nianggatakaKumo pakeni-pakeni ka ira, bo topegado nombasuu njuu ira. Hitupa domo rasuu ntopegado ira. Yaku nojanji mombadekei katinonto ka iko, domo ria iko ragado nu balimu, bo Kudekei muli ka iko. 12-13 Ane makavamo gantana iko mamatemo, iko ratana ri podayo ntotuamu nggaulu. Saito anamu langgai kana Kuanggataka majadi magau. Iamo anu mompopeangga banua ka Yaku. Kamagauana Kupakaroso, bo saito mulina kana majadi magau bo momparenta sampe ri kasae-saena. 14 Yaku majadi tuamana, bo ia majadi anaKu. Ane masala ia, kana Kupatuduki mpo totua nompatuduki anana. 15 Tapi Yaku batena mompotove ia. Ledo majadi mpo nipoviaKu ka i Saul anu nipopanauKu dako ri kamagauana ala iko majadi magau. Tapi mulimu haitu bate-batena Kupotove. 16 Batena maria mulimu, bo Kupakaroo kamagauamu sampe ri kasae-saena. Mulimu momparenta majadi magau sampe ri kasae-saena.’ ”
17 Jadi i Natan nanguli ka i Daud pura-pura anu nitevai nu Alatala ka ia.
Posambaya posukuru i Daud
18 Naupu sia nesuamo Magau Daud hau riara tenda nTUPU. Nonturomo ia bo nosambaya, “O Pue ALATALA, kami sambanua ledo masipato mantarima pura-pura kabelo nipoviaMiu ka kami sampe sii-sii. 19 Komiu nompovia anu nelabipa kabelona. Komiu nojanji anu majadi ante muliku ri eo nggapurina ngena. Nau yaku aga manusia, anu haitu nipopasaniMiumo ka yaku. 20 Nuapa vai mamala kuuli ka Komiu? NisaniMiu puramo anu naria riara ntaiku batuaMiu hitu. 21 Nantuntuni janji bo dotaMiu mboto, Komiu novia panggavia-panggavia mbaso bo nipopaisaniMiu ka batuaMiu hitu. 22 O Pue ALATALA, nambaso mpuu KakuasaMiu! Aga Komiu Alatala, ledo ria kasimbayuna nte Komiu. Nisani kami haitu sabana dako ri nggauluname nipopaisani mamimo. 23 Ri njumangu dunia ledo ria todea mpo toIsrael. ToIsrael sangu-sanguna todea anu nikabasakaMiu dako ri pepandasa ri Mesir ala majadi todeaMiu mboto. Nadea mpuu panggavia nipokumaaka nipopakitaMiu ka ira. Pura-pura haitu najadi ala sangaMiu rapakaoge ri njumangu dunia. Tempo todeaMiu hau mosieva, nipopalaiMiu todea ntanina nte viata-viatara. 24 O PUE, toIsrael nipajadiMiu todeaMiu mboto sampe ri kasae-saena, bo Komiu najadi Alatala nisombara.
25 O PUE Alatala, padupamo sampe ri kasae-saena janji niuliMiu majadi ri karoku bo nte muli-muliku. Pakadupamo anu nijanjiMiu haitu. 26 Ri umba-umba tona kana mombatoiya sangaMiu bo manguli, ‘TUPU anu nompajadi dunia bo isina, Iamo Alatala anu nisomba ntoIsrael.’ Kana maria muliku majadi magau momparenta todea hitu sampe ri kasae-saena. 27 PUE, Komiu nompajadi dunia bo isina! Yaku nompebia nombasovadaka posambayaku hitu ka Komiu, sabana nipopasaniMiu mbotomo ka yaku, apa ana-anaku sampe ri tupu-tupuku rapajadiMiu magau ka todea hitu.
28 O Pue ALATALA, Komiumo Alatala. Pura-pura janjiMiu madupa, bo janjiMiu ka yaku hitu nabelo bo nakana. 29 Sabana haitu, kuperapi dekeimo rasi bo belo ka muli-muliku ala bate-batena rarasaira toveMiu sampe ri kasae-saena. O Pue ALATALA, Komiu mboto nojanji mombadekei rasi bo belo ka muli-muliku sampe ri kasae-saena.”