4
1 Kubuno idagano lya kwingila mu kyumuno likiligo, umpanga, tukue boba buno umozi wa kumuli anavwa kutabasako. 2 Kubuno twasambalidwe wono musagu musoga anga babo, tondo kitondo kibasambalidwe takyabakasile mutali wampa, kubuno takyasambikenne na bukatizio munda mwa babo bongule kukyo. 3 Kubuno iswe bakatizizie, tukwingila mu kikyo kyumuno, anga bwatendile Kalaga bunee: “Anga bunalumbide ganongagwa bunee:
‘Tabakeingila mu kyumuno kyane!’” a
Aaba milimo zage zasilile kutukila kubumbwa kwa kisi. 4 Kubuno atendile mu kiziki kimozi ku kitondo kya busi bwa mutubakamo bunee: “Nu Kalaga umwinwe ku milimo zage insania busi bwa mutubakamo.” b 5 Nu kiziki kikino lingo bunee: “Tabakeingila mu kyumuno kyane.” c 6 Umpanga, kubuno kyabikidwe lingo bamozi kwingila mukyo, nu kubuno babo balingile kusambalilwa Musagu Musoga tabeingidemo ku kabamba ka kutanza kwabo, 7 Kalaga abikile bungo busi, Lelo, nu atendile mu Davidi kumbusa kwa myaka mingi, anga bwalingile kutenda bunee:
“Lelo, ndi mukungwa ku iyuki lyage,
tamulimbanie mitima zeinyu.” d
8 Kubuno, songo Yosua abomuzizie, songo Kalaga ntanatendile lingo bungo busi. 9 Umpanga, kyasigala kyumuno kyabikilwe ku bantu ba Kalaga. 10 Kubuno wozo ukwingila mu kyumuno kya Kalaga omunwa ku milimo zage, anga bwomwinwe Kalaga ku milimo zage. 11 Umpanga twidindike kwingila mu kyumuno kikyo, buno muntu wampa anavwa kugoa ku lukita lulo lwa kutanza!
12 Kubuno idagi lya Kalaga, likulamaga nu lili na magala, nu lili ikali kutinga bupanga bukusesa ntungo ibili, likusumita aaba nu kulekanukya mutima na muuza, ngiginyo na mungongo, likumenyinina makengelo nu ntundo za mutima. 13 Takuli kibumbwa kyampa kyabisama lwabusio lwage, tondo bintu binsania bili mundulu nu bwasi ku meiso ma wozo u tukukitila.
Yesu Eli Sankoga Munene
14 Umpanga, mu kuba tuli na Sankoga Munene wingide mwigulu, u Yesu, Mwana wa Kalaga, tukokomezie nunse bukatizio bweitu. 15 Kubuno tatuli na Sankoga Munene utanavwama kutukasia ku bitondo bya mutambo weitu, tondo alindikilwe anga iswe mu bitondo binsania, tondo ntagile. 16 Umpanga tukunde na kilemanizio nunse kisumbi kya mponga, buno tukwilwe kyombo nu kuba na mponga, za kutukasia ku nkungu za meiyanino meitu.