Yesu Eli Munene Kutinga Musa
3
1 Kubuno, mibuto basililila, beizi mubila wa kwigulu, kengelazi nunse Musingwa nu Sankoga Munene wa bukatizio butukusambala, 2 u Yesu, wabezaga mukatizia ku wozo wamubikile, anga bwabezaga Musa mu numba zage insania. 3 Kubuno aganzilwe buno atananinwa na lutanuno lwatinga lulo lwa Musa, kubuno wozo wobakile numba eli na lutanuno nunse kutinga zezo numba zozenyene. 4 Kubuno na numba na numba na zobakilwe na muntu, tondo wozo wakitile bintu binsania u Kalaga. 5 Nu Musa abezaga mukatizia mu numba insania za Kalaga, anga mukiti, buno alongeke bitondo byatunganana kutendwa; 6 tondo Kristo eli mukatizia anga mwana gantata ga numba zage nu numba zage u beiswe, ndi twalinda bupuka nu kilemanizio bitukwiganuna nabyo aaba nu kuzinda. Kyumuno Kyabikilwe ku Bantu ba Kalaga
7 Ububo, anga bukutenda Muuza Wasililila bunee:
“Lelo, ndi mungwa ku iyuki lyage,
8 Tamulimbanie mitima zeinyu, anga ku nkungu za kuguna,
busi bwa kulindikwa mu kalula,
9 Kuko kwandindikile basoinyuwe nu kungeleka,
nu bamonine ku makitilo mane ku myaka makumi manazi.
10 Ku bubuno nongedwe kibuti kikino, nu na
bwide bunee:
‘Beli na mitima za buzimizi bindi binsania.
Tabamenyine nzila zane.’
11 Ububo bunalumbide ganongagwa bunee:
‘Tabakeingila mu kyumuno kyane.’” a
12 Mibuto zane, mwidange, buno umozi wa kumuli ntabe na mutima mubi nu utakatizia, ku kwidekanukya na Kalaga uli mulami. 13 Tondo, mulindanie bweinyubweinyu busi na busi aba buki bwamanwa “Lelo!” buno takube umozi wa kumuli kuba mubibu ku bwengelezi bwa bwagi. 14 Kubuno tuse twagomia na Kristo ndi twakokomezia na magala kilemanizio kitwabezaga nakyo ku kulinga aaba nu kuzinda.
15 Gakutendwa bunee:
“Lelo, ndi mungwa ku iyuki lyage,
tamulimbanie mitima zeinyu anga nkungu za kuguna.” b
16 Banazi babo bamubengile kumbusa kwa kungwa ku iyuki
lyage. Ndi ta babo bansania batukile ku Misri basondelezibagwa na Musa? 17 Ongwedwe myaka makumi manazi na banazi? Ndi ta babo bagile nu bitumba byabo byagwede mu kalula? 18 Nu ku banazi kwalumbide buno tabakeingila mu kyumuno kyage, ndi ta ku babo batanzile? 19 Nu tukumona buno tabavwamine kwingila mukyo ku kabamba ka kutakatizia kwabo.