Kulolesibwa kwa Paulo
12
1 Lebelebe bwatunganana nikake aba tabuli busoga kundi, tondo nabase ku tulolesio nu ku kulolesibwa kwa Mukota. 2 Nizi muntu umozi mu Kristo, gese gatinga myaka ikumi nu inazi (Ndi abezaga mu mubili wage, nsizi; aba ndi atukile mu mubili wage, nsizi; Kalaga u wizi), muntu wozo ekilwe aaba nu ku igulu lya masatu. 3 Nizi muntu wozo (Ndi abezaga mu mubili wage, aba ta mu mubili wage, nsizi; Kalaga u wizi), 4 buno ekilwe ku Paradizo nu ongule ku bitondo bitanavwamwa kutendwa, nu bitatunganana muntu kutenda. 5 Nkwikaka ku kabamba ka wozo muntu, tondo kundi nnenyene nsyikake, umpanga ku mutambo. 6 Songo ninatundile kwikaka, nsinabede kikongolo, kubuno ninatendile bulili. Tondo nkwisungula buno muntu wampa ntabe n'ikengelo lyatinga lyakumona kulyo mundi aba lyakungwa kulyo kundi, 7 nu ku kabamba ka bwingi bwa kulolesibwa, buno nsyitile kwikotia. Nabikilwe mukele mu mubili, mugenzi wa Satana buno andibule ninavwa kwiganuna nunse. 8 Ku bubuno nasegile Mukota Kalaga mambizi masatu buno guntuke. 9 Tondo ambwide bunee: “Mponga zane zakuka kuguli; kubuno magala mane masililila mu mutambo.” Umpanga nikake mu mutambo wane buno magala ma Kristo mabe mundi. 10 Ku kabamba kakano nkubogaboga mu mutambo, mu bilingano, mu meiyanino, mu nsungio nu tubebe ku kabamba ka Kristo; kubuno mu nkungu zinatamba nti mu zezo nkungu nili na magala. Kabebe ka Paulo ku BaKorinto
11 Nabede kikongolo, nu inyuwe u mwansindikile ku bubo, kubuno bwatunganenne niganunwe n'inyu kubuno nsyabede mukeke ku basingwa banene aba nne nsili kena. 12 Misako zikulolesia bulili bwa busingwa bwane zakitilwe munkatini mweinyu mu kwikalila kunsania, ku tulolesio mu makitilo ma magala nu miganogano. 13 Kubuno kikizi kimwidile kutinga mango makanisa? Umpanga mu kitondo kya buno nsyazigile kuba muzigo wa kumukutia? Nsigilile ku kitondo kikino.
14 Lolazi, lilino lili limbizi lya masatu, nne nili kayikayika kuvwa kumuli; nsikutunda kumukutia kubuno ta bikulo byeinyu u binkulonda, tondo inyuwe mubenyene u bankulonda. Tabwatunganana bana kukundamania bikulo ku babuti babo, tondo babuti kukundamanizia bana babo. 15 Kundi nakite na mbogimbogi nunse nu nikasane nnenyene ku kabamba ka mitima zeinyu. Ndi nkumutunda nunse, nti nakokoke kutundwa n'inyuwe?
16 Tondo bube bubo aba nsyabede anga muzigo kumukutia, tondo kubuno nili na menge, namukatile mu bwenge. 17 Ndi namonine mutali mumuli, ku muntu umozi wa ku bantu babo banamusingide? 18 Nasegile nunse Tito kwenda kumuli nu nasingile mubuto weitu gamozi nage. Ndi Tito asegile mutali? Ndi tatwendile mu Muuza umozi nu ndi tatwayangile masomoneno mamozi?
19 Mukukengela buno kutukila wakalazi tukwiswagia lwabusio lweinyu? Kilo! Tondo tukutenda lwabusio lwa Kalaga mu Kristo. Batundwa bane bibino binsania bitukutenda, tukubitenda ku kabamba ka kumukasa magala. 20 Kubuno nkukua boba buno mu kuvwa kwane ninavwa kutamusanga anga bubo bunkutunda kumusanga nu nnenyene ninavwa kumoneka n'inyuwe anga bubo bumutakutunda. Nkukua boba buno ninavwa embe kumusanga na nsake, lugi, bongoa, myango, manungunungu, bukandiki, lwikotio nu kazege. 21 Nkukua boba buno ganavwe lingo, Kalaga wane anavwa kunitia na nsoni lwabusio lweinyu, nu buno ninavwa kulilila beingi bagile wakalazi, nu tabeiyanizie ku bwagi, ku butazi nu ku misako mibi zibakitile.