11
1 Nkulemanina buno munikalile kakeke mu bukongolo bwane, nu lebelebe mwanikalila! 2 Kubuno nili na lugi kumuli, lugi lwa Kalaga, kubuno namusongizie ku wamulume umozi, buno nimulusie ku Kristo anga kikumi kyaswaga. 3 Nkukua boba buno anga nzoka zengelede Eva ku bwenge bwazo, makengelo meinyu manavwa kubiga nu kusiga bukatizio busoga nu bulili ku Kristo. 4 Kubuno ndi ungo muntu avwa kumusambalila ungo Yesu uteli wozo u twasambede, aba ndi mwakata ungo muuza, uteli wozo u mwakatile, aba ungo musagu musoga, uteli wozo u mwitabizizie, nti mwamwikalila busoga. 5 Tondo nkukengela buno nsyabede mukeke ku kampa ku babo basingwa banene. 6 Ndi nsizi kutenda busoga, tabukutenda buno nsili na menge nu twabulolesizie munkatini mweinyu mu bitondo binsania.
7 Ndi nagile ku kwisigulizia nnenyene buno inyuwe musakikwe ganamusambalide Musagu Musoga wa Kalaga kuteli lukalilo? 8 Nibide mango makanisa ma Kalaga bikulo byamo mu kuligwa namo ku mulimo wane buno nimukasie, 9 nu ganabezaga n'inyuwe nu niyaninaga, tondo nsyakutizie muntu umozi, kubuno mibuto zane batukile ku Makedonia, bankasile anga buniyaninaga; nu mu bitondo binsania nidangile buno nsimukutie nunse, nu bubo u bunidange. 10 Anga bubo buli bulili bwa Kristo mundi, takuli muntu unankabya ku kwikaka kukuno mu ndenge insania za ku Akaya. 11 Ku kabamba kakizi? Kubuno nsikumutunda? Kalaga eizi buno namutunda.
12 Tondo bubo bunkukita nabukite lingo, buno nitikye lilyo ikengelo ku babo bakulonda bubanagelama n'iswe mu bitondo bibakwikakila mubyo. 13 Babo bantu beli basingwa ba buza, bakiti ba mulimo ku bwengelezi, nu bakwigalukya bobenyene kuba anga basingwa ba Kristo. 14 Nu bubo tabuli bwa kwangamia; kubuno Satana wenyene akwigalukagia anga mwanzelo wa kyengi. 15 Umpanga takuli bunangamia buno ndi bakiti bage bakwigalukya anga bwatananina bukiti bwabo.
Kwiganuna kwa Paulo
16 Nkutenda lingo buno, muntu ntakengele buno nili kikongolo; aba ta bubo, ndi mwankata bubo, kasi munitabizie anga kikongolo, buno nu nne nikake kakeke. 17 Bubo bunkutenda nsikubutenda ku ikakizio lya Mukota, tondo anga kikongolo mu kilemanizio kya bunineikaka. 18 Kubuno kuli bantu beingi bakwikaka ku lukita lwa mubili, nu nne tondo nikake. 19 Kubuno inyuwe beli na menge mukutundaga kubogaboga na bikongolo. 20 Tondo kubuno mukubuziga, ndi muntu akumubika ku bukobe, ndi akumuzambia, ndi akumunyaga, ndi akwikaka, ndi akumulibula ku meiso: 21 Nili na nsoni kutenda bubo, anga buno iswe twabezaga twatamba.
Tondo ndi muntu akwikaka ku kitondo kinsania, nkutenda anga kikongolo, nu nne nkwikaka. 22 Ndi babo beli baEbrania? Nu nne tondo nili muEbrania. Ndi babo beli baIsraeli? Nu nne tondo nti nili muIsraeli. Ndi babo beli ba kikanga kya Abrahamu? Nu nne tondo nili wa kikanga kya Abrahamu. 23 Ndi babo beli bakiti ba Kristo? (Nkutenda anga musile) Nne nili mukiti nunse kubatinga; ku milimo mibibu, ku bikando bibibu nunse, ku kulibulwa nunse mambizi meingi, bwigi kukua. 24 Ku baYuda nasuswidwe mambizi matano, tususula makumi manazi, kutikya ku kamozi. 25 Nalibwidwe na nkoma mambizi masatu, nalibwidwe na makozi limbizi limozi; natikidwe na bwato mambizi masatu mu kitatenge, nasilile musi nu kindi mu iziba lya kitatenge. 26 Mambizi meingi mu ngendo, nabezaga gabibu mu nuuzi nnene, nabezaga gabibu na banyagi, gabibu na bantu ba kilongo kyane, gabibu ku babilongo, gabibu mu miino minene, gabibu mu kalula, gabibu mu kitatenge, gabibu munkatini mwa mibuto za buza, 27 ku milimo nu mu mbabazio, nabezaga nkukesia ntende ningi, mu nzala nu mu mpusia, mu kukanda kulia mambizi meingi, mu mpego nu mu bwela. 28 Nu geteli kutenda bingo bitondo nili na mpipi nnene busi na busi ku kitondo kya kulanga makanisa mansania. 29 Nazi watamba nu nne nsyatamba? Nazi ukukoloka mu bwagi, nu nne nsikubabalwa?
30 Ndi bwatunganana kwiganuna, nti niganune ku mutambo wane. 31 Kalaga, Isi wa Mukota Yesu Kristo waganunwe aba ku milyalya eizi buno nsikweka buza. 32 Ku Damasiki mwangati wakitilaga mukota Areta, abikile balangi ba mwino wa Damasiki buno ankate. 33 Tondo bangezizie mu luzi g'idilisa ku kitutu, nu bubo nasogonyokile mu maboko mage.