Paulo Akulolesia Bitondo bya Busingwa Bwage
10
1 Nne Paulo nnenyene nkumusengezia ku kubota nu ku busoga bwa Kristo, nne uli wabota ku meiso meinyu kungwa nili munkatini mweinyu, tondo nili ipuka kumuli ndi nili bulazi; 2 nkumusega buno nkungu zinabe kuko, tamunsindike na magala ku wozo mugugumano u nkukengela kukita nago ku bantu bamozi bakutulola anga bakwenda mu mubili. 3 Buligo buno tukulama mu mubili, tondo tatukulwana bita anga bya mu mubili. 4 Kubuno ngabo zitukulwana nazo tazili za mubili, tondo ku lutundo lwa Kalaga zili na magala kugusia mikolo za bita za biziki byalanga. 5 Tukukinda makengelo ma kwikotia nu magala mansania ma kwisakika ku menge ma Kalaga, nu tukugalukya makengelo mansania ku bukobe bwa kwanza Kristo. 6 Tondo tuli kayikayika kusungia bwagi bunsania bwa kutanza mu nkungu gakuke lwanzo lweinyu. 7 Ndi mukulola ku bibyo bikumonekako? Ndi muntu akukatizia wenyene buno eli muntu wa Kristo, akengele mu mutima wage buno bweli muntu wa Kristo, bubo nu iswe u butuli bantu ba Kristo. 8 Nu ndi nkwikaka kakeke ku bwangato bwatukasile Mukota Kalaga buno tumulindie, tondo takumugusia, nti nsinaba na nsoni nabo, 9 ninavwa kumoneka anga ukutunda kumwitia na boba na mikanda zane. 10 Kubuno bakutenda bunee: “Mikanda zage zili na moki makali nu mabibu, tondo ndi eli gano nti atamba, nu mutendezi wage nti ukubengwa.” 11 Babo bantu bakutenda bubo batunganana kumenya buno, butukutenda mu mikanda zeitu gatuteligo u nu bubo butwabe ku kukita kweitu nkungu zitwabe gamozi n'inyuwe.
12 Kubuno tatukutunda kwiganza aba kwidingimania na bantu bakwikaka bobenyene. Tondo ku kwidindika bwabobwabo nu ku kwidingimania bobenyene, nti bakwida menge. 13 Iswe tatuneiganuna kutinga mwaga weitu, tondo tugu ku mwaga gutwakasilwe na Kalaga, aba nu kutubasia kweinyu. 14 Kubuno tatukutingila gago gatwakasidwe, anga buno tatwamubaside, kubuno kumuli u kutwabaside na Musagu Musoga wa Kristo. 15 Aba tatukwikaka kutinga mwaga weitu ku milimo za bango bantu; tondo tuli na kilemanizio buno ndi bukatizio bweinyu bwitila, nti tunitila kukita mulimo munene munkatini mweinyu, 16 mu kusambala Musagu Musoga mu bisi bili ku lisa na kweinyu, kuteli kwiganuna mu bitondo byasila kukitwa na bango bantu mu milimo zabo.