Nkaso za Kutananizia Kalaga
9
1 Ku kitondo kya bukasia bwa basililila, takuli nunse mutali wa kumusanzila. 2 Kubuno nizi lutundo lweinyu lunkwikaka nalo lwabusio lwa bantu ba ku Makedonia nu kubabula buno, aba ku baAkaya beli kayikayika kutukila mwaka watingile; nu magala meinyu mayukizie beingi munkatini mwabo ku kukasana. 3 Tondo namusingila mibuto zane, buno kwikaka kweitu mumuli takube buliabulia mu kitondo kikyo nu buno mube kayikayika anga bunatendile. 4 Nsikutunda buno, ndi bantu ba ku Makedonia bavwa gamozi na nne nu kumusanga tamuli kayikayika, nti twabe na nsoni gamozi n'inyuwe ku bubo butwikakilaga kubo. 5 Umpanga nakengede buno buli busoga nne nisungule mibuto zane buno balinge kuvwa kweinyu kukungika lukaso lweinyu lumwalagile buno lube kayikayika nu bubo lwabe anga lukaso lwa lutundo ta anga lukaso lukukasanwa na nduma.
6 Kengelazi bitondo bibino: buno wozo ukuyika bikeke akatubula bikeke nu wozo ukuyika byingi akatubula byingi. 7 Umpanga na muntu na muntu akasane anga bwakukengela mu mutima wage, ta ku kangonongono, aba ku kusindikwa, kubuno Kalaga akutunda wozo ukukasana na mutima wa mbogimbogi. 8 Nu Kalaga anavwama kumutalikila mponga ningi buno mube na binsania bimukwiyanina buno mwitile nunse kuba na komanizia mu mulimo na mulimo musoga. 9 Anga bwasanzilwe bunee:
“Abalanganizie nkaso zage, akasenne ku bazambi,
Kwisanana kwage takuli na kuzinda.” a
10 Kalaga u gukukasanaga mbuto ku muyiki wa mbuto nu kampampa kuba idia lyage, akamukasa mbuto; nu kwitila kuzasia nu akatalikila biguma bya kwisanana kweinyu. 11 Mwamone mutali mu bitondo binsania buno muvwame kulolesia kukasana kweinyu mu nkungu insania buno ku nkaso zeinyu bantu beingi bakaganuna Kalaga. 12 Kubuno bukiti bwa mulimo wono tabukusililizia tugu meiyanino ma basililila, tondo bukwitila nunse ku kuganuzia Kalaga. 13 Kubuno mulimo wono ukulolesia bumuli nu ku bubuno bantu bakuganuna Kalaga ku kabamba ka lwanzo lweinyu mu mulimo wa Musagu Musoga wa Kristo, nu ku nkaso zeinyu ningi kubeli nu ku bantu bansania. 14 Nu bo bakumusegela kubuno bamutunda ku kabamba ka mponga zitila nunse zamukitide Kalaga. 15 Kalaga aganunwe ku kabamba ka lukaso lwage lwa kwangamia nunse.