Kukasana Nkaso na Lutundo
8
1 Mibuto zeitu, tukumulolesia mponga za Kalaga zakitilwe ku makanisa ma ku Makedonia. 2 Kubuno baKristo babano balindikilwe na mbabazio ningi, tondo mbogimbogi zabo zitide kuba ningi aba babezaga bazambi nunse tondo bitide kukasana byingi nunse. 3 Nkubalongekela buno bakasenne anga bubavwamine aba nu kutinga magala mabo, bakasenne anga bubatundaga bobenyene. 4 Batusegile nunse buno babe nu bo bamozi ku kukita mponga za kukasia basililila. 5 Bakitile bubo ta anga butwalemaninaga, tondo balingile tanga kwikasana bobenyene ku Mukota, kusila kutuli mu kusombola kwa Kalaga. 6 Umpanga twakakizizie Tito, buno azindilizie mulimo wa mponga anga bwagulingile kweinyu. 7 Anga bubo bumukwitila mu bitondo binsania mu bukatizio, mu mutendezi, mu bumenyinino, mu lutundo lunene nunse, nu mu lutundo lweinyu kutuli, kitazi bubo buno mwitile lingo mu mulimo wa mponga. 8 Nsikutenda bubo buno nikakizie, tondo ku komanizia ka bango bantu buno nigeleke bulili bwa lutundo lweinyu. 9 Kubuno mwizi mponga za Mukota weitu Yesu Kristo, We wabezaga mugumi, abede muzambi ku kabamba keinyu buno ku buzambi bwage mugume.
10 Ku kitondo kikyo, nu nne nkumukasa makengelo mane kubuno bubo u bwatananina kumuli, buno kutukila mwaka watingile inyuwe mwabezaga batangi, takukukita tugu, tondo ku kukasana na lutundo. 11 Umpanga kano kaluma mwitile nunse nu zindiliziazi wozo mulimo, kukita kweinyu buno bumukutunda kukita bulingimane na bubo bumukukita. 12 Kubuno ndi muntu eli na lutundo lwa kukasana ku Kalaga, nti lukaso lwitabizibwa bulingilingi na bibyo byeli nabyo, tondo ta ku byeteli nabyo.
13 Kubuno nsikutenda buno bango babogeboge nu inyuwe mube na kabebe, tondo kube kulingimana. 14 Nu nkungu zeno bikulo byeinyu byingi bikasie meiyanino ma babo beteli nabyo buno nu bo, bikulo byabo byingi bimukasie nu inyuwe ku meiyanino meinyu buno binsania bilingimane. 15 Anga bwasanzilwe bunee:
“Wozo wakungukile byingi ntitide kuba na byingi,
Nu wozo wakungukile bikeke nteidile kampa.”
Mulimo wa Tito Gamozi na Bango
16 Kalaga aganunwe wabikile mu mutima wa Tito lutundo lwa kumulanga anga bunili nalo kumuli. 17 Kubuno eitabizizie mubila weitu, nu kwitila nunse abede na komanizia nunse wenyene, ukinsa atundile kwenda kweinyu. 18 Twasinga mubuto weitu gamozi nage, wozo ukuganunwa mu makanisa mansania ku kabamba ka mulimo wage, ku kusambala Musagu Musoga. 19 Nu ta bubo tugu, tondo u wozo wasombwedwe na makanisa buno ende gamozi n'iswe mu wono mulimo wa mponga zitukukita ku lutanuno lwa Mukota wenyene nu ku kulolesia lutundo lweitu lusoga.
20 Tukukita bubo buno muntu wampa ntatubigie ku kabamba ka bikulo byingi bitukukita nabyo. 21 Kubuno tukulonda kukita kikyo kili kisoga, ta lwabusio lwa Mukota kankanka, tondo lingo lwabusio lwa bantu.
22 Twasinga ungo mubuto weitu gamozi nabo u tuse twamona mambizi meingi buno eli na komanizia nu aba kano kaluma eikili nako nunse ku kabamba ka kilemanizio kyage kinene kumuli. 23 Ku kitondo kya Tito, we eli munane nu mukiti munane na mulimo kumuli; nu ku kitondo kya mibuto zeitu, zikwendaga gamozi nage, beli basingwa ba makanisa nu beli lutanuno ku Kristo. 24 Umpanga lolesiazi babano bulili bwa lutundo lweinyu lwabusio lwa makanisa nu ku bubuno tukwikaka ku kabamba keinyu.