7
1 Batundwa bane, ku kuba tuli na malagano mamano, twiyengie ku nsese insania za mubili nu za mutima nu tuzindilizie kusililila kweitu mu kukua Kalaga boba. Mbogimbogi za Paulo
2 Tulimbulilazi mitima zeinyu! Tatwagide muntu wampa, tatwabigizie muntu wampa, tatwengelede muntu wampa. 3 Nsikutenda bubuno buno nimubezie, kubuno natendile kalazi buno inyuwe muli mu mitima zeitu, aba ku kalamo, aba nu ku lukuo. 4 Nili na kilemanizio nunse kumuli, nkwikaka nunse ku kabamba keinyu. Nakasizibwe nunse mu tubebe tweitu tunsania; nitila nunse kubogaboga.
5 Kubuno aba gatwabasile ku Makedonia, mibili zeitu tazumwinwe, tondo twasungizibwe mu nkita ningi. Bita byabezaga kumbuga nu boba ku mutima. 6 Tondo Kalaga ukubobelezagia beli na kabebe atubobelezizie ku kuvwa kwa Tito. 7 Nu ta ku kubasa kwage tugu, tondo ku bubobelelo bumwamubobelezizie, atusambalide musagu wa lutundo lweinyu nu kabebe keinyu, nu komanizia keinyu ku kabamba kane nu bubo mbogimbogi zane zitide nunse kutinga.
8 Aba nu ndi namwinizie mitima na mukanda wane, nsikwibezia kugo. Tondo nibezizie ku nkungu nkeke tugu, kubuno nkumona buno mukanda wozo wamwinizie mutima. 9 Kano kaluma nkubogaboga, ta ku kitondo kya buno namwinizie mitima, tondo kubuno kabebe keinyu kamusondelezizie ku kwiyania; kubuno mwinizibwe mitima anga lutundo lwa Kalaga, nu tamwababazizibwe ku kabamba keitu mu kitondo kinsania. 10 Kubuno kabebe kakutukaga ku Kalaga kakulusia kwiyania nu kwiyania kukulusagia lonio. Kwiyania kuko takuli na kwibezia, tondo kabebe ka kisi kakulusagia lukuo. 11 Ungwililazi, kabebe kakutukaga ku Kalaga kakitile lutundo lukizi mumuli, kwisanana kukizi, bongoa bukizi, boba bukizi, nu lutundo lukizi nunse, magala makizi, musubo mukizi! Mwalolesizie mu bitondo binsania buno mwabezaga beisanana mu kitondo kikino.
12 Umpanga ndi namusanzide, tabwabezaga ku kabamba ka wozo wakitile bubi, aba ku kabamba ka wozo wakitidwe bubi, tondo buno lutundo lweinyu kutuli lumonekeko munkatini mweinyu lwabusio lwa Kalaga. 13 Ku bubuno twabobelezizibwe.
Tondo gantata ga bubobelelo bweitu, twabogilebogile lingo nunse ku mbogimbogi za Tito, kubuno mwabobelezizie mutima wage beinyuwe bansania. 14 Nu ndi nikakile lwabusio lwage ku kabamba keinyu, nsyabede na nsoni kubo; tondo anga butwamubulaga bindi binsania bitondo bya bulili, bubo butwikakile lwabusio lwa Tito bwamonekile lingo kuba bulili nu bo. 15 Nu we itide nunse kumutunda mu mutima wage ku kukengela lwanzo lweinyu inyuwe bansania nu ku lukita lumwamusekede mulo na boba nu kugilimina. 16 Nkubogaboga buno navwame kuba na kilemanizio nunse ku bitondo binsania mumuli.