Paulo Abede Mukiti Musoga wa Kalaga
6
1 Ku buno iswe tukukita mulimo gamozi na Kalaga, tukumusega buno tamusekele mponga za Kalaga buliabulia. 2 Kubuno akutenda bunee: “Mu nkungu za kwitabizibwa nakungule
Nu mu busi bwa lonio nakukasizie.”
Ungwililazi, kano kaluma zili nkungu zitabizibwa na Kalaga, ungwililazi kano kaluma buli busi bwa lonio. a
3 Tatukutunda kukikitania muntu wampa mu bitondo binsania buno mulimo weitu unavwa kubigibwa. 4 Tondo tukwidolesia mu binsania buno tuli bakiti ba Kalaga mu nkiki ningi, mu milondo, mu bitondo bibibu, nu mu mbabazio; 5 mu kulibulwa, mu bikando, mu mulubu, mu milimo mibibu, mu kukesia, mu kwikanda kulia; 6 mu busoga, mu bumenyinino, mu kwikalila, mu mponga, mu Muuza Wasililila, mu lutundo luteli na bwengelezi, 7 mu idagi lya bulili, mu magala ma Kalaga, ku ngabo za kwisanana mu kuboko kwa seidume nu mu kuboko kwa seikazi, 8 munkatini mwa lutanuno nu nsoni, munkatini mwa lukumu lubi nu lusoga, nu kumoneka anga bengelezi, tondo tuli bantu ba bulili; 9 anga batekumenywa, tondo tukumenywa busoga, anga bakua, nu kasi tuli na kalamo, anga bakusungibwa, tondo tatukukua, 10 anga beli na kabebe, tondo bindi binsania tukubogaboga, anga bazambi, tondo tukugumia beingi, anga beteli na kena, tondo tuli na binsania.
11 Tukumusambalila bwasibwasi, ee baKorinto, twamulimbulila mitima zeitu. 12 Tatwamukandila mitima zeitu, tondo inyuwe mwatukandila mitima zeinyu. 13 Umpanga, nkutenda n'inyuwe anga bana bane, mube na makengelo anga bubo butuli namo kumuli, mulimbule mitima zeinyu.
Tamugomie na Bantu Batakatizia
14 Tamwingile mu bitondo na babo batakatizia, b kubuno mugomio mukizi guli gasamba kwisanana nu kuteisanana? Aba mugomio mukizi guli gasamba kyengi nu kapilo? 15 Mugomio mukizi guli gasamba Kristo nu Beliali? Aba mukatizia eli nu mugomio mukizi na muntu utakatizia? 16 Nu mugomio mukizi guli gasamba numba za kukumbamina Kalaga nu nkisi? Kubuno iswe tuli numba za Kalaga uli Mulami, anga bwabwide Kalaga bunee:
“Nkalama gamozi nabo, nu nkatabanga munkatini mwabo,
Nkaba Kalaga wabo nu bo bakaba bantu bane.” c
17 U bubo bwabwide Mukota bunee:
“Tukazi munkatini mwabo nu mulekanukibwe nabo;
Tamwitubye ku kinsania kili nsese;
Nu nne nkamusekela. d
18 Nabe Soinyuwe,
Nu inyuwe mwabe bana bane bamulume nu bamukazi,
U bwabwide Yehowa, Mwiya Mayombo.” e