Lubako Lweitu lwa Mwigulu
5
1 Kubuno twizi buno ndi numba zeitu, u mubili u tukulamaga nago mu kisi zasambulwa anga hema, nti tuli n'ingo numba mwigulu zakitilwe na Kalaga, numba za bindi binsania, zitobakilwe na maboko ma muntu. 2 Kubuno iswe mu zeno numba tukutonga, tukutunda nunse kuvwalikibwa na numba zeitu zikatuka mwigulu, 3 ndi twasila kuvwalikibwa, tatukamoneka mundulu. 4 Kubuno mu zeno numba tukutonga nu tukukutwa nunse, ta kubuno tukutunda kuba mundulu, tondo buno tuvwalikibwe na numba zeitu ziteli za lukuo buno zezo za kukua zimenwe na kalamo. 5 Nu wozo watukitile bubo u Kalaga, watukasile kalingilo ka Muuza. 6 Umpanga bindi binsania tuli na mitima zalinda nu twizi buno nkungu zituli mu mubili wono, nti tuli bulazi na Mukota. 7 Kubuno tukutabanga mu bukatizio, tondo ta kubuno tukumona. 8 Tuli na mitima zalinda, nu tukutunda nunse kutuka mu wono mubili, nu kwikala gamozi na Mukota. 9 Ku bubo, lingo, tukwikokomezia buno tumutananizie ndi tuli mu mubili wono aba ndi tatuli mugo. 10 Kubuno bwatunganana iswe tubansania tumonekeko lwabusio lwa kisumbi kya lusungio kya Kristo; buno na muntu na muntu akaswe lukalilo lwage anga bwabezaga akukita mu mubili, ndi ku bubi aba ndi ku busoga. Kukulumanibwa na Kalaga mu Yesu Kristo.
11 Umpanga kubuno twizi kukua Mukota boba, ububo tukuluta bango bantu ku Kalaga, nu Kalaga etwizi, nu nkulemanina buno nu inyuwe mutwizi. 12 Tatukwikaka lingo tubenyene lwabusio lweinyu, tondo tukumukasa nzila za kwikaka mutuli buno mumenye kwakula babo bakwikaka ku bitondo bya mubili, nu ta ku bitondo bya mutima. 13 Umpanga, ndi menge meitu tameli bulingilingi, nti ku kabamba ka Kalaga nu ndi tuli na menge maswaga nti ku kabamba keinyu. 14 Kubuno lutundo lwa Kristo lukutusindika, kubuno twizi buno ndi umozi akwilide bansania nti bansania bakule. 15 Nu We akwilide bansania buno babo beli balami tabalame ku kabamba kabo bobenyene, tondo ku kabamba ka wozo wabakwilide nu kuyuka kutuka ku bakuzi.
16 Ku bubo, kutukila kano kaluma, tatwizi muntu wampa ku lukita lwa mubili, aba ndi twamenyine Kristo ku lukita lwa mubili, tondo kano kaluma tatumwizi lingo ku lukita luluno. 17 Ububo ndi muntu eli mu Kristo, nti eli kibumbwa kito: bitondo bya kulinga byatingile, nu bitondo binsania bise bito; 18 bibyo binsania bikutukaga ku Kalaga, watukulumanizie nage mu Yesu Kristo, nu We u watukasile mulimo wa kukulumania. 19 Kubuno Kalaga akulumanizie kisi wenyene mu Kristo, ntaganzide bantu bwagi bwabo, nu We atukasile idagi lya bukulumania mutuli.