Isuku lya Mutima mu Bituma bya Bulongo
4
1 Ku bubuno, kukuba tuli na mulimo wono, ku kyombo kya Kalaga anga butwakasilwego, tatukutamba. 2 Tondo twasombile bitondo bya nsoni bikukitwa ku lumbisombiso aba tatukwenda lingo mu misako za bwengelezi nu tatukubigia idagi lya Kalaga. Tondo ku kulolesia bwasibwasi bulili, tukwikasana ku kalenganio ka bantu bansania lwabusio lwa Kalaga. 3 Tondo ndi Musagu Musoga weitu wabisilwe, nti wabisilwe ku babo bakuzimina, 4 kalaga ka kino kisi kazibile bumenyinino bwa babo batakatizia buno tabamone ku kusana kwa kyengi Musagu Musoga wa lutanuno lwa Kristo, uli kisusania kya Kalaga. 5 Tatukusambala musagu weitu iswe tubenyene, tondo Musagu wa Yesu Kristo Mukota u gutukusambalaga, nu tukwimana bakiti beinyu ku kabamba ka Yesu. 6 Kubuno Kalaga wabwide buno, kyengi kisane mu kapilo, u wozo wasanizie kyengi mu mitima zeitu buno asanie nunse kyengi kya bumenyinino bwa lutanuno lwa Kalaga ku meiso ma Kristo. Kalaga Ntakutusiga
7 Tondo tuli n'isuku lilino mu malega m'ibumba, buno magala mamano manene mamoneke buno makutukaga ku Kalaga, tondo ta kutuli. 8 Tukubabazibwa ntungo insania, tondo tatukukindwa; tukuzangibwazangibwa, tondo tatukutambia kilemanizio; 9 Tukusungibwa, tondo Kalaga ntakutusiga; tukulibulagwa gansi, tondo tatukulekanaga. 10 Bindi binsania tukweka lukuo lwa Yesu mu mibili zeitu buno kalamo ka Yesu nuko kalolesibwe mu mibili zeitu. 11 Kubuno iswe bakulama, bindi binsania tukukasanwa nunse buno twitwe ku kabamba ka Yesu buno kalamo ka Yesu nuko kamonekeko mu mibili zeitu za kukua. 12 Ububo lukuo lukukita mulimo munda mweitu, tondo kalamo kakukita mulimo munda mweinyu.
13 Masanzo makutenda bunee: “Nakatizizie, ukinsa natendile!” Nu iswe, mu wozo Muuza umozi wa bukatizio, tukukatizia nu ku bubo ukinsa tukutenda. a 14 kubuno twizi buno wozo wayukizie Mukota Yesu kutuka ku bakuzi akatuyukya nu iswe gamozi na Yesu nu akatwemazia gamozi n'inyu lwabusio lwage. 15 Kubuno bitondo bibyo binsania bikubasa ku kabamba keinyu, buno mponga zeno ndi zitila nunse ku bantu beingi, nti mbogimbogi zitile nunse mambizi meingi ku lutanuno lwa Kalaga.
Kulama mu Bukatizio
16 Ku bubuno ukinsa tatukutamba; aba ndi mubili weitu ukubiga, tondo nti muntu weitu wa munda eli muto busi na busi. 17 Kubuno tubebe tweitu tukeke twa nkungu zeno tukututanuzia lutanuno lunene lutanakuzinda kutinga kilindiko kinsania, 18 kubuno tatukulola bibyo bikumonekako, tondo bibyo bitakumonekako. Kubuno bibyo bikumonekako bikutinga, tondo bibyo bitakumonekako bikulama ku nkungu zitanakuzinda.