Bakiti b'Idagano Ito
3
1 Ndi tukulinga lingo kwikaka tubenyene? Aba ndi tukwiyanina anga bango bantu mikanda za bulongeki kumuli aba mikanda zikutuka kumuli? 2 Inyuwe muli mukanda weitu, wasanzilwe mu mitima zeitu, wamenyinwe nu wasominwe na bantu bansania. 3 Mukumoneka nunse buno muli mukanda wa Kristo, wasanzilwe ta ku bwino, tondo ku Muuza wa Kalaga Mulami, ta gantata ga mbavu za makozi, tondo gantata ga mbavu za mubili ku mitima za bantu.
4 Nu kikino u kilemanizio kituli nakyo lebelebe ku Kalaga mu Kristo. 5 Tatukutenda buno iswe tubenyene tunavwama kukengela buno kitondo kinsania kikutuka kutuli tubenyene, tondo menge meitu makutuka ku Kalaga. 6 Atukasile magala buno tube bakiti b'idagano ito, ta ku isanzo tondo ku Muuza, kubuno isanzo likwitaga, tondo Muuza akukasanaga kalamo.
7 Tondo ndi mulimo wa lukuo wasanzilwe na masanzo gantata ga makozi wavule na lutanuno, aba nu bana ba Israeli tabavwamine kulola kisozi ku malanga ma Musa, ku kabamba ka lutanuno lwa malanga mage nu lulo talwizizizie, 8 ndi mulimo wa Muuza tawitide kuba na lutanuno? 9 Tondo ndi idagano lya lusungio lyabede na lutanuno, nti idagano lya kwisanana lyitide kuba na lutanuno nunse. 10 Kubuno bubuno bwatanwinwe tabwabede na lutanuno lingo ku kabamba ka lutanuno lwagutinga nunse, 11 kubuno ndi lilyo litwigisizie lyabezaga na lutanuno, kasi lilino lya kwikala u lili na lutanuno nunse kutinga.
12 Umpanga ku kuba tuli na kilemanizio kya lukita luluno, ukinsa tukutenda buligo nunse. 13 Nu iswe tatukukita anga Musa wikukide nsulu ku kilungi kyabo buno bana baIsraeli banavwa kumulola kisozi ku kusila kwa lutanuno luteizizizie. 14 Tondo bumenyinino bwabo bwabede bubibu; kubuno aaba nu lelo, mu nkungu ziba kusoma Idagano Ikulu, zezo nsulu zikili ku kilungi kyabo, tazatukile kubuno mu Kristo tugu u muzinatuka. 15 Aaba nu lelo kungwa bakusoma mulembe wa Musa, nsulu nti ziki zakukila mitima zabo. 16 Tondo ndi mitima za bantu zagalukila ku Mukota, zezo nsulu nti zatukibwa. 17 Umpanga Mukota u wozo Muuza; nu kuko kuli Muuza wa Mukota, nti u kuko kuli bukandulwa. 18 Tondo beiswe bansania batakukilwa na nsulu ku meiso, tukusania lutanuno lwa Mukota Kalaga, anga bukusania kiyolo, kutuka ku lutanuno aaba nu kwika ku lutanuno anga bulukutukaga ku Mukota uli Muuza.