Yona enda ku Ninawe
3
1 Iyuki lya Yehowa lyavule ku Yona limbizi lya mabili bunee: 2 “Yuka, enda ku mwino munene wa Ninawe nu kugusambalila bubo bunakubwide.” 3 Yona anzile iyuki lya Yehowa nu endile ku Ninawe. Ninawe wabezaga mwino munene nunse, wakuka lugendo lwa bindi bisatu. 4 Yona alingile kwingila mu mwino lugendo lwa kindi kimozi nu alalukaga bunee: “Kusila kwa bindi makumi manazi nti Ninawe azikibwe.” 5 Bantu ba Ninawe bakatizizie Kalaga; nu beikakizizie kwikanda idia, nu bavwalile makunino, bansania, banene nu bakeke.
6 Gongule mukota wa Ninawe ku wozo musagu azanzukile ga kisumbi kyage, nu atukizie nsulu zage nu kuvwala ikunino nu eikede mu lwito. 7 Nu asingile musagu mu Ninawe bunee: “Ku ikakizio lya mukota nu bakambi bage: Takube muntu aba nyama aba ngombe aba mpene kusonda kena, aba kulia idia, aba kunua mazi; 8 tondo bantu nu nyama bavwale makunino nu kulila ku Kalaga buno muntu na muntu agaluke kutuka ku nzila zage mbi, kutuka ku bukali buli mu maboko mage. 9 Nazi wizi, embe Kalaga anagaluka nu kwisungula ku bongoa bwage buno bubote, buno tatuzikibwe?”
10 Gamonine Kalaga ku makitilo mabo buno bagaluka kutuka ku nzila zabo mbi, eiyanizie ku lusungio lwatendile buno abakitile, nu ntalukitile.