Lusungio lwa baIsraeli.
5
1 Akutenda lingo bunee: “Ee inyuwe basankoga, ungwililazi bitondo bibino! Ee baIsraeli, ungwililazi! Inyuwe ba numba za mukota, tegazi matuzi! Kubuno lusungio luli kumuli: kubuno mwabede itega mu Misipa, nu bukila bwategilwe mu Tabori. 2 Nu banani bakolokile mu mizinga za bwagi bunene, tondo nabasungie bobansania. 3 Nizi Efuraimu; nu Israeli ntambisamine, kubuno kano kaluma wakitile butazi, ee Efuraimu, nu Israeli eibigizie na nsese. 4 Tabakuvwama kusubya ku Kalaga wabo ku kabamba ka makitilo mabo; nu mitima za butazi zili mubeli, nu tabeizi Yehowa. 5 Lwikotio lwa baIsraeli lukulolesia kabenga kabo; ku kabamba kakano baIsraeli nu baEfuraimu bakakikitanwa mu bwagi bwabo, nu Yuda akakikitanwa gamozi nabo. 6 Gabakwenda na mikoko nu ngombe zabo za tuyulo kulonda Yehowa tabakumumonako, kubuno eidekanukizie nabo. 7 Bakitide Yehowa mu bwengelezi, nu babutile bana ba butazi. Kano kaluma mbalo za mwezi zikabeita, bo gamozi na masoa mabo.
8 Idazi mpanda mu Gibea, nu monze mu Rama, nu lalukazi ku Beti-Aweni bunee: ‘Ee Benjamina, widange kumbusa kobe.’ 9 Efuraimu akazikibwa ku busi bwa lusungio; nkukubula buligo munkatini mwa bikanga bya Israeli.
10 Bangati ba Yuda beli anga babo bakutikya tulolesio twa myaga; nkabalangania bongoa kubeli anga mwiyalo. 11 Efuraimu asungizibwe nu kubabazibwa bubibu mu lusungio, kubuno eitabizizie kuyanga bya buliabulia. 12 Ububo nkaba anga kagembe mu numba za Efuraimu, nu anga kyabola ku numba za Yuda.
13 Gamonine Efuraimu ku lusambo lwage nu gamonine Yuda ku kyulu kyage, Efuraimu endile ku Asuria nu asingile ku mukota munene kukasibwa nage; tondo wozo ntanavwama kubonia, aba ntanonia byulu byeinyu. 14 Kubuno nkaba anga kimbwe ku baEfuraimu, nu anga kyana kya kimbwe ku baYuda. Nne nkabata byindi byindi nu kwiyendela. Nkabeeka nu takuli muntu aba umozi ukabonia. 15 Nkenda nu kusubya kwane lingo aaba nu gabakeigonga bwagi bwabo nu kulonda kilungi kyane; mu mbabazio zabo bakandonda nunse.”