Myango za Yehowa ku bantu ba Israeli.
4
1 Inyuwe baIsraeli, ungwililazi iyuki lya Yehowa, kubuno Yehowa eli na myango na babo bakwikala mu kisi kyage kutenda bunee: “Takuli bulili aba kyombo aba kumenya Kalaga mu kisi. 2 Kuli tugu kuswilila nu bwengelezi nu bwiti nu kwiba nu butazi; nu mikila zakubukile zikulemba mikila zakubukile. 3 Ububo kisi kiyala na kabebe nu bantu bansania beli mukyo bonda gamozi na nyama za kisi, gamozi na tuzoni twa mpelela, nu byena bya mu kitatenge byazika. 4 Tondo muntu ntasongele munyage aba kumusungula, kubuno bantu bobe beli anga babo bakulwana na sankoga. 5 Nu wakikitanwe mu musi nu mu kindi, nu mulengania akikitanwe gamozi nobe mu kindi, nu nkeita nyoko. 6 Bantu bane bazika ku kabamba ka kusomba menge. Kubuno wasombile menge, nkumusomba anga basankoga bane; kubuno wibilide mulembe wa Kalaga, nkwibilila bana bobe. 7 Anga bwitide basankoga, ububo bubanagide. Nagalukye lutanuno lwabo kuba nsoni zabo.
8 Bakwidisia bwagi bwa bantu bane nu kwibogiabogia mu bwagi bwabo. 9 Tondo bukaba: Anga buli bantu, u bubo bwabe basankoga. Nabasungie bibombo bibyo bibili gamozi ku misako zabo nu kusubya makitilo mabo kubeli. 10 Bakalia tondo tabakembuka; bakakita butazi tondo tabakitilila, kubuno basigile Yehowa.
11 Butazi nu maku m'ituba bikuzimizia bumenyinino. 12 Bantu bane bakusega lwango ku nkisi zabo za miti, nu kati kabo k'idumedume kakubabukila, kubuno mutima wa butazi wabazimizia nu basiga Kalaga wabo mu kukita butazi. 13 Bakukasana tuyulo gantata nkangamo za miduko; bakugisia bulago gantata tutulu gansina muti wa mwalo nu wa mulubna nu wa muvinje kubuno zili na mpololo nsoga.
Ububo bakinga beinyu bakukita butazi nu basongobwa beinyu beli bitazi. 14 Nsikasungia bakinga beinyu gabakukita butazi aba basongobwa beinyu nkungu zibeli bitazi, kubuno bamulume nubo bakwenda gamozi na bakikulu bitazi, nu bakasana tuyulo na bitazi bya numba za kukumbamina; bantu beli bikongolo bikazika.
15 Ee Israeli, aba mwakita butazi, Yuda ntage gamozi nobe. Tamwende ku Gilgali aba tamubakame ku Beli-Aweni; a nu tamulumbile bunee: ‘Anga bukulama Yehowa.’ 16 Kubuno baIsraeli beli banani anga kyana kya ngombe. Kano kaluma Yehowa abalisie anga kyana kya mukoko mu kiziki kya kulisizia ga bituganwa mu kibitabita. 17 Efuraimu agomia na nkisi; musigazi! 18 Gabakusila kunua maku mabo bakwikasana ku butazi kankanka, nu bangati babo bakutunda nsoni za tuyulo twabo. 19 Lumpumpu lwabakukila na byupi byage, nu bakakua na nsoni ku kabamba ka tuyulo twabo.”