Kubegania kwa kisi kya Israeli
45
1 Nu atendile lingo bunee: “Nkungu zimwabeganie kisi kukwesa mbale munkatini mwa bikanga buno kibe bwiyani, mukase kyindi kyasililila ku Yehowa; bulazi bwakyo bwabe mabusu tununu makumi mabili nu tutano (25.000) nu bungulu tununu ikumi (10.000); a kiziki kikyo kinsania kyabe kyasililila. 2 Munkatini mwa kiziki kikyo, kukaba kiziki kyasililila; bulazi nu bungulu mabusu nkama itano nu mpapa za lulenge na lulenge kumbuga zabe mpapa za mabusu makumi matano. 3 Ububo mu kiziki kikyo mukalindika bulazi bwa mabusu tununu makumi mabili nu tutano (25.000) nu bungulu tununu ikumi (10.000), nu kikyo kikaba Kyasililila Nunse. 4 Nu kiziki kya numba zasililila kyabe kya basankoga bakiti ku kiziki kyasililila bakakunda Yehowa kumukitila; nu kyabe mu numba zabo, kiziki kyasililila mu numba za Kalaga. 5 Nu kiziki kikyo kya mabusu tununu makumi mabili nu tutano (25.000) ku bulazi nu tununu ikumi (10.000) ku bungulu kyakasanwe ku baLawi bakukita ku numba za kukumbamina, kuba miino zabo za kwikala muzo. 6 Nu ku ntiko za mwino, mukasane kiziki kya bungulu mabusu tununu tutano nu bulazi mabusu tununu makumi mabili nu tutano ku ntungo za kiziki kyasililila. Kikyo kikaba ku numba insania za Israeli.
7 Lulenge lumozi lwa kiziki kya mwangati lwabe na mwaga mu mwaga kiziki kyasililila nu wa mwino ku lulenge lwa kuntata. Lungo lulenge lwa kiziki kyage lwabe na mwaga mu wozo wa kiziki kyasililila nu wa mwino ku lulenge lwa kunsi. Myaga zage za ku ntonga za kiziki kyage zikaba mu myaga za bikanga bya baIsraeli ku lulenge lwa kuntata nu lwa kunsi. 8 Akaba na kiziki kyage mu kisi kya Israeli.
Nu bakota ba Israeli tabakasungia bantu bane lingo tondo bakabegania kisi anga geigezye bikanga byabo. 9 Ee inyuwe bakota ba Israeli, mamano meli moki ma Yehowa, Mwiya Bwangato Bunsania, bunee: ‘Bwakuka kumuli kutikya bulazi n'inyu bukali nu bunyagi; atulazi na bulili, nu tikyazi mitulo zeinyu ku bantu bane.’ Yehowa, Mwiya Bwangato Bunsania, atenda bunee: 10 ‘Mube na bilindiko byakuka, shekeli nu efa nu bati zisanana zinsania. 11 Efa b nu bati c zibe bumozi buno bati zibe kyindi kimozi ky'ikumi kya homeri, nu efa zibe kyindi kimozi ky'ikumi kya homeri; nu homeri d u zabe kilindiko. 12 Nu shekeli emozi e zibe gera makumi mabili, nu mina emozi zabe shekeli makumi mutuba. f
Tuyulo nu bisagulo
13 Wono guli mulembe wa bya nkula byeinyu: Tikyazi kyindi kimozi kya mutuba kya ngano ku homeri umozi, nu kyindi kimozi kya mutuba kya efa ku homeri emozi za mumpunge. 14 Efa nu bati bilingimane. Bati zibe kyindi kimozi ky'ikumi kya homeri, nu efa kyindi kimozi ky'ikumi kya homeri nu bilindiko bibyo binsania bibe anga bilindiko bya homeri. 15 Mutikye kyana kimozi kya mukoko mu lusumba na lusumba lwa nkama ibili zili mu biziki byanaga bya kulisizia ga mikoko mu kikanga na kikanga kya Israeli, nu kayulo ka bunga nu kayulo ka kugisibwa, nu kayulo ka bubobelelo kukita bukulumania bwa bantu.’ Yehowa, Mwiya Bwangato Bunsania, atenda bunee: 16 ‘Bantu bansania ba kisi bakasane kayulo kako ku mukota wa Israeli. 17 Nu mukota wa kisi atunganana kukasana bibyo bya tuyulo twa kugisibwa twa bunga nu twa kunua ku bisagulo, nu mu mbalo za mwezi, nu busi bwa Sabato, bisagulo binsania bya numba za baIsraeli. Atunganana kukasana tuyulo twa bwagi, nu twa bunga, nu twa kugisibwa, nu twa bubobelelo, kukitia malonga ku numba za Israeli.’
18 Yehowa, Mwiya Bwangato Bunsania, atenda bunee: ‘Busi butangi bwa mwezi mutangi, mwatole kyana kya ngombe za mulume kiteli na kabalibango nu mwengie kiziki kyasililila. 19 Nu sankoga atole mikila za kayulo ka bwagi nu kuzitila ku miima za nibi za numba, ku tupindapinda tunazi, ku lulokezio lwa kayulo nu ku miima za lwibi wa mulungu wa munda. 20 Nu mwakite bubuno buno ku busi bwa bindi mutubakamo bya mwezi, ku wozo ukusa mu nzila aba ukukita anga kikongolo, bubo u bumukitile numba za kukumbamina.
21 Ku mwezi wa kulinga ku busi bwa bindi ikumi nu binazi, mukite Kisagulo ky'Isuluko, bansania bakalia kampampa keteli na mugago bindi mutubakamo. 22 Nu ku busi bubo mukota akasane mulume wa ngombe ku kabamba ka bwagi bwage ku bantu bansania. 23 Mu bindi mutubakamo bya kisagulo akakasa Yehowa kayulo ka kugisia, balume ba ngombe nu bilimba bya mikoko mutubakamo beteli na kabalibango na busi bwa bindi mutubakamo, nu bilimba bya mpene na busi na busi ku kayulo ka bwagi. 24 Akakasana kayulo ka bunga, efa emozi ku mulume umozi wa ngombe nu efa emozi ku kilimba kya mukoko nu hini emozi za makiti ku efa emozi.
25 Mu busi bwa bindi ikumi nu bitano bya mwezi wa mutubakamo, akakasana bibino ku kisagulo; ku bindi bibino mutubakamo; ku tuyulo twa bwagi, nu twa bunga nu gamozi na makiti.’”