Bitondo bya Basankoga
44
1 Ansubizie ku nzila za lwibi lwa kumbuga kwa kiziki kyasililila; lwalolela kuntata nu lwigalwa. 2 Yehowa antendile bunee: “Lwibi luluno lwigalwe nu talwigulwe. Ta umozi wingile kulo, kubuno Yehowa, Kalaga wa Israeli eingide kulo, ububo lwigalwe. 3 Mwangati wenyene tugu unavwama kulia lwabusio lwa Yehowa, eingile nu kubasa mu lusu lwa lwibi.” 4 Ububo andolesizie ku lwibi lwalolela ku lulenge lwa kwikazi lwabusio lwa numba za kukumbamina, nu namonine lutanuno lwa Yehowa lwizazia numba zage nu nagwede bukukama.
5 Yehowa ambwide bunee: “Uwe mwana wa muntu, lola busoga nu ungwilila busoga ku binsania binakubule ku makakizio ma kulongeka numba za kukumbamina za Yehowa, nu milembe insania zazo. Lola miingilo za numba busoga nu mbasilo insania za kiziki kyasililila. 6 Ukatenda baguni ba numba za Israeli bunee: ‘Yehowa, Mwiya Bwangato Bunsania, akutenda bunee: “Inyuwe numba za Israeli mwitide kukita bitondo byeinyu binsania bya nsese. 7 Kubuno mwingizizie bageni batamonesibwa ku mitima nu ku mibili buno babenge numba zane zasililila, gamwakasenne idia kundi, manona nu mikila; nu mwitile idagano lyane na bitondo byeinyu binsania bya nsese. 8 Nu tamwakitile mulimo wa bulangi bwa bintu byane byasililila tondo mwagukasile ku bango kunkitila mu kiziki kyeinyu.”
9 Ububo Yehowa, Mwiya Bwangato Bunsania, akutenda bunee: “Takube mugeni umozi utamonesibwa ku mutima aba ku mubili kwingila mu numba zane zasililila aba mugeni ukwikala munkatini mwa Israeli. 10 Tondo babo baLawi bendile bulazi na nne gendile baIsraeli kukumbamina nkisi zabo; bakakata lusungio lwa bwagi bwabo. 11 Bakaba bakiti bane ku numba zane zasililila. Bakalanga nibi za numba za kukumbamina nu kukita mulimo muzo. Bakasesa bisansa bya kugisia nu bya bantu nu bakakitila bantu. 12 Kubuno babakitide lwabusio lwa nkisi zabo, babede anga ikozi lya bwagi kukikitania baIsraeli ku bwagi bwabo. Bubo u bukutenda Yehowa, Mwiya Bwangato Bunsania; nabalumbilide na kusakika kuboko kwane, buno basungibwe ku bwagi bwabo. 13 Tabakakunda lingo kukita mulimo wa busankoga bwane aba kwitubya ku bintu byane binsania byasililila. Bakakua na nsoni ku bitondo byabo bya nsese. 14 Nkababika bakiti ba mulimo unsania wa numba za kukumbamina, nu binsania bikakitwa muzo.
15 Tondo basankoga baLawi bana ba Zadoki, bankitide busoga mu numba zane zasililila, ku nkungu zansigile baIsraeli. Babo bakankunda nu kunkitila. Bakemana lwabusio lwane kundusizia manona nu mikila, nne Yehowa, Mwiya Bwangato Bunsania, u gukutenda bubo. 16 Bakeingila mu numba zane zasililila nu bakakunda kasenga kane kunkitila milimo zane insania. 17 Nu gabakeingila mu nibi za mulungu wa munda, bakavwala nsulu za kitani, tabakavwala nsulu za myoza za mukoko kungwa bakukita ga nibi za munda nu munda mwa kiziki kyane kyasililila. 18 Babe na nkumbu za kitani ku matoe mabo, nu matekele ma kitani ku bibunda, nu tabavwale nsulu za kubabasia kilungu. 19 Nu nkungu zibabase kumbuga nti batikya nsulu zabo zibakitaga nazo nu kuzibika mu masio masililila, nu kuvwala engo nsulu buno tazimonekeko na bantu.
20 Aba tababege nzwili za matoe mabo aba kuzisiga zikule, tondo bazikegie. 21 Nu takuli sankoga wanue maku nkungu za kwingila mu mulungu wa munda. 22 Basankoga tabasonge misigala aba watikibwa, tondo basonge bikumi by'ibuta lya numba za Israeli, aba misigala za basankoga. 23 Nubo beigisie bantu bane kwengukana kwa bintu byasililila nu bintu bitasililila, nu kumenya buli bintu bya nsese nu byenga.
24 Mu matenda, babe ngatu, nu batule anga buli makakizio mane. Nu bakalanga milembe nu makakizio mane ma bisagulo byane binabikile, nu kwanza busi bwa Sabato zane. 25 Sankoga ntabase bwigi na kitumba kya muntu buno nteibigie tondo ku kabamba k'isi, ka nina, ka mwana musikila aba mukinga, ka mubuto, ka mubitu wage utasongwa aneibigia. 26 Ndi asila kwengibwa nti aganzilwa bindi mutuba. 27 Nu busi bwakeingila mu kiziki kyasililila, ku mulungu wa munda, akalusia kisansa kya bwagi bwage.”
Yehowa, Mwiya Bwangato Bunsania, atenda bunee: 28 “Tabakeiyana munkatini mwa Israeli; nne nili bwiyani bwabo, tamukabakasa kiziki mu kisi kya baIsraeli, Nne nili bwiyani bwabo. 29 Bakalia kayulo ka bunga nu kisansa kya bwagi nu kya kusa, nu byasililila binsania munkatini mwa baIsraeli byabe byabo. 30 Nkula za biguma bya nkita insania nu nkaso za nkita insania zikulusibwa ku Yehowa bikaba bya basankoga. Lingo mukakasa basankoga bunga bweinyu butangi buno mponga za Yehowa zitalikilwe ku numba zeinyu. 31 Basankoga tabakalia kinsania kidekanina aba kyakua na engo nyama ndi kili kazoni aba nyama.”’”