Bungo bulengania bwa numba za kukumbamina Kalaga
42
1 Anekile ku mulungu wa kumbuga walolela ku lulenge lwa kwikazi, ku masio malolela ku mulungu nu ku numba zalolela ku lulenge lwa kwikazi. 2 Ntungo za mulungu wabezaga na lwibi lwalolela ku lulenge lwa kwikazi, wabezaga na mabusu lukama, bungulu bwa mulungu bwabezaga mabusu makumi matano. 3 Kabelabela ka tusatu ka numba za byindo kalolela ku mulungu wa numba kabezaga mabusu makumi mabili nu ku mulungu wa kumbuga. 4 Nu lwabusio lwa masio kwabezaga nzila zili na bungulu bwa mabusu ikumi, nu bulazi bwa mabusu lukama. Nu nibi zamo zalolela ku lulenge lwa kwikazi. 5 Nu masio ma gantata mabezaga makeke kutinga ma gansi kubuno kabelabela kamo kabezaga kanene kutinga tungo twabezaga kunsi. 6 Mamo masio mabezaga ma mpilili isatu nu tamabezaga na mango anga mango ma mulungu. Ububo mamo ma kwigulu mabezaga makega nunse kutinga mamo ma gansi aba ma munkatini. 7 Bulazi bwa kitutu kya kumbuga bwabezaga mabusu makumi matano; kyabezaga ku ntungo kwa masio nu kyalolela ku mulungu wa masio. 8 Kubuno bulazi bwa masio bwabezaga ku mulungu wa kumbuga bwabezaga mabusu makumi matano, nu bulazi bwa mamo malolela ku numba za kukumbamina bwabezaga mabusu lukama. 9 Kunsi kwa masio mamo kwabezaga mwingilo walolela ku lulenge lwa kuntata. U wingililaga mu bantu kutuka ga mulungu wa kumbuga. 10 Kwabezaga masio ku bungulu bwa kitutu kya lulenge lwa kwidume kyalolela ku kiziki kyalekanukibwa na kingo nu kyalolela ku numba. 11 Nu nzila lwabusio lwamo zabezaga zasusania nzila za masio mabezaga ku lulenge lwa kwikazi. Bulazi nu bungulu bwabezaga bumozi na mwingilo, nu nibi. 12 Miingilo za masio mamo zabezaga bumozi na zezo za masio malolela ku lulenge lwa kwidume. Kulinga kwa nzila na nzila kwabezaga mwingilo umozi lwabusio lwa kitutu kyalolela kuntata nu kwabezaga nzila za kwingila.
13 Ububo ambwide bunee: “Masio ma ku lulenge lwa kwikazi, nu mamo ma ku lulenge lwa kwidume malolela ku kiziki kyalekanukibwa na kingo meli masililila, kiziki kyalide basankoga beli bwigi na Yehowa idia lyasililila nunse. Gago babike bintu byasililila nunse nu kayulo ka katati; kubuno kiziki kikyo kili kyasililila. 14 Kungwa basankoga beingila tabanabasa ku mulungu wa kumbuga kutuka ku Kiziki Kyasililila na nsulu zabo zibakukitaga nazo mulimo, kubuno zili zasililila. Beikungule nsulu zezo nu kuvwala engo nu nti babase kuli bantu.”
15 Gaasilile kulindika numba za munda, ambasizie mu nzila za mwingilo walolela ku lulenge lwa kuntata, alindikile ndenge insania za kiziki kikyo. 16 Alindikile ku lulenge lwa kuntata na kati ka kulindika nu lwabezaga tuti nkama itano. 17 Nu alindikile ku lulenge lwa kwikazi na kati ka kulindika nu lwabezaga nkama itano. 18 Nu alindikile ku lulenge lwa kwidume tuti nkama itano. 19 Agalukile ku lulenge lwa kunsi nu alindikile tuti nkama itano na kati ka kulindika. 20 Alindikile ku ndenge inazi. Bulazi bwakyo bwabezaga nkama itano kulekanukya gasamba kiziki kyasililila nu kiziki kya bantu.