41
1 Ansondelezizie ku numba za kukumbamina nu alindikile miima za ntungo ibili, bungulu bwabezaga mabusu mutuba ku lulenge na lulenge. 2 Nu bungulu bwa mwingilo bwabezaga mabusu ikumi, nu ku ntungo na ntungo kwabezaga mabusu matano. Alindikile bulazi bwa numba mabusu makumi manazi, nu bungulu mabusu makumi mabili. 3 Eingide mu numba nu alindikile miima ibili za lwibi, mabusu mabili nu bulazi bwa mwingilo mabusu mutuba, nu bungulu bwazo mabusu mutubakamo. 4 Nu alindikile kingo kiziki, bulazi mabusu makumi mabili nu bungulu mabusu makumi mabili. Nu antendile bunee: “Kiziki kikino kili Kiziki Kyasililila Nunse.”
5 Ububo alindikile kitutu kya numba, mabusu mutuba; nu bungulu bwa busio na busio bwa ntungo mabusu manazi, ndenge insania za numba. 6 Nu kwabezaga milindi isatu za masio makumi masatu matalikana. Mamo masio mabezaga malindibwa na kitutu kyamo kyabezaga munda, nu kutakandwa na kitutu kya numba za kukumbamina. 7 Nu bungulu bwa busio bwa kuntata bwatingile bwa kunsi kubuno numba za kukumbamina zendile zatanukatanuka ku ndenge insania zazo.
8 Nu namonine lingo buno numba zabezaga zatimbwa na kabelabela kanene nu mango kunsi kwako, mabezaga na bulazi bwa mabusu mutuba nu makasa mutuba. 9 Bungulu bwa kitutu kya kumbuga kyabezaga kyatimba kabelabela ka masio bwabezaga mabusu matano nu kiziki kikyo kyabezaga kya numba za kukumbamina. 10 Kiziki gasamba masio mabezaga ku ndenge za numba za kukumbamina nu masio ma kumbuga kyabezaga na bungulu bwa mabusu makumi mabili ku ndenge insania za numba. 11 Nu nibi za masio zalolela ku kiziki kikino, lumozi lwalolela ku lulenge lwa kwikazi nu lungo ku lwa kwidume. Nu kiziki kyasigala kyabezaga na mabusu matano ku ntungo insania.
12 Lwabusio lwa mulungu wa numba za kukumbamina Kalaga ku lulenge lwa kunsi kwabezaga numba. Bungulu bwazo bwabezaga mabusu makumi mutubakamo nu bungulu bwa kitutu kya numba bwabezaga mabusu matano nu bulazi mabusu makumi mubula. 13 Nu alindikile numba za Kalaga bulazi bwazo bwabezaga mabusu lukama lumozi, nu mulungu n'ingo numba nu bitutu byabezaga na bulazi bwa mabusu lukama lumozi. 14 Bungulu bwa mulungu wa numba ku lulenge lwa kuntata, gamozi na numba, bwabezaga mabusu lukama. 15 Nu alindikile bulazi bwa numba zalolela ku lulenge lwa kunsi kwa mulungu gamozi na bitutu byago, byabezaga mabusu lukama.
Busio Bwasililila bwa numba za Kalaga nu bitutu bya Busio Bwasililila bwa numba za Kalaga, nu Busio Bwasililila nu kabelabela byakukidwe na mbavu. 16 Bitiko bya miima za madilisa nu masio mansania byakukidwe na mbavu kutukila gansi aaba nu ku itala lya numba, 17 nu kiziki kya gantata ga lwibi lwa munda nu kumbuga kwa numba nu bitutu binsania, kumbuga nu munda, anga bwalindikilwe binsania. 18 Nu numba zalebezibwe na bisusania bya makerubi nu bya miti za bibila, muti umozi wabezaga gasamba makerubi mabili nu na kerubi na kerubi na kabezaga na malanga mabili. 19 Nu malanga ma muntu mabezaga malolela ku lulenge lumozi lwa kibila, nu malanga ma kyana kya kimbwe malolela ku ungo muti wa kibila guli ku lungo lulenge. 20 Kutukila gansi aaba kuntata kwa lwibi makerubi nu miti za bibila byakitilwe ku bitutu bya kabelabela.
21 Nu ndenge insania za miima za nibi za kabelabela bumozi. Lwabusio lwa Kiziki Kyasililila mwima umozi wabezaga bumozi na ungo. 22 Kasenga ka kayulo kabezaga ka miti, kusakama kwako kwabezaga mabusu masatu nu bulazi mabusu mabili. Ku ntonga nu ku ntungo kunsi kwako kwabezaga mbavu: Ambwide bunee: “Kasenga kakano keli lwabusio lwa Yehowa.”
23 Miingilo za Busio Bwasililila nu Busio Bwasililila Nunse zabezaga na nibi ibili. 24 Na mwingilo na wabezaga na nibi ibili nu mbavu ibili ku lwibi na lwibi. 25 Nibi za numba za Kalaga zalebezibwe na bisusania bya makerubi nu bya miti za bibila anga bwabezaga ku bitutu. Kuntata kwa kabelabela kwalebezibwe na lubavu kunsania. 26 Nu madilisa meli na mbavu nkeke za nkita na nkita mabezaga ku ntungo ibili za kabelabela. Nu ku lulenge lwa madilisa kwabezaga bisusania bya miti za bibila.