Bulengania bwa numba za kukumbamina Kalaga
40
1 Ku mwaka wa makumi mabili nu itano wa bukobe bweitu, kulinga kwa mwaka, bindi ikumi bya mwezi, ku mwaka w'ikumi nu inazi a kumbusa kwa kukindwa kwa mwino, ku busi bubo, kuboko kwa Yehowa kwabezaga kundi. 2 Ku tulolesio twa Kalaga anekile ku kisi kya Israeli, nu ambikile gantata mwiduko mulazi. Gago gabezaga kisusania kya mwino lwabusio lwane. 3 Ambikile kuko, nu namonine ku muntu wamulume wasusania nsubi; abezaga emana ga mwingilo na musinge nu kilindiko mu kuboko kwage. 4 Nu wozo muntu ambwide bunee: “Uwe mwana wa muntu, lola na meiso mobe nu ungwa na matuzi mobe, nu bika mutima wobe ku binsania biwamone ko, sambalila numba za Israeli.”
5 Nu kwabezaga kitutu kyatimba numba za kukumbamina, nu wozo muntu abezaga na kati kakuka mabusu malazi mutuba, b (n'ibusu idazi na lyakukile ibusu lyigi gamozi n'ikasa limozi) ububo alindikile bungulu bwa kitutu kati kamozi nu kusakama kwa kitutu kati kamozi.
6 Ububo abasile ku lwibi lwalolela kuntata, abakamine ku kyindo nu alindikile kitiko kya bungulu bwakyo kati kamozi nu kingo kya bibili kango kati kamozi. 7 Nu masio mansania mabezaga na bulazi bwa kati kamozi nu bungulu kati kamozi. Nu mpapa gasamba busio na busio zabezaga mabusu matano, kitiko kya lwibi lwa kabelabela kyabezaga kati kamozi. 8 Alindikile ku lusu lwa lwibi lwalolela ku numba za kukumbamina. 9 Lwabezaga na mabusu kinana ku bulazi, nu mango malo mabezaga na bungulu bwa mabusu mabili. Lusu lwalolelaga ku numba.
10 Nu masio ma balangi ba lwibi lwalolela kuntata mabezaga masatu ku lulenge na lulenge. Nu bunene bwa mamo masatu bwabezaga bumozi, nu bunene bwa mango bwabezaga bumozi. 11 Alindikile bungulu bwa lwibi, mabusu ikumi nu bulazi bwa lwibi mabusu ikumi nu masatu. 12 Lwabusio lwa masio ma balangi kwabezaga kitutu kya bungulu bw'ibusu limozi. Nu masio ma balangi mabezaga mutuba ku lulenge na lulenge.
13 Nu muntu alindikile lwibi lwabezaga gasamba masio ma balangi ku lulenge na lulenge. Bunene bwalo gasamba lwibi lwa busio bwa lulenge lumozi nu lulo lwa lungo lulenge bwabezaga mabusu makumi mabili nu matano. 14 Nu alindikile lusu lwa lwibi mabusu makumi mabili nu lusu lwabezaga lwatimbwa na mango ma mabusu makumi mutuba. 15 Nu gasamba lusu lwa kumbusa kwa lwibi na lwa munda gabezaga mabusu matano. 16 Nu kwabezaga madilisa malolela ku masio ma balangi nu ku mango ma nusu za lwibi. Nu munda kwabezaga mango madilisa, nu mango ma lusu mabezaga malebibwa na bisusania bya bibila.
17 Nu masio makumi masatu mabezaga matimba mpapa zezo. 18 Nu mpapa zabezaga ku ntungo na ntungo za nibi nu bungulu nu bulazi bwabezaga bumozi na zezo zabezaga ku mpapa za kunsi. 19 Nu alindikile mpapa gasamba mikolo ibili mabusu lukama ku lulenge lwa kuntata nu ku lulo lwa kwikazi. Alindikile bulazi nu bungulu bwalo.
20 Nu lwibi lwa gambuga lwalolela ku lulenge lwa kwikazi alulindikile bungulu nu bulazi. 21 Lwabezaga na masio masatu ma balangi; mabezaga ku lulenge na lulenge. Nu mango nu nusu byalindikilwe bumozi anga lwibi lutangi, bulazi bwalo bwabezaga mabusu makumi matano, nu bungulu mabusu makumi mabili nu matano. 22 Nu madilisa, nusu nu mango mabili mabezaga na bunene bumozi, anga lwibi lwa lulenge lwa kuntata. Kubasa kulo muntu anabakama ku kyindo kya masomoneno mutubakamo; nu nusu zabezaga lwabusio lwakyo. 23 Nu mpapa za munda zabezaga na lwibi lwalolela ku lulenge lwa kwikazi nu lulo lwa kuntata. Alindikile kutukila lwibi lutangi nu kubasa ku lwibi lw'ibili mabusu lukama lumozi.
24 Ansondelezizie ku lulenge lwa kwidume nu kwabezaga lwibi lwalolela ku lulenge lwa kwidume. Alindikile mango nu nusu bumozi anga bwalindikile bingo. 25 Nu lwibi nu nusu byabezaga na madilisa meli bumozi na mango. Bulazi bwamo bwabezaga mabusu matano nu bungulu mabusu makumi mabili nu matano. 26 Nu kwabezaga kyindo kya masomoneno mutubakamo kya kubakama gakyo nu nusu zalo zabezaga lwabusio. Kwabezaga iyango lulenge na lulenge lyalebibwa na bisusania bya bibila. 27 Nu mpapa za munda zabezaga na lwibi lwalolela ku lulenge lwa kwidume nu alindikile gasamba lwibi lutangi na lwibi lwa kwidume mabusu lukama.
28 Nu asondelezizie ku mpapa za munda ku lwibi lwalolela ku lulenge lwa kwidume nu alindikile lwibi lulo bumozi n'ingo. 29 Nu masio ma balangi nu mango ma ku ntungo nu nusu, abilindikile bumozi. Nu lwibi nu nusu zalo zabezaga na madilisa kunsania. Bulazi bwazo bwabezaga mabusu makumi matano nu bungulu mabusu makumi mabili nu matano. 30 Nu kwabezaga nusu ku ntungo insania, bulazi bwazo bwabezaga mabusu makumi mabili nu matano nu bungulu mabusu matano. 31 Nusu zabezaga zalolela ku mpapa za kumbuga nu mango ma ku ntungo na ntungo mabezaga malebibwa na bisusania bya bibila, kyindo kyabezaga na masomoneno kinana.
32 Ansondelezizie ku mpapa za munda ku lulenge lwa kuntata, nu alindikile lwibi bumozi n'ingo. 33 Nu masio ma balangi, mango mazo abilindikile bumozi. Nu lwibi nu nusu zabo zabezaga na madilisa kunsania. Bulazi bwalo bwabezaga mabusu makumi matano nu bungulu bwalo mabusu makumi mabili nu matano. 34 Nusu zalo zalolela ku mpapa kumbuga nu mango ma ntungo na ntungo malebibwa na bisusania bya bibila. Kyindo kyabezaga na masomoneno kinana.
35 Nu ansondelezizie ku lwibi lwa ku lulenge lwa kwikazi nu alulindikile bumozi na ingo. 36 Bunene bwa masio ma balangi, mango nu nusu nu madilisa kunsania bwabezaga bumozi anga bingo. Bulazi bwa lwibi bwabezaga mabusu makumi matano nu bungulu mabusu makumi mabili nu matano. 37 Ku mango ma ntungo na ntungo mabezaga malolela ku mpapa za kumbuga nu malebibwa na bisusania bya bibila nu kyindo kyabezaga na masomoneno kinana.
38 Nu busio nu nibi zabezaga bwigi na mango ma ntungo na ntungo za nibi. Gago basugile kayulo ka kugisia. 39 Mu nusu zezo ibili ku ntungo za mwingilo mwabezaga tusenga tubili ku lusu na lusu. Ga kako kasenga basesile kayulo ka bwagi nu kayulo ka mibi. 40 Nu kumbuga kwa mwingilo walolela ku lulenge lwa kwikazi kwabezaga tusenga tubili; nu ku lungo lulenge lwa lusu kwabezaga tungo tusenga tubili. 41 Tusenga tunazi twabezaga munda mwa mwingilo nu tusenga tunazi kumbuga kwa mwingilo; twabezaga twa kusesela ga bisansa. 42 Nu kwabezaga tusenga tunazi twa makozi mabazwa twa kayulo ka kugisia. Bulazi bwato, ibusu nu kyindi, nu bungulu ibusu nu kyindi, nu musakamo wato ibusu limozi. Nu gantata gato gabezaga bintu bya kusesela ga bisansa bya kugisia na tuyulo. 43 Nu kwabezaga byuma anga magobo, bulazi bwabyo bwigezye n'ikasa, byaswikilwe kunsania munda. Nu gantata kasenga gabezaga nyama za tuyulo.
44 Nu kumbuga kwa mwingilo wa munda kwabezaga masio mabili ma beimbi mu mulungu wa munda, busio bumozi bwabezaga mu lulenge lwa mwingilo walolela ku lulenge lwa kwikazi nu busio bubo bwalolela ku lwa kwidume. Nu bungo busio bwabezaga ku lulenge lwa mwingilo walolela ku lulenge lwa kwidume nu bungo bwalolela ku lwa kwikazi. 45 Nu wozo muntu ambwide bunee: “Busio bubuno bwalolela ku lulenge lwa kwidume buli bwa basankoga, balangi ba numba z'ikumbamino. 46 Tondo busio bwalolela ku lulenge lwa kwikazi, buli busio bwa basankoga bakulanga kasenga ka kayulo. Babano beli bana ba Zadoki, wozo umozi munkatini mwa bana ba Lawi ukuvwama kukunda Yehowa kumukitila.”
47 Alindikile mulungu, bulazi bwa mabusu lukama lumozi, nu bungulu mabusu lukama lumozi, nu kasenga ka kayulo kabezaga lwabusio lwa numba za kukumbamina. 48 Nu ansondelezizie ku lusu lwa numba, alindikile n'iyango n'iyango lya lusu mabusu matano ku lulenge luno nu lulo, nu bungulu bwa lwibi bwabezaga mabusu masatu lulenge luno nu lulo. 49 Bulazi bwa lusu bwabezaga mabusu makumi mabili nu mabili nu bungulu bwalo mabusu ikumi nu limozi, nu ku lulenge na lulenge lwa kyindo kya kubakama kwabezaga miima bwigi na mango ma ntungo, mwima umozi ku lulenge na lulenge.