39
1 Nu atendile lingo bunee: “Uwe mwana wa muntu, lengania ku Gogi bunee: ‘Yehowa, Mwiya Bwangato Bunsania, atenda bunee: “Nne nkukusomba, ee Gogi, mukota munene, Meseki nu Tubali. 2 Nu nkakugalukya nu kukutikya ku lulenge luzinda lwa kwikazi nu kukulusia kwitana ku miduko za Israeli. 3 Nu nkaketula bunkanda bwobe buli mu kuboko kwa seikazi, nu nkakolokya misungu zobe zili mu kuboko kwa seidume. 4 Ukakua mu miduko za Israeli uwe nu mayombo mobe mansania nu bantu beli gamozi nobe. Ukaba idia lya tuzoni twa nkita insania tuli anga kibombobombo nu nyama za mu lubanda. 5 Ukakua mu lubanda kubuno nne natendile,” Yehowa, Mwiya Bwangato Bunsania, atenda. 6 “Nkasinga keiya ku Magogi, nu ku babo bakwikalaga bulonge bukata ku mitili, nu bakamenya buno nili Yehowa.”’ 7 Nu nkamenyesia izina lyane lyasililila munkatini mwa bantu bane ba Israeli, aba nsikasiga izina lyane lyasililila kubigibwa lingo. Nu bilongo bakamenya buno nili Yehowa, Wasililila wa Israeli. 8 Bitondo bibyo bikavwa nu bikakitwa, u bukutenda Yehowa, Mwiya Bwangato Bunsania. Bubo u busi bunatendile kweli.
9 Nu babo bakwikalaga mu miino za Israeli bakakongia keiya kabo na bintu byabo bya bita, ngabo nnene nu nkeke, mankanda nu misungu nu nkoma nu masumo nu bakabigisia mu keiya myaka mutubakamo. 10 Aba tabakasena nkuzi mu isoa aba kusena engo mu lubanda, kubuno bakakongia keiya na bintu bya bita nu bakagisia babo bababigizie nu bakakata ntiko ku babo babanyagile, u bukutenda Yehowa, Mwiya Bwangato Bunsania.
11 Nu ku busi bubo nkakasa Gogi kiziki kya nsinda munkatini mwa Israeli mu kibitabita kya babo bakutinga ku lulenge lwa kuntata. Nu kikakanda nzila za batingi. Ububo bakayika Gogi gago gamozi na bantu bage beingi. Bakeinika kiziki kikyo buno kibitabita kya Hamoni-Gogi. 12 Numba za Israeli bakayika bitumba myezi mutubakamo buno bengie kisi. 13 Ububo bantu bansania ba kisi bakabayika bakaganunwa ku busi bunkatanunwa, u bukutenda Yehowa, Mwiya Bwangato Bunsania. 14 Bakasombola bamulume buno bakenda mu kisi kuyika bibyo bitumba byasigede mu kisi, buno bakyengie. Kuzinda kwa myezi mutubakamo bakalonda lingo. 15 Nu nkungu zibakatinga mu kisi ndi umozi amona ikwa nti akabika kakengelezio gago aaba nu bayiki bakaliyika mu kibitabita kya Amoni-Gogi. 16 Nu izina lya mwino likaba Amoni. Ububo bakengia kisi.
17 Nu uwe mwana wa muntu, Yehowa, Mwiya Bwangato Bunsania, atenda bunee: ‘Tenda na nkita insania za tuzoni nu za nyama zili mu lubanda bunee: “Kundamanazi; vwazi kutuka ku ndenge insania ku kayulo kane kankumukitila, kayulo kanene mu miduko za Israeli, buno mulie nyama nu kunua mikila. 18 Mwalie misuna za mapuka nu kunua mikila za bakota ba kisi. Mukabilia anga buli misuna za kilimba kya mukoko nu kya mpene nu mulume wa ngombe zizo insania zanona mu Basani. 19 Mukalia manona na buliagundu, mukalebwa na mikila zabo za kayulo kane kanamukasile. 20 Nu mukalia na buliagundu ku meza nu farasi nu benzia ba tuyanga nu bantu bansania ba bita, u bwatenda Yehowa, Mwiya Bwangato Bunsania.”’
21 Nu nkabika lutanuno lwane munkatini mwa bilongo, nu binsania bikamona ku lusungio lwa kuboko kwane kunabika kubeli. 22 Bubo numba za Israeli bakamenya buno nili Yehowa, Kalaga wabo, kutukila busi bubo nu bindi binsania. 23 Nu bilongo bakamenya buno numba za Israeli zendile kukandwa ku kabamba ka bwagi bwabo, ku bubo banagide, nu nabakandide malanga mane. Bubo nabakasenne ku beiti babo, nu bansania bazikile na mwene wa nganda. 24 Nabakitide anga bwabezaga nsese zabo nu bwagi bwabo. Nu nabakandide malanga mane.
25 Yehowa, Mwiya Bwangato Bunsania, akutenda bunee: ‘Kano kaluma nkatikya bantu ba Yakobo ku bukobe bwabo, nu kukwila numba insania za Israeli kyombo, nu nkaba na lugi ku izina lyane lyasililila. 26 Nu bakeibilila nsoni zabo, bwengelezi nu kabenga kabo kansania kabankitide, nkungu zibakeikala bulonge bukata mu kisi kyabo, nu takuli ukabeitia boba. 27 Nu nkungu zinkabasubya kubatikya lingo ku bilongo nu kubakundamania lingo kutuka bisi bya beiti babo, nti kusililila kwane kukamoneka ku kabamba kabo lwabusio lwa bilongo byingi. 28 Nu nkungu zezo bakamenya buno nili Yehowa, Kalaga wabo. Kubuno nababikile mu bukobe munkatini mwa bilongo nu nabakundamanizie lingo mu kisi kyabo, nu nsikasiga aba umozi kuko lingo. 29 Aba nsikabakandila malanga mane lingo kubuno nkabika Muuza wane ku numba za Israeli, u bukutenda Yehowa, Mwiya Bwangato Bunsania.’”