Bulengania ku mukota wa Gogi
38
1 Iyuki lya Yehowa lyavule kundi nu lyatendile bunee: 2 “Uwe mwana wa muntu lola ku lulenge kwa kisi kya Magogi nu Gogi mukota munene wa Rosi, Meseki nu Tubali nu lengania kweli, 3 nu tenda bunee: ‘Yehowa, Mwiya Bwangato Bunsania, akutenda bunee: “Ee Gogi mukota wa Rosi, Meseki nu Tubali, lola nne nkusaka nobe. 4 Nu nkakugalukya nu kubika kalobo mu kanua kobe, nu nkakubasia n'iyombo lyobe linsania, farasi nu babakami bazo mu kisi kyobe, nu babo bansania bavwala nsulu nsoga, musanganano munene bansania bavwala nsulu za bita nu ngabo, nawe na ngabo nu mwene wa nganda mu kuboko kwage. 5 Persia, Kushi nu Puti gamozi nabo, babo bansania na ngabo nu nkumbu, 6 Gomeri n'iyombo lyage linsania, numba za Beti Togarma zatuka ku lulenge lunsania lwa kwikazi n'iyombo lyage linsania nu bantu beingi gamozi nabo. 7 Ube kayikayika, ububo bika binsania kayikayika, uwe nu mayombo mansania makundamenne gamozi nobe, uwe mulangi wabo. 8 Nu kumbusa kwa bindi byingi ukamanwa, mu bindi bya kuzinda ukavwa mu kisi kyasubibwa bukyabezaga kumbusa kwa kukindwa na mwene wa nganda. Bantu bakyo bakundamenne kutuka ku bilongo byingi ku miduko za Israeli, nu kwabezaga bukindu myaka mingi tondo bantu bakyo batolilwe ku bilongo nubo bansania bakwikala mu bubobelelo. 9 Nu ukaba anga kisoa nu anga bimpa kukukila kisi, uwe na mayombo mobe mansania, nu bilongo byingi gamozi nobe.”
10 Bubuno u bukutenda Yehowa, Mwiya Bwangato Bunsania, bunee: “Ku busi bubo ukakengela mu mutima wobe ikengelo ibi lya bwiti. 11 Nu ukatenda bunee: ‘Nkwenda ku kisi kya miino ziteli na bitutu, nu ku babo beli na bubobelelo, bakwikalaga bulonge bukata, babo bansania bakwikalaga geteli bitutu, aba tabeli na nibi zili na bilimba. 12 Nkwenda kunyaga nu kukata ntiko, nkalambya kuboko kwane ku biziki byazikizibwe biseli mu bantu kano kaluma, nu ku babo bakundamenne kutuka ku bilongo, beli na bituganwa nu bikulo, bakeikala munkatini mwa kisi kinsania.’ 13 Seba, Dedani nu bakunzia ba Tarsisi, na miino zage, bakutenda bunee: ‘Ndi wavule kukata ntiko? Ndi wakundamanizie bantu bobe kunyaga feza nu olo nu bituganwa nu bikulo nu ntiko ningi?’”’
14 Ububo uwe mwana wa muntu, lengania ku Gogi bunee: ‘Yehowa, Mwiya Bwangato Bunsania, atenda bunee: “Ku busi bubo gakeikala bantu bane baIsraeli ku bubobelelo, ndi ntukabumenya? 15 Nu ukuvwa kutuka ku kiziki kuzinda kwa ku lulenge lwa kwikazi, uwe na bikanga byingi gamozi nobe. Babo bansania bendaga gantata farasi beli kibombo nu iyombo inene. 16 Nu ukavwa kwitana na bantu bane ba Israeli anga kimpa kyakukila kisi. Ku bindi bya kuzinda nkakusinga kwitana na kisi kyage, buno bilongo bammenye nkungu za kusililila kwane kukumoneka ku kabamba kobe, ee Gogi, mukota munene.”
17 Bubo u bukutenda Yehowa, Mwiya Bwangato Bunsania, bunee: “Ndi uwe u wozo u natendile nage wakalazi na bakiti bane, balengania ba Israeli, balenganizie ku bindi bibyo myaka mingi buno nkakusinga kwitana nabo. 18 Nu ku busi bubo gakavwa Gogi kwitana na kisi kya Israeli, malanga mane makakandwa na bongoa bukali.” Yehowa, Mwiya Bwangato Bunsania, atenda bunee: 19 “Mu lugi lwane nu bongoa bwane bukali nkutenda buno lebelebe ku busi bubo kaningini kanene kabe mu kisi kya Israeli. 20 Nu byena bya kitatenge nu tuzoni twa mpelela, nu nyama za mu lubanda, nu nyama insania zikugelegeta ga kisi, nu bantu bansania beli ga kisi, bagilimine lwabusio lwane, nu miduko zikagusibwa, nu lwanda lukatika nunse, nu kitutu na kitutu kikenduka. 21 Nu nne Yehowa, Mwiya Bwangato Bunsania, nkamana mwene wane wa nganda kuzikya Gogi mu miduko zane insania, mwene wa muntu na muntu ukeita munyage. 22 Nu nkakusungia na lusambo lukali nu kusumitwa, nu nkamulokezya mbula nnene nu mbula za lubula nu keiya nu kibiliti, kweli nu ku mayombo mage nu ku bantu beli gamozi nage. 23 Nu nkamenywa na bilongo byingi ku kabamba ka magala mane nu kusililila kwane, nu bakamenya buno nili Yehowa.”’”