Bulengania bwa kusombwa kwa mwiduko wa Seiri
35
1 Yehowa antendile bunee: 2 “Uwe mwana wa muntu, lola ku mwiduko wa Seiri, nu lengania lusombo lwago. 3 Yehowa, Mwiya Bwangato Bunsania, atenda bunee: ‘Nne nakusomba, uwe mwiduko wa Seiri. Nu nkalambya kuboko kwane nu kukwita, nkakuzikya nu ukaba bukindu. 4 Nkazikya miino zobe nu uwe ukaba bukindu, nu ukamenya buno nili Yehowa. 5 Nakasile bantu ba Israeli ku nkungu za kabebe kabo ku bwangato bwa mwene wa nganda, ku nkungu za lusungio luzinda ku kabamba ka bwiti bwobe bwa bindi binsania. 6 Kubuno anga bunkulama, u bukutenda Yehowa, Mwiya Bwangato Bunsania, nkakubasia mikila, nu kikyo kitondo kikakuyanga, kubuno wabasizie mikila. 7 Nkazikya mwiduko wa Seiri nu ukaba bukindu, nsikasiga batingi kutinga mugo aba babo bakusubya. 8 Bitumba bya bantu bakule na mwene wa nganda byabe kunsania mu ntulungu zobe nu ku bibitabita byobe. 9 Nkakuzikya nu miino zeinyu zikaba makindu bindi binsania. Nkungu zezo ukamenya buno nili Yehowa. 10 Kubuno watendile: “Bilongo bibino bibili, nu bisi bibino bibili bikaba byane, nu tukabikata,” aba nne Yehowa nabezagako. 11 Ububo lebelebe, u bukutenda Yehowa, Mwiya Bwangato Bunsania, nkakukitila na bongoa anga buwabakitide ku kabamba ka lusombo lwobe, nu ukamenya buno nkukusungia ku kabamba kabo ku nkungu zinakusungie. 12 Nu wamenye buno nne Yehowa nungule ku bilingano byobe binsania biwatendile ku mwiduko wa Israeli bunee: “Bazikizibwe, ububo bakasilwe kutuli kubalia.” 13 Nungule bubo bumwatendile nu bumwikotizie kundi.
14 Yehowa, Mwiya Bwangato Bunsania, atenda bunee: “Kisi kinsania kikabogaboga ku nkungu ziukaba bukindu. 15 Anga buwabogilebogile ku nkungu za bwiyani bwa numba za Israeli gazabezaga bukindu, u bubo bunkakukitila. Ukaba bukindu uwe mwiduko wa Seiri nu kisi kya Edomu kinsania. Ku nkungu zezo bakamenya buno nne nili Yehowa.”’”