Balangi ba Israeli bazugilwa
34
1 Yehowa antendile lingo bunee: 2 “Uwe mwana wa muntu, lengania ku balangi baIsraeli babule bunee: ‘Bubuno u bukutenda Yehowa, Mwiya Bwangato Bunsania, kabebe ku balangi ba Israeli bakwidisia bobenyene. Ndi balangi tabatunganana kulisia mikoko? 3 Inyuwe mukusesa nu kulia manona ma mikoko nu kuvwala myoza zazo, tondo tamukulisia mikoko. 4 Zezo zatamba tamwazilindizie, nu zezo zikusamba tamwazonezie, nu kulonga zezo zabelekile, aba tamwakundamanizie lingo zezo zabalangenne, aba kulonda zezo zaziminne. Tondo mwazilangile na magala nu bukali. 5 Zabalanganizibwe kubuno tazabezaga na mulangi nu zabede idia ku nyama insania za mu lubanda. 6 Mikoko zane zabalangenne ku kisi kinsania, ta umozi wazibuzizie aba kuzilonda. 7 Ku bubo, inyuwe balangi, ungwililazi iyuki lya Yehowa. 8 Yehowa, Mwiya Bwangato Bunsania, akutenda bunee: “Lebelebe mikoko zane zategilwe nu kulibwa na nyama insania za mu lubanda, kubuno tazabezaga na mulangi, aba balangi bane tabalondile mikoko zane aba balangi beidisizie bobenyene. 9 Ku bubo, inyuwe balangi, ungwililazi iyuki lya Yehowa.” 10 Yehowa, Mwiya Bwangato Bunsania, atenda bunee: “Nkusomba balangi nu natikya mikoko zane ku bulangi bwabo buno tabazilisie lingo. Nu balangi tabeidisie bobenyene lingo, tondo nkatikya mikoko zane kubeli buno tabalie zo lingo.”
11 Bubuno u bukutenda Yehowa, Mwiya Bwangato Bunsania, bunee: “Nnenyene nkabuzia nu kulonda mikoko zane. 12 Anga bukulanga mulangi mikoko zage nkungu zeemana munkatini mwazo, ububo bunkulanga mikoko zane, nkazonia ku biziki binsania bizabalangane ku busi bwa lutundutundu nu kapilo. 13 Nu nne nkazitikya mu bilongo nu kuzikundamania mu bisi bigeni nu kuzilusia mu kisi kyazo. Nkazilisia ku miduko za Israeli ku mitili za luuzi nu ku biziki binsania bikedwe mu kisi. 14 Nkazilisizia ku kiziki kisoga nu kiziki kizikalia kili ku miduko zasakama za Israeli. 15 Nnenyene nkalisia mikoko nu kuzumuzia,” bubo u bukutenda Yehowa, Mwiya Bwangato Bunsania. 16 “Nkalonda zazimina nu kuzisubya nu kulonga zabeleka nu kulindia zatamba, tondo nkeita zanona nu za magala nkazilanga na kwisanana.”
17 Bubo u bukutenda Yehowa, Mwiya Bwangato Bunsania, bunee: “Inyuwe mikoko zane nkatula gasamba mukoko na mukoko nu gasamba kilimba kya mukoko nu kya mpene. 18 Ndi buli busoga kulia mu kiziki kisoga, nu kumbusa kunyanta idia lyasigalako? Ndi buli busoga kunua mazi masoga nu kumbusa kumalubula? 19 Nu mikoko zane zatunganana kulia bimwanyantile, nu kunua bimwalubwide.”
20 Ukinsa Yehowa, Mwiya Bwangato Bunsania, atenda bunee: “Nnenyene nkatula gasamba mikoko zanona nu zonda. 21 Kubuno mukusindika na mpege nu bituli byeinyu, nu kusumita zezo zatamba na mega meinyu nu insania zabalanganizibwe bulazi. 22 Nkonia mikoko zane nu tazikategwa lingo, nkatula gasamba mukoko na mukoko. 23 Nkazanzula mulangi wazo mukiti wane Davidi akazilisia wenyene nu kuba mulangi wazo. 24 Nne Yehowa nkaba Kalaga wazo nu mukiti wane Davidi akaba mwangati wazo, nne Yehowa natenda.”
25 Nkalanga idagano lya bubobelelo nazo, kutikya nyama nkali ku kisi buno zilame bulonge bukata mu kalula aba mu lubanda. 26 Nkabika mponga zane ku biziki byatimba mwiduko wane. Nu nkalokya mbula mu nkungu zazo. Zikaba na mponga. 27 Miti zikakolama biguma, nu kisi kikasia biyikanwa byakyo, nu zikaba bulonge bukata mu kisi kyazo. Ububo zikamenya buno nili Yehowa, ganaketule bikando bya kisanga g'ikosi lyazo nu kuzonia ku maboko ma babo bazibikile mu bukobe. 28 Tazikanyagwa lingo na ba bilongo aba nyama za kisi tazikazilia lingo, tondo zikeikala bulonge bukata, aba takuli muntu ukazitia boba.
29 Nkazinagizia masoa, tazikakua na nzala mu kisi kikino lingo, tazikabengwa na ba bilongo. 30 Nuzo zikamenya buno nne nili Yehowa, Kalaga wabo, nu nili gamozi nazo, nu buno babo ba numba za Israeli beli bantu bane, u bukutenda Yehowa Mwiya Bwangato Bunsania. 31 Inyuwe muli mikoko zane, mikoko zinkulisia, muli bantu bane, nu nne nili Kalaga weinyu; u bukutenda Yehowa, Mwiya Bwangato Bunsania.’”