Mulengania akutonda baIsraeli
33
1 Nu Yehowa antendile bunee: 2 “Uwe mwana wa muntu, bula bantu bobe bunee: ‘Ndi nalusia mwene wa nganda mu kisi kyeinyu, nu bantu basombola muntu umozi gabasamba nu kumubika mulangi wabo; 3 ndi amona ku bita bise byavwa mu kisi, nti ida monze kutonda bantu, 4 nu ndi wozo ongwa ku iyuki lya monze nu kutalyanga, nu mwene wa nganda wamwita nu akua, nti kabamba keli kage wenyene. 5 Ndi ongule ku iyuki lya monze tondo ntalyanga kabamba keli kage wenyene. Songo alyangile songo analamine. 6 Tondo ndi mulangi akumona mwiti akuvwa nu ntakwida monze, nu bantu tabatondwa, nu mwiti avwa kwita muntu umozi munkatini mwabo; akua mu bwagi bwage, tondo kalamo kage keli ku kabamba ka mulangi.’ 7 Bubo uwe mwana wa muntu, nakubikile mulangi wa numba za Israeli; ungwilila iyuki lyane, nu kubatonda. 8 Nkungu zinabule mwagi bunee: ‘Uwe mwagi lebelebe ukakua, ndi ntukutonda mwagi ku nzila zage, akua mu bwagi bwage tondo kabamba ka kalamo kage keli kuguli. 9 Tondo ndi watonda mwagi buno asige nzila zage, ntaziga, akue mu bwagi bwage tondo uwe wonie kalamo kobe.’
10 Nu uwe mwana wa muntu tenda na numba za Israeli bunee: ‘Nu inyuwe mukutenda bunee: “Lebelebe mibi za bwagi bweitu zitila kutuli nu zatukutia, buni butunalama?”’ 11 Babule bunee: ‘Bubuno u bukutenda Yehowa, Mwiya Bwangato Bunsania. Lebelebe nsikubogaboga na lukuo lwa mwagi, tondo mwagi asige nzila zage nu kulama. Galukazi nu kusiga nzila zeinyu! Kubuni mukutunda kukua, ee numba za Israeli?’
12 Nu uwe mwana wa muntu bula banyobe bunee: ‘Kwisanana kwa wisanana takunonia muntu ku busi bwa kusa kwage; tondo mwagi ndi eigonga nu kusiga bwagi bwage, ntanasungibwa lingo ku bwagi bwage. Aba mwiya kwisanana ntakalama ku kwisanana kwage. 13 Nkungu zinkutenda wisanana buno lebelebe alame nu kulemanina kwisanana kwage, aba kimozi kya kwisanana kwage takyakengelwe lingo, tondo mu kuko kwaga kwakitile akakua. 14 Ndi nkubula mwagi, lebelebe ukakua, nu asiga bwagi bwage nu kukita bulili nu kwisanana, 15 ndi mwagi asubya mwima nu kusubya bibyo byanyagile nu kwanza milembe za Kalaga geteli kwaga, lebelebe akalama, ntakakua. 16 Bwagi bunsania bwakitile tabwakengelwe kweli lingo, akitile bulili nu kwisanana, lebelebe akalama.’
17 Tondo banyobe bakutenda bunee: ‘Nzila za Mukota tazisanana,’ tondo zabo u ziteisanana. 18 Nkungu zikusiga wisanana kwisanana kwage nu kukita bwagi akakua. 19 Tondo ndi mwagi asiga mibi nu kukita bulili nu kwisanana akalama. 20 Tondo muki mwatenda bunee: ‘Nzila za Mukota tazisanana.’ Inyuwe baIsraeli nkamusungia, muntu na muntu anga buli nzila zage.”
21 Ku bindi bitano bya mwezi w'ikumi, ku mwaka w'ikumi nu ibili a wa kwigibwa kweitu, muntu umozi atinine bita kutuka ku Yerusalema nu avule kutenda bunee: “Mwino wakindwa.” 22 Lwabusio lwa mutini ntembasila, magala ma Yehowa mambaside mwigolo nu mandimbwide kanua kane. Nindunindu gaavule kundi, kanua kane kabezaga kalimbulwa, nsyabezaga lingo kaluma.
23 Yehowa antendile bunee: 24 “Uwe mwana wa muntu, babo beikede mu biziki byabezaga bulia mu kisi kya baIsraeli bakutenda bunee: ‘Abrahamu abezaga umozi tugu, nu we akasilwe kikyo kisi, ububo iswe tuli beingi mu kino kisi twakikasilwe buno kibe bwiyani bweitu.’ 25 Ku bubo babule buno Yehowa, Mwiya Bwangato Bunsania, atenda bunee: ‘Mukulia nyama gamozi na mikila nu kutambia meiso meinyu ku nkisi zeinyu, nu kubasia mikila. Ndi muneiyana kisi? 26 Mukulemanina mwene weinyu wa nganda. Mukukitaga bitondo bya nsese, nu kubigia mukikulu wa munyobe. Ndi muneiyana kino kisi?’
27 Babule buno Yehowa, Mwiya Bwangato Bunsania, akutenda bunee: ‘Lebelebe babo beli mu biziki bya bulia tabakakua na mwene wa nganda. Nkakasana wozo uli mu isoa kulibwa na nyama. Nu babo beli mu biziki byalanga bya mikolo nu mu tulimba bakakua na lusambo lukali. 28 Nu kino kisi kikaba kalula nu bulia, nu lwikotio lwa magala makyo lukasila. Nu miduko za Israeli zikaba bulia buno ta umozi unatinga ko. 29 Ububo bamenye buno nne nili Yehowa, nkungu zinkasila kubigia kisi kuba kalula nu bulia, ku kabamba ka bitondo bya bwagi bibakitile.’
30 Tondo uwe mwana wa muntu, banyobe bakukutekula ku bitutu nu ku nibi za numba, nu bakutendana bwabobwabo bunee: ‘Twendazi kungwilila misagu zikutuka ku Yehowa.’ 31 Nu bakukuvwila anga bango bantu, nu kwikala lwabusio lwobe, kususania lutundo lwa bantu bane; nubo bakungwa bitondo byobe tondo tabakubikita. Tondo mitima zabo zikuyanga mutali wabo. 32 Uli kubeli anga ukwimba nimbo za lutundo n'iyuki lya kutananizia nu kututa kindanda busoga, kubuno bakungwa ku bitondo byukutenda tondo tabakubikita. 33 Nkungu zavwe bitondo bibino, nu lebelebe bikavwa, nti bakamenya buno mulengania abezaga munkatini mwabo.”