Kulililwa kwa Farao
32
1 Ku kindi kitangi kya mwezi w'ikumi nu ibili, ku mwaka w'ikumi nu ibili, a Yehowa antendile bunee: 2 “Uwe mwana wa muntu, lilila Farao, mukota wa Misri, umubule bunee: ‘Wasusanania na kyana kya kimbwe kya bilongo, tondo uwe uli anga kimena kikali kya kitatenge. Watukile na magala mu nuuzi zobe nu kulubula mazi na magulu mobe nu kubigia nuuzi zabo. 3 Yehowa, Mwiya Bwangato Bunsania, atenda bunee: “Nakutegele bukila bwane na bantu beingi nubo bakukate nu kukubuluta ku mutili. 4 Nu nne nakusige gantata ga kisi, nakwise mu isoa bwasi bwasi nu tuzoni tunsania twikale gantata gobe nu nikutye nyama insania za kisi nobe. 5 Nu nabike misuna zobe gantata mwiduko nu kitumba kyobe kizazie mpinga. 6 Nkanusia kisi na mikila zobe kunsania aba nu ku miduko, nu migezi za mazi zikeiyala na misuna zobe. 7 Mu nkungu zinkakuzimizia nabise igulu nu kuzimia nkeninkeni nu kukukila musi na bimpa, nu mwezi tagukasana. 8 Byengi binsania bya kwigulu nkabizimia kuguli nu kisi kyobe kikaba na kapilo. Bubo u bukutenda Yehowa, Mwiya Bwangato Bunsania.”
9 Nkongia mitima za bantu bobe nkungu zinkalolesia kubiga kwobe mu bilongo byuteizi. 10 Ububo nkangamia bilongo byingi na misagu zobe. Nu bakota babo bakakua boba nunse ku kabamba kobe ku nkungu zinakisia na mwene wane wa nganda lwabusio lwabo. Bakagilimina nkungu insania, muntu na muntu ku kalamo kage ku kindi kya kugwa kwobe.
11 Kubuno Yehowa, Mwiya Bwangato Bunsania, atenda bunee: “Mwene wa nganda wa Babeli ukaba kuguli. 12 Nkeita bantu bobe beingi na myene za nganda za beiya magala, beli bakota bakali ba bilongo, bakazikya lwikotio lwa baMisri nu bakazikya bansania. 13 Nkazikya bituganwa byage binsania bili bwigi na mazi nu magulu ma bantu tamakamalubula lingo. Aba kyondo kya nyama takikamalubula lingo. 14 Nu nkamasongolozia, nu nuuzi zabo zikagela bukebuke anga makiti,” u bukutenda Yehowa, Mwiya Bwangato Bunsania. 15 “Nazikye kisi kya Misri nu kukikita bukindu, nu natikye byabezaga mukyo, nkungu zinkeita bansania beli mukyo. Ububo bamenye buno nne nili Yehowa. 16 Lilyo idilo likeimbwa anga lwimbo. Bakinga ba bilongo balwimbe, bakalwimba baMisri bansania,” u bukutenda Yehowa, Mwiya Bwangato Bunsania.’”
17 Ku kindi ky'ikumi nu bitano kya mwezi ku mwaka w'ikumi nu ibili,b Mukota antendile bunee: 18 “Uwe mwana wa muntu, lilila bantu bansania ba Misri, nu bakinga ba bilongo bikuganunwa nu kubagezia ku kisi kya bakuzi na bakugelako. 19 Kano kaluma watinga nazi ku bumbangilwa? Gela nu wiyombeke gamozi na batamonesibwa. 20 Bakakua munkatini mwa babo beitilwe na mwene wa nganda. Akasanwe kukua na mwene wa nganda, bamutikizye gamozi na bantu bage bansania. 21 Babo beli na magala munkatini mwa babo beli na bwangato, bakumutekula na bakiti bage mu kiziki kya bakuzi Hadese bunee: ‘Bagelile nu beiyombeka kibibi na batamonesibwa, beitilwe na mwene wa nganda.’
22 Asuria eliko gamozi na bantu bage bansania, atimbwa na nsinda za bakuzi bansania, babo bansania bakule na mwene wa nganda. 23 Nsinda zabo zili mu tulimba tuli mu ntungo mwa kiziki kya bakuzi, zikutimba nsinda zage. Babo bansania beitilwe na mwene wa nganda nu beitizie bantu ba kisi boba.
24 Elamu eliko gamozi na bage bansania batimba nsinda zage beitilwe na mwene wa nganda tabamonesibwa. Bagelile kunsi kwa kisi babo beitizie bantu bakyo boba. Nu babikile nsoni zabo gamozi na babo bagelile ku kiziki kya bakuzi. 25 Bamwanzide mugu munkatini mwa babo beitilwe gamozi na bantu bage bansania. Nsinda za babo batamonesibwa zamutimba. Babo beitizie bantu ba kisi boba beitilwe na mwene wa nganda. Bagelile na nsoni zabo gamozi na babo bagelaga mu kiziki kya bakuzi nu munkatini mwa babo beitilwe.
26 Meseki nu Tubali beliko gamozi na bantu babo bansania, batimba nsinda zabo. Bansania beitilwe na mwene wa nganda, tabamonesibwa. 27 Babo beitilwe na batamonesibwa, tabayikwe mu nsinda gamozi na mapuka ma bita ma wakalazi; bayikilwe mu nsinda na ngabo zabo za bita, babikile myene zabo kunsi kwa matoe mabo, nu mibi zabo zabezaga gantata ga makwa mabo; kubuno gababezaga beikiligo, beitizie bantu bansania boba.
28 Tondo ukeitwa munkatini mwa babo batamonesibwa nu kwiyombeka gamozi na babo beitilwe na mwene wa nganda.
29 Edomu eliko nu bakota bage nu bangati bage bansania. Babezaga na magala manene, tondo beiyombekile na babo beitilwe na mwene wa nganda. Beiyombekile na babo batamonesibwa, na babo bagelile mu kiziki kya bakuzi. 30 Mitonge insania za bilongo bya ku lulenge lwa kwikazi beli nubo gago, nu babo ba ku Sidoni, bagelile ku bakuzi. Babezaga mapuka ma kwitia boba, tondo kano kazanga, babilongo babano beiyombeka na nsoni, gamozi na bango bakule ku bita. Babede na nsoni bumozi na babo bagelile kunsi kwa kisi.
31 Farao akabamonako nu akabibibwa ku kabamba ka bwingi bwa bantu bage. Farao n'iyombo lyage linsania bakeitwa na mwene wa nganda, bubo u bukutenda Yehowa, Mwiya Bwangato Bunsania. 32 Eitizie bantu boba mu kisi tondo akeiyombeka munkatini mwa babo batamonesizibwe, gamozi na babo beitilwe na mwene wa nganda, u wozo Farao na bantu bage bansania. Lebelebe mamo moki meli ma Yehowa, Mwiya Bwangato Bunsania.”