Kukinda kwa Farao nu bantu bage
31
1 Ku kindi kitangi kya mwezi w'isatu, ku mwaka w'ikumi nu umozi, a Yehowa ambwide bunee: 2 “Uwe mwana wa muntu, bula Farao, mukota wa Misri, nu ku bwingi bwa bantu bage bunee: ‘Walingimana na nazi ku bunene bwobe? 3 Asuria abezaga anga muti wa mwerezi mu Lebanoni, na ntabi nsoga nu zakuta kukita mpololo nsoga, nu mulazi nunse kutinga ingo miti, nu ntonga zage zabasile ku bimpa. 4 Mazi magukuzizie nu kugubika mulazi, kiziba kyawasizie. Nuuzi zatimba kiziki kiwayikilwe zasingile mazi ku miti insania za mu lubanda 5 Ku bubo bulazi bwage bwatinga miti insania. Ntabi zage zakutile ku kabamba ka mazi mengi. 6 Tuzoni tunsania twa kwigulu tobakile bizumba byabo kugo, nyama zabutile gansina muti wongo, bilongo binsania binene byumbwide kunsi kwago. 7 Bubo wabezaga musoga na ntabi ndazi, kubuno mizi zabezaga bwigi na mazi mengi. 8 Miti za mierezi mu isoa lya Kalaga tazabezaga zalingimana nago, aba ntabi za miberoshi tazabezaga zalingimana na zage. Takuli ungo muti mu isoa lya Kalaga wigezye nago ku busoga. 9 Nagukitile busoga ku bwingi bwa ntabi zago, aba miti insania zabezaga mu Edeni, isoa lya Kalaga, zabezaga na lugi kugo. 10 Ku kabamba kakano Yehowa, Mwiya Bwangato Bunsania, atenda bunee: “Kubuno bulazi bwobe bwatinga nu ntonga zobe zasakama, mutima wobe wisakikile na lwikotio. 11 Nagukasane ku maboko ma mwiya magala munkatini mwa bilongo. Lebelebe agukitile mu bukali. Nakutikya ku kabamba ka bubi bwobe. 12 Nu bageni, bakota bakali ba bilongo bagusesa nu kusiga; ntabi zago zakolokile gantata mwiduko nu mpinga insania, ntabi zago zabungukile mu ntungo mwa nzila insania za kisi. Bantu bansania ba kisi bagele kutuka ku kilimelime kyago. 13 Mu kugwa kwago tuzoni tunsania twa kwigulu twikale gantata ntabi nu nyama za mu lubanda zinyante gantata go. 14 Nakite bubo lingo buno ingo miti insania zili bwigi na mazi tazikotie, ku kabamba ka bulazi bwago nu ntonga zago zasakama kwigulu zemana kima nu milazi. Kubuno miti insania zabikwe ku lukuo nu kubikwa kunsi kwa kisi gamozi na bana ba bantu bagela mu itengu lya bakuzi.”
15 Yehowa, Mwiya Bwangato Bunsania, atenda bunee: “Ku busi bubo gaagelile ku kiziki kya bakuzi Hadese kwabezaga idilo. Namukukide n'iziba nu nakamizie nuuzi nkeke nu nnene. Nakakizizie buno Lebanoni amulilile. Miti insania za lubanda zomine ku kabamba kage. 16 Nagilimizie bilongo na muzumio wa kugwa kwago nu nkungu zinagugezie ku Hadese gamozi na babo bagelile mu itengu. Nu miti insania zakuta mu Edeni, nu miti nsoga zasombwedwe mu Lebanoni zabibibwa mu ndenge za kunsi kwa kisi. 17 Zagelile gamozi nage ku Hadese, gamozi na babo beitilwe na mwene wa nganda nu babo babezaga magala mage beikede mu kilimelime kyage munkatini mwa bilongo.”
18 Wasusanania na nazi ku lutanuno nu ku bunene munkatini mwa miti za Edeni? Tondo wagezibwa gamozi na miti za edeni ku ndenge za kunsi kwa kisi. Wiyombeka munkatini mwa babo batamonesibwa, gamozi na bakule na mwene wa nganda. Wozo eli Farao nu bana bage bansania. Bubo u bukutenda Yehowa, Mwiya Bwangato Bunsania.’”