Bulengania bwa Kalaga ku mukota wa Tiro
28
1 Iyuki lya Yehowa lyavule kundi nu lyatendile bunee: 2 “Uwe mwana wa muntu tenda na mukota wa Tiro bunee: ‘Yehowa, Mwiya Bwangato Bunsania, atenda bunee: “Ku buno mutima wobe wisakikile nu kutenda bunee: ‘Nne nili kalaga nkwikala mu kisumbi anga tulaga munkatini mwa bitatenge,’ tondo uli tugu muntu ta kalaga, aba ndi ukwisakika mu mutima wobe anga kisusania kya kalaga. 3 Uli na menge kutinga Danieli, tabanavwama kukubisa kakungu kampa. 4 Ku menge mobe nu bumenyinino bwobe, wamonine bikulo byobe nu wakundamanizie olo nu feza mu isuku lyobe. 5 Na menge mobe manene nu na kukunzia kwobe watalikide bikulo byobe, nu wisakikile.”’ 6 Ku kabamba kakano Yehowa, Mwiya Bwangato Bunsania, atenda bunee: ‘Kubuno wisakika anga kalaga, 7 nalusie bageni kuguli bantu ba bilongo bakwitie boba nu basoloboke na myene za nganda zabo ku busoga bwa menge mobe, nu kubigia lutanuno lwobe. 8 Bakugezie mu muzinga nu wakue anga babo beitilwe na mwene wa nganda munkatini mwa bitatenge. 9 Ndi watende lingo lwabusio lwa mwiti wobe bunee: “Nne nili Kalaga?” Tondo uwe uli muntu, ntuli kalaga. 10 Wakue na lukuo lwa babo batamonesibwa, ku maboko ma bageni, kubuno nne natendile. Bubo u bukutenda Yehowa, Mwiya Bwangato Bunsania.’”
11 Iyuki lya Yehowa, Mwiya Bwangato Bunsania, lyavule kundi nu lyantendile bunee: 12 “Uwe mwana wa muntu, lilila mukota wa Tiro nu mubule bunee: ‘Yehowa, Mwiya Bwangato Bunsania, akubula bunee: “Wabezaga kalolesio kasililila, wiyala na menge nu uli mbangilwa nunse. 13 Wabezaga mu isoa lya Kalaga mu Edeni. Wakukidwe na makozi ma nkita ningi anga akiki zakisimana, yakuti z'idangi lyaluluka, nu almasi, nu zabarajadi, nu sardoniki, nu yaspi (ikozi lyenga), nu yakuti-samawi, nu zumaridi, nu almasi lyakisimana nu olo. Milimo za matari nu nzenze byabezaga munda mobe; byalongekilwe kutukila busi buwabumbilwe. 14 Uwe wabezaga kerubi ka kukukila, kabongezibwe mwambo. Nu nne nakubikile ko. Wabezaga ga mwiduko wa kizila kya Kalaga, watabangile kuno nu kuko gasamba makozi ma keiya.
15 Wabezaga wasililila mu nzila zobe kutukila kubumbwa kwobe, aaba nu gamonekile bwagi muguli. 16 Nu ku bwingi bwa kukunzia kobe, wabede na kabenga nu wakitile bwagi. Uwe kerubi ka kukukila, ku kabamba kako nakwisile kutuka ku mwiduko wa Kalaga nu nakuzikizye kutuka ku makozi ma keiya. 17 Mutima wobe wisakikile ku kabamba ka bumbangilwa bwobe. Wabigizie menge mobe ku kabamba ka busoga bwobe. Nakwisile mu kisi. Nakubikile lwabusio lwa bakota buno bakumoneko. 18 Ku bwingi bwa bwagi bwobe nu ku bwingi bwa bukunzia bwobe wabigizie kiziki kyobe kyasililila. Ububo natolile keiya kabezaga munkatini mwobe, nu kakugisizie. Nakugalukizye lwito lwabusio lwa bansania bakukumonako. 19 Bansania bakwizi munkatini mwa bilongo bangame nobe, nu ukakubwa boba nu ntukaba lingo aaba ku milyalya.”’”
20 Idagi lya Yehowa, Mwiya Bwangato Bunsania, lyavule kundi nu lyatendile bunee: 21 “Uwe mwana wa muntu, lola ku lulenge lwa Sidoni nu tenda kweli bunee: ‘Yehowa, Mwiya Bwangato Bunsania, akutenda bunee: 22 “Ee bantu baSidoni, nkusaka n'inyu nu naganunwe munkatini mweinyu nu mwamenye buno nili Yehowa, nkungu zinakite nsungio zane mumuli. Nu nalolesie kusililila kwane mu mwino weinyu. 23 Nasinge mugo lusambo lukali nu mikila mu nzila zago, nu babo basumitilwe na mwene wa nganda bagoe mugo ku ndenge insania. Mu nkungu zezo nti bamenye buno nne nili Yehowa. 24 Nu takwabe lingo ku baIsraeli bantu beli anga mikele za lute aba mingilingili aba babo bakutimbatimba nu kubabenga. Mu nkungu zezo bamenye buno nne nili Yehowa, Mwiya Bwangato Bunsania.”’”
25 Yehowa, Mwiya Bwangato Bunsania, akutenda bunee: “Nkungu zinasile kukundamania baIsraeli kutuka ku bantu bababalangenne munkatini mwabo, nu kulolesia mubeli kwisanana kwane, beikale mu kisi kyane kinakasile ku mukiti wane Yakobo. 26 Nubo beikale na bubobelelo munda mwakyo nu mwobake numba nu kuyika masoa ma biguma mo nu beikale na bubobelelo, ganasungie bansania bakubatimba nu kubabenga. Mu nkungu zezo bamenye buno nne nili Yehowa, Kalaga wabo.”