Idilo lya Tiro
27
1 Iyuki lyavule kundi nu lyatendile bunee: 2 “Uwe mwana wa muntu, lilila Tiro. 3 Bula Tiro bunee: ‘Ukwikala ku isokelo lya kitatenge. Uli mukunzia wa bantu ba bilongo byingi bya mutili. Yehowa, Mwiya Bwangato Bunsania, atenda bunee: “Uwe Tiro watenda bunee: ‘Nne nili wasililila ku busoga.’” 4 Myaga zobe zili munkatini mwa kitatenge, bobaki basililizia busoga bwobe. 5 Mbavu zobe insania zakitilwe ku miberoshi kutuka ku Seniri. Nu batolile mierezi ku Lebanoni kukukitila muti mulazi wasakama mu bwato nu waswikwa ku nsulu za kubwenzia. 6 Bakitile nkapi zobe na mialo za Basani. Kibombo kya baAsuria bakukitide mbavu za mihugu zalebibwa na milamba kutuka ku mitili za Kitimu. 7 Nsulu zobe zabezaga na malebo masoga zatukile Misri nu zabede ibendela kuguli. Kyuki kyobe gantata bwato kyabezaga nsulu z'idangi lya samawi nu lya misamba za mpene, byatukile ku bisanga bya Elisa. 8 BaSidoni nu baArvadi babezaga balugi bobe. Beya menge bobe, ee Tiro, babezaga mu bwato nu kubusondelezia. 9 Bakulu ba Gebali nu bakulumizi bobe nu beiya menge bobe babezaga kubika aliga ku matengu. Mu maato mansania ma kitatenge gamozi na balugi bamo babezaga gamozi n'inyu kugalukya byakukunzia byobe. 10 BaPersi, nu baLudi nu baPuti, babezaga bantu ba bita mu iyombo lyobe; baswikile nkumbu zabo za byuma kuguli, balolesizie lutanuno lwobe. 11 Bantu ba Arwadi gamozi n'iyombo lyobe babezaga gantata bitutu byobe ndenge insania, nu baGamadi babezaga mu numba zobe zasakama za bita. Baswikile ngabo zabo insania ku kitutu nu bakulebezie.
12 Tarsisi wabezaga mwino wa kukita bukunzia nobe ku kabamba ka bwingi bwa nkita za bikulo, feza, kyuma, kasitiriti, nu kingo kyuma kizitu. Bakunzile bintu byobe. 13 BaGriki, baTubali, baMeseki babano babezaga bakunzia bobe, bakunzile bintu byobe na mibili za bantu nu bintu bya nsubi. 14 Bantu ba Beti Togarma bavule na farasi nu ingo farasi za bita nu nyumbu buno bakunze bintu byobe. 15 Bantu ba Dedani bakunzile byobe, bisanga bingi byabezaga n'isoko lyobe. Bakuvwilide na milamba nu miti zina buno ubigalukye na byobe.
16 BaEdomu babezaga bakunzia bobe ku kabamba ka bwingi bwa bintu byobe bya bukunza bunene. Bakuvwilide na nkita ningi za makozi ma bukunza bunene ma zumaridi, nsulu zakisimana nu za malebo nu nsulu nsoga zenga, nu myambalo za makozi ma akiki. 17 Yuda nu kisi kya Israeli bavule na ngano za kisi kya Miniti, bitumbula, nu buuki nu makiti nu muti wa kubonga kukunza byobe. 18 Damasiki akuvwilide ku kabamba ka bwingi bwa lukita lunsania lwa bikulo. Alusizie maku ma Helboni nu nsulu zenga za myoza. 19 BaDani nu baYavani bakuvwilide na kyuma kyatulwa nu muti wa kubonga nu makese ma kukunza bintu byobe. 20 Dedani akukunzizie nsulu za kwanza anga kisumbi gantata farasi.
21 Arabia nu bakota bansania ba Kedari babezaga na byana bya mikoko, nu bilimba bya mikoko, nu mpene kukunzia nobe. 22 Seba nu Lama bakuvwilide na miti za kuswagia idia, nkita insania za makozi ma bukunza bunene, nu olo kukunzania nobe. 23 Harani, Kane nu Edeni nu kisi kya Seba, Asuri nu Kilmadi, bakunzanizie nobe. 24 Babano bakunzanizie nobe nsulu nsoga za kuvwala nu bitambala by'idangi lyalulukilwa nu nsulu za malebo nu beikala bya malangi meingi byakandwa na mizigi. 25 Maato mabo ma tarsisi mekile bintu byobe bya kukunzia, nu wiyalile nabyo nu wabede na lutanuno lunene munkatini mwa kitatenge.
26 Balugi bobe bakulusizie mu mazi manene. Lumpumpu lwa kuntata lwakulusizie munkatini mwa kitatenge. 27 Bikulo byobe nu bintu byobe bya kukunzia, balugi bobe nu basondelezia bobe nu bakulumizi ba maato, nu babo bakukunzia bintu byobe, bakoloboyo beli munda mwobe, gamozi na bansania beli munda mwobe bakazika ku busi buwakue munkatini mwa kitatenge.
28 Kulila kwa basondelezia bobe ba maato kwatengietengie kisi anga kaningini. 29 Nu balugi bansania nu bakiti, nu basondelezia bansania ba maato bagele kutuka ku maato mabo nu bemane ga mutili, 30 ukungwa ku iyuki lyabo bubibu, bakalila n'idilo ibibu, beiyise mukungu ku matoe nu kwibongia mu lwito. 31 Babegwe mumpugu ku kabamba kobe nu kuvwala makunino. Balile ku kabamba kobe nu ku lubaba lwa mutima wa kabebe kanene. 32 Bakulilile na kabebe nu kukukwila kyombo, batende bunee: “Nazi uli anga wozo wikazibwa kibibi mu kitatenge? 33 Nkungu ziwasingile bintu byobe bya kukunzia ku kitatenge, wikutizie bantu ba kisi na bwingi bwa bikulo nu bintu byobe bya kukunzia, wagumizie ba kisi. 34 Kano kaluma wakua munkatini mwa kitatenge nu wakoka mu maziba ma mazi. Bintu byobe nu bantu bobe bansania bakokile gamozi nobe. 35 Bantu bansania beli ku mutili bangame nunse nu bakota babo bakue boba nunse nu kuzangazanga. 36 Babo bakukunzia munkatini mwa bantu bakukwililika. Kitondo kyobe kitia bantu boba aba ntukabako lingo ku milyalya.”’”