Lusungio ku Tiro nu Sidoni
26
1 Mu mwaka w'ikumi nu umozi, mu kindi kitangi kya mwezi,a iyuki lya Yehowa lyamvwilide nu lyantendile bunee: 2 “Uwe mwana wa muntu, kubuno Tiro atendile ku kitondo kya Yerusalema bunee: ‘Ah! babo bantu bazikile ububo nzila zili bwasi kundi, kano kaluma nizazibwa kubuno bazikibwa.’ 3 Ububo u bukutenda Yehowa, Mwiya Bwangato Bunsania, bunee: ‘Nnungwilile Ee Tiro, nili mwiti wobe, nkamana bilongo bingi kwitana nobe, anga bukusakamia kitatenge bimpumi byage. 4 Nubo bakendula bitutu bya Tiro, nu numba nnene za kwidanga nu nkalula mukungu wage unsania nu akaba anga lwanda. 5 Akaba kiziki kya kukamizia tukila munkatini mwa kitatenge, kubuno nabutendile, nne Yehowa, Mwiya Bwangato Bunsania, u gukutenda. Akaba ntiko za bilongo. 6 Bakinga bage bakwikalaga ku mangele bakakua na mwene wa nganda nu bakamenya buno nne, nili Yehowa.’
7 Kubuno Yehowa, Mwiya Bwangato Bunsania, atenda bunee: ‘Ungwilila, nkamana ku Tiro, Nebukadneza mukota wa Babeli, mukota wa bakota kutuka ku kisi kya ku lulenge lwa kwikazi na farasi zage nu tuyanga twage nu iyombo lyage inene. 8 Bakeita bakinga bobe bakwikalaga ku mangele na mwene wa nganda nu akasakamia bitutu bya bita nu zibe anga ngabo nnene buno beitane nobe. 9 Akatumuna bitutu byeinyu na miti minene nu akendula numba zeinyu nnene na masaga mage. 10 Ku kabamba ka bwingi bwa farasi zage, mukungu wozo wamukukile nunsania. Bitutu bikatengatenga ku nkindo za farasi nu kayanga kakweka bintu nu ka bita ku nkungu zeingile mu mwino weinyu anga bukwingila bantu mu mwino wasambulwa. 11 Byondo bya farasi zobe bikanyantanyanta mu nzila zobe insania, ukeita bantu bobe ku mwene wa nganda nu kugusia iyango lyeinyu lya kalolesio ka magala meinyu.
12 Banyage bikulo byeinyu nu byabe ntiko zabo. Bakendula bitutu byeinyu nu kusambula numba zeinyu nsoga, nu kwisa busasa bwa makozi nu miti za numba nu mukungu unsania mu mazi. 13 Nu nne nkasila nimbo zeinyu nu nzenze zeinyu tazongubweko lingo. 14 Ukaba anga lwanda lwa buliabulia, nu kuba kiziki kya kukamizia tukila. Ntukobakwa lingo kubuno nne, Yehowa u wabutendile. Bubuno buli iyuki lya Yehowa, Mwiya Bwangato Bunsania.’
15 Yehowa, Mwiya Bwangato Bunsania, abula Tiro bunee: ‘Ndi babo ba mutili tabanakua boba na muzumio wa kugwa kwobe? Nu kutonga kwa babo bababalwa, nkungu zibaseswe munkatini mweinyu? 16 Ububo bakota bansania ba kitatenge bakatuka ga bisumbi byabo bya bukota nu bakatikya nsulu zabo nu makoti mabo ma malebo. Bakeikala gansi nu kugilimina nkungu insania; bakangama ku kabamba keinyu. 17 Bakakulilila nu kukubula bunee: “Uwe wazikibwa nunse, nu wabezaga kiziki kikalaga mu bantu. Watikibwa munkatini mwa kitatenge uwe mwino wa lutanuno. Abezaga na magala manene gantata bitatenge we na babo beikalaga munda mwage beitizie bansania beikalaga mugo boba. 18 Kano kaluma mitili zikagilimina ku busi bwa kugwa kwobe. Ububo bisanga bili mu kitatenge bikakua boba ku lukuo lwobe.”’
19 Kubuno Yehowa, Mwiya Bwangato Bunsania, atenda bunee: ‘Gankakukita bukindu anga miino ziteikalilwe na bantu, nkungu zinkabakamia maziba ma mazi kuguli, nu mazi mengi makakukukila, 20 nakugezie gamozi na babo bakugela mu muzinga mulazi, wende ku bantu ba wakalazi, nu nkakwikazia ku biziki bya kunsi kwa kisi, ku biziki bitabezaga bantu kutukila wakalazi, nkakugezia gamozi na babo bakugela mu muzinga mulazi, buno takukeikala bantu, nu Nne nabike lutanuno mu kisi kya balami. 21 Nkakwitia na boba nu ntukaba lingo. Aba ndi ukalondwa ntukamoneka lingo, u bwatenda Yehowa, Mwiya Bwangato Bunsania.’”