Bulengania ku ba Amoni
25
1 Yehowa antendile bunee: 2 “Uwe mwana wa muntu, lola nu emana ku lulenge lwa baAmoni nu lengania kubeli. 3 Tenda baAmoni bunee: ‘Ungwililazi iyuki lya Yehowa, Mwiya Bwangato Bunsania! Bubuno u bukutenda Yehowa, Mwiya Bwangato Bunsania, bunee: “Kubuno mwatendile; ‘ah! ah!’ ga kiziki kyane kyasililila ku nkungu zikyabigile, nu kisi kya Israeli ku nkungu zikyakitilwe bukindu, nu ku numba za Yuda, ku nkungu zibendile ku bukobe; 4 ububo nkakukasana ku bantu ba kuntata, buno ube bwiyani bwabo. Bakabika malo mabo munkatini mweinyu nu kwikala kumuli. Nu bakalia biguma byeinyu nu bakanua mabele ma ngombe zeinyu. 5 Raba akaba kalula ka ngamia nu kyumunino kya mikoko za baAmoni. Ububo mukamenya buno nne, u Yehowa.” 6 Bubuno u bukutenda Yehowa, Mwiya Bwangato Bunsania, bunee: “Mwatutile nkasa zeinyu nu kuzumia nkindo, mwabogilebogile nu kubenga kisi kya Israeli. 7 Ku bubuno nkamwita nu kumukasana ku ba bilongo kuba ntiko zabo. Nu nkamutikya munkatini mwa bingo bisi binsania nu kumuzikya. Ububo mukamenya buno nne nili Yehowa.”’
8 Yehowa, Mwiya Bwangato Bunsania, atendile bunee: ‘Kubuno baMoabu nu Seiri bakutenda buno numba za Yuda zasusanania na bilongo binsania, 9 ububo nne nazikye miino za Moabu zili ku lulenge lumozi lwakyo; nite miino zili na lutanuno lwatinga mu kisi kyabo, Beti-Yesimoti, Bali-Meoni, nu Kiriataimu. 10 Nkakikasana ku bilongo bili kuntata, Moabu gamozi na baAmoni tabakengelwe munkatini mwa bilongo. 11 Bubo u bunasungie Moabu nu bamenye buno nne, u Yehowa.’
12 Bubuno u bukutenda Yehowa, Mwiya Bwangato Bunsania, bunee: ‘Kubuno Edomu akitide numba za Yuda bubi mu kwisuba kubeli nu kwaga nunsania, 13 ububo Yehowa, Mwiya Bwangato Bunsania, atenda bunee: “Nasungie Edomu nu kwita bamulume nu nyama na mwene wa nganda nu kuzikya kisi kyabo kutukila kisi kya Temani aaba nu Dedani. 14 Nkasuba ba Edomu nu bantu ba Israeli bakasungia ba Edomu anga buli bongoa nu bukali bwane; bamenye musubo wane. Nne Yehowa, Mwiya Bwangato Bunsania, nabutenda.”’
15 Yehowa, Mwiya Bwangato Bunsania, atenda bunee: ‘Kubuno baFilistini beisubile, nu beisubile na kabenga kakali nu kumwita na lusombo lwabo lwa wakalazi, 16 ububo Yehowa, Mwiya Bwangato Bunsania atenda bunee: “Nasungie baFilistini nu nkazikya ba Kereti nu babo bakusigala ku mitili za kitatenge. 17 Nu nasube musubo munene, nabasungie na bongoa bwane bukali, nubo bamenye buno nne nili Yehowa, nkungu zinkasuba musubo wane kubeli.”’”