Musumo wa bakinga babili
23
1 Iyuki lya Yehowa lyavule kundi nu lyatendile bunee: 2 “Uwe mwana wa muntu, kwabezaga bakikulu babili, bakinga ba nda emozi. 3 Bakitile butazi mu Misri. Bakitile butazi mu bukinga bwabo. Mabele mabo masolile nu bukumi bwabo bwakule kuko. 4 Izina lya nkula lyabezaga Ahola nu lya muto wage lyabezaga Aholiba. Babede bane nu babutile bana bamulume nu bamukazi. Nu bwisulilwa bwa meina mabo buli: Ahola, u Samaria nu Aholiba, u Yerusalema. 5 Nu Ahola akitile butazi gaabezaga wane. Atundaga nunse batundwa bage, u babo ba Asuria banyage, 6 bakota banene nu bakeke bavwalile nsulu zakisimana. Babo bansania babezaga mitoka nsoga zatundagwa; bendaga ga farasi. 7 Nu akitile butazi bwage na babo ba Asuria bansania bamulume babezaga batinga ku busoga nu akitile na wozo wamutundile nunse, nu eibigizie na nkisi zabo insania. 8 Aba ntasigile butazi bwage kutukila bindi byabezaga ku Misri, kubuno mu bukinga bwage bayamine gamozi nage. Nu babigizie bukumi bwage, nu babo bansania batundile butazi bwage. 9 Ku bubo namukasenne ku bamutunda, u baAsuria, u babo baatundile nunse. 10 Babano balolesizie mundulu wage, bakatile bana bage bamulume nu bamukazi tondo bamwitile na mwene wa nganda. Nu abede kalolesio munkatini mwa bakikulu nu mwa babo bamusungizie.
11 Nu muto wage Aholiba amonine ku bitondo bibino tondo itide kubiga kumutinga nu butazi bwage bwatingile bw'iselenzi. 12 Atundile nunse baAsuria, bakota banene nu bakeke, babo bavwalile nsulu nsoga nunse, nu bendaga gantata farasi, babo bansania babezaga mitoka minene zatundwa nu misoga. 13 Namonine buno beibigia bobabili; bendile mu nzila emozi.
14 Itide na butazi nunse kubuno amonine ku bisusania bya balume byasanzwa ku kitutu na malangi nu nkisi za baKaldea zasanzwa n'idangi lyakisimana. 15 Ku bisusania bibyo bavwalikibwa mikoma mu bibunda nu nkumbu zatilwa idangi ku matoe mabo. Babo bansania basusania bakota ba bakoloboyo ku kisusania kya Babeli mu Kaldea kisi kyabo kya kubutwa. 16 Gaabimonineko, abatundile nunse, asingile migenzi kubeli ku Kaldea. 17 Bantu ba Babeli bavule kweli ku mugu na lutundo nu bamubigizie ku butazi bwabo. Bamubigizie nu kumbusa abasombile.
18 Nu alolesizie butazi bwage nu mundulu wage, ububo namusombile anga bunasombile iselenzi. 19 Tondo itide na butazi bwage nu akengede bindi bya bukinga bwage, bindi byakitile butazi mu kisi kya Misri. 20 Atundile nunse batundwa babo, misuna za mubili wabo zili anga misuna za mpunda nu anga za mulume wa farasi. 21 Ububo wakengede butazi bwa bukinga bwobe ku kubigibwa na baMisri, ku kabamba ka bukumi bwa bukinga bwobe.
Lusungio ku kusomba Kalaga
22 Bubuno u bukutenda Yehowa, Mwiya Bwangato Bunsania bunee: ‘Ee Aholiba, ku kabamba kakano nazanzukya babo bawatundile nu bawasombile, nu nabalusie kuguli ndenge insania, 23 u baBabeli nu baKaldea bansania, nu baPekodi, nu baSoa, nu baKoa, nu baAsuria bansania gamozi nabo, mitoka zatundagwa nu bakota bansania banene nu bakeke, nu bakota ba tuyanga nu beiya luganuno, babo bansania bendaga gantata farasi. 24 Nu bavwe kuguli na byuma bya bita; tuyanga twa bita nu twa kweka bintu gamozi na mayombo ma bantu. Bavwe kukutimba na ngabo nu mikoma za byuma, nu bakakusungia anga geigezye lusungio lwabo. 25 Nu nasinge lugi lwane kuguli, nu bakakusungia na bongoa. Bakakusesa mwembe nu matuzi mobe. Nu bakasigala kuguli bakue na mwene wa nganda. Bakatola basikila bobe nu bakinga bobe nu basigala kuguli bakazika na keiya. 26 Bakakutikya nsulu zobe nu malebo mobe makukutananizia. 27 Ububo nkazindilizia nsese zobe nu butazi bwobe buwavule nabo ku Misri. Ku buno ntukalola lingo ku baMisri aba kubakengela.’
28 Yehowa, Mwiya Bwangato Bunsania, atenda bunee: ‘Lola nkukubika mu maboko ma babo bakukusomba, u babo bawasombile. 29 Bakakusomba nu kutikya bikulo byobe binsania nu kukusiga anga uli mundulu. Nu nsese zobe nu butazi bwobe bikamonekako. 30 Bitondo bibino bikakitwa kuguli kubuno wendile kukita butazi na bilongo nu wibigizie na nkisi zabo. 31 Wendile mu nzila za solonzi. Ububo nkamukasa kituma kyage mu kuboko kwobe.’
32 Yehowa, Mwiya Bwangato Bunsania, akatenda bunee: ‘Ukanua kituma kya solonzi kili kizindu nu kinene. Ukaseswa nu kubengwa, kubuno kiyala nunse. 33 Ukakatwa na maku nunse nu kabebe. Kituma kya solonzi Samaria kili kya kwitia boba nu kuzikya. 34 Ukakinua nu kukisila kinsania. Ukeikutula nzwili zobe nu kwikutula mabele na nyana, kubuno u bunkutenda, nne, Yehowa, Mwiya Bwangato Bunsania.’ 35 Bubo u bukutenda Yehowa, Mwiya Bwangato Bunsania, bunee: ‘Kata lusungio lwa nsese nu butazi bwobe, kubuno wanibilide nu kunsomba.’”
36 Yehowa, Mwiya Bwangato Bunsania, antendile lingo bunee: “Uwe mwana wa muntu, ndi ukusungia Ahola nu Aholiba? Kasi babule misako za bwagi bwabo. 37 Kubuno bakitile butazi nu mikila zili mu maboko mabo. Bakitile butazi na nkisi zabo, kubuno batingizie bana babo bamulume, babambutide, mu keiya anga idia lya tulaga twabo. 38 Lingo bankitide bubi bubuno: babigizie numba zane zasililila nu kubenga Sabato zane. 39 Bubuno u bubakitile mu numba zane, busi bubasesile bana ku nkisi zabo, beingide mu numba zane zasililila kuzibigia.
40 Nu lingo basingile mugenzi ku bantu beli bulazi buno bavwe, nu bavule. Ku kabamba kabo wogile nu wibongezie idangi ku meiso nu kwidebya. 41 Wikede ga kisumbi nu wanzile meza bwigi nakyo na bulago bwane nu mwambo wane. 42 Nu ongule ku iyuki lya mbogimbogi za musanganano munene eikede gamozi na bamulume banuzi ba maku bamaninwe kutuka ku kalula. Nu babikile mikotola ku maboko ma bakikulu nu nkumbu nsoga nunse ku matoe mabo. 43 Ku kitondo kyage natendile buno abede mukungu mu bibyo bitondo bya butazi. Ndi banakita butazi nage kano kaluma? 44 Bayamine nage anga bubayamine na kitazi. Ububo bayamine na Ahola nu Aholiba bakikulu bitazi. 45 Nu bantu beisanana babasungie na lusungio lwatunganana bakikulu bitazi, nu lusungio lwa bakikulu bakubula mikila, kubuno beli bitazi nu mikila zili mu maboko mabo.
46 Ububo Yehowa, Mwiya Bwangato Bunsania, atenda bubuno, ‘Uwe mwana wa muntu, mana iyombo lya bita kubeli buno ubeitye na boba bunene, nu kubayanga. 47 Nu musanganano wabeite na makozi, nu kubasesa na myene zabo za nganda. Beite bana babo basikila nu bakinga, nu kuzikya numba zabo na keiya. 48 Bubo nazindilizie butazi mu kisi kikyo, bakikulu bansania batondwe buno tabakite butazi anga bumwakitile. 49 Nu mwakate lusungio lwa butazi bweinyu, nu bwa kukumbamina nkisi zeinyu. Ububo mwamenye buno nili Yehowa, Mwiya Bwangato Bunsania.’”