Mibi za Yerusalema
22
1 Iyuki lya Yehowa lyavule kundi nu lyatendile bunee: 2 “Uwe, mwana wa muntu, ndi wasungie mwino wiyala na mikila? Kasi ulolesie mibi zago insania. 3 Nu utende buno Yehowa, Mwiya Bwangato Bunsania, atenda bunee: ‘Mwino ukukubula mikila munkatini mwago nu ukukita nkisi zikugubigia buno nkungu zago zika. 4 Uli na katati ku kabamba ka mikila ziwakubwide mugo, nu wabigibwa ku nkisi ziwakitile. Bindi byobe bili bwigi nu myaka zobe zavwa. Ku kabamba kakano wabe na nsoni lwabusio lwa bingo bilongo nu wanyegwe mu bisi binsania. 5 Babo beli bwigi nu babo beli bulazi nobe bamunyege, beinyuwe beli na lukumu lubi nu kwiyala na nsake. 6 Na mukota na mukota wa baIsraeli na wabikilwe munkatini mweinyu akukubula mikila anga geigezye bwangato. 7 Babengile basoinyuwe nu banyokoeinyuwe munkatini mweinyu, bakitide bageni bubi nu kusungia nkubi nu misigala. 8 Mwanyegile bintu byane byasililila nu mwabigizie Sabato zane. 9 Munkatini nobe mwabikilwe bakandiki ba kukubula mikila. Balide ku miduko mu biziki bya kukumbamina nkisi nu bakitile butazi. 10 Munkatini mweinyu balolesizie mundulu wa beisibo nu kwitalikila ku bakikulu beli na lusambo lwa mwezi. 11 Umozi wa kumuli agide mukikulu wa munyage nu ungo akitile butazi na mukamwana wage nu ungo eitalikide ku mukikulu w'isi.’ 12 Bubuno u bukutenda Yehowa, Mwiya Bwangato Bunsania, bunee: ‘Munkatini mweinyu bakatile bikulo bya lumbisombiso, buno bakubule mikila. Nu wamonine mutali ku banyobe mu nzila mbi ku babo beli na nsombi nobe nu wasungizie banyobe nu kubababazia nu wanibilide.’
13 Nalibula kinkunya kyane ku mutali u wamonine ku nzila ziteisanana nu ku mikila zakubukile munkatini mweinyu. 14 Ndi mutima wobe walinde aba maboko mobe masigale na magala ku bindi binakukitile bitondo? Nne Yehowa natendile bitondo bibino nu nabikite. 15 Nu nne nakubalanganie munkatini mwa bilongo nu mu bisi bili bulazi. Ububo natikye kubiga kwobe kunsania. 16 Wabige uwenyene lwabusio lwa bilongo nu wamenye buno nne nili Yehowa.”
17 Iyuki lya Yehowa lyavule kundi nu lyatendile bunee: 18 “Uwe mwana wa muntu, numba za Israeli zabede kundi anga nsese zili mu feza. Bansania beli anga nsubi nu kasitiriti nu kyuma nu kingo kyuma mu muzonga. Beli anga nsese zikutuka ku feza. 19 Ububo Yehowa, Mwiya Bwangato Bunsania, akutenda bunee: ‘Namukundamanie mu Yerusalema kubuno inyuwe bansania muli anga nsese za feza. 20 Anga bubakusongya feza nu kyuma nu kingo kyuma kizitu mu muzonga bubo u bunamukundamanie mu bongoa bwane nu mu lusungio lwane, namubike kuko nu kumunyengula. 21 Ububo namukundamanie, nu kumuluta ku keiya ka lusungio lwane nu mwanyenguke munkatini mwa mwino wa Yerusalema. 22 Anga feza zikunyenguka mu iyambi lya keiya, ububo nu inyuwe mwanyenguke munkatini mwako. Nu mwamenye buno nne, u Yehowa, wamongelwa.’”
23 Iyuki lya Yehowa lyavule kundi, nu lyatendile bunee: 24 “Uwe mwana wa muntu, babule bunee: ‘Inyuwe muli kisi kitengibwa aba kitalokwa na mbula ku busi bwa lusungio. 25 Misuna za balengania bage zili munkatini mwage anga kimbwe kikuzuga gakikulonda idia. Babigizie tulamo twa bantu nu bakukata bikulo nu bintu bya bukunza bunene. Basigile misigala mingi munkatini mwago. 26 Basankoga bage babengile milembe zane nu babigizie bintu byane bya kizila, tabalekanukizye bintu bitaswaga nu bintu byaswaga. Nu bazibile meiso mabo ku Sabato zane, nu nabigibwa munkatini mwabo. 27 Bakota bage beli anga mboa za lubanda zikubinga nu kukubula mikila. Bakubigia tulamo twa bantu bamone mutali ku buteisanana. 28 Balengania babo babisile bubi bwabo anga kubongia makese ku bitutu bili nsese. Nu binsania bibakumona nu kulengania kwabo bili bya buza, nu kubukya kwabo kuli kwa buza. Bakutenda bunee: “Yehowa, Mwiya Bwangato Bunsania, akutenda bubuno,” tondo nti ntabutendile. 29 Bantu bakusungania nu kunyagana. Basungizie bazambi nu beiyanizi, nu basungizie bageni mu buteisanana.’