Mwene wa nganda wa Kalaga ku Yerusalema
21
1 Iyuki lya Yehowa lyavule kundi kutenda bunee: 2 “Uwe mwana wa muntu, galukya meiso mobe ku lulenge lwa ku Yerusalema nu lola ku kiziki kyasililila, ulenganie ku kisi kya Israeli. 3 Bubuno u bukutenda Yehowa ku kisi kya Israeli bunee: ‘Lola nne nili gantata gobe, nu natikye mwene wane wa nganda mu musagi nu nalekanukye muntu wisanana na mubi. 4 Kubuno nalekanukye mumuli beisanana nu babi, natikye mwene wane wa nganda mu musagi kwita bansania kutukila ku lulenge lwa kwidume linsania nu ku lwa kwikazi. 5 Nu bantu bansania bamenye buno nne nili Yehowa. Natikya mwene wane wa nganda mu musagi nu tawasubye lingo.’ 6 Uwe mwana wa muntu, tonga na kabebe nu lubaba mu mutima lwabusio lwabo. 7 Nu kwabe nkungu zibakubuzie bunee: ‘Kubuni ukutonga?’ Watende bunee: ‘Kubuno bitondo bikuvwa, nu byatambie mitima, nu maboko mansania mabe masosu, nu na mutima na watambe nu mazu mansania mabunguke. Lolazi, bitondo byavwe nu byakitwe, u bwatenda Yehowa, Mwiya Bwangato Bunsania.’”
8 Iyuki lya Yehowa lyavule kundi nu lyatendile bunee: 9 “Uwe mwana wa muntu, lengania nu tenda buno Yehowa atenda bunee: ‘Tenda bunee: “Mwene, mwene wayikilwa nu wengibwa! 10 Wayikilwa buno wite beingi. Wengibwa buno ukelime anga mukenzi! Ndi twabogeboge? musumbo wa bwangato wa mwana wane wabenge miti zezo insania. 11 Mwene watolwa buno wengibwe, nu kukatwa mu kuboko; wakengwe nu kwengibwa buno ukaswe ku mwiti.”’
12 Uwe mwana wa muntu, lila nu laluka n'iyuki, kubuno mwene ukwita bantu bane nu mitonge za Israeli. Ububo idibule ku lutungi lwobe. 13 Yehowa, Mwiya Bwangato Bunsania, akutenda bunee: ‘Kuli idindiko, buni bwabe lingo, ndi musumbo wa bwangato wa kubengwa tawabe lingo?’
14 Uwe mwana wa muntu lengania nu tuta nkasa zobe. Nu mwene wite limbizi lya masatu wabe mukali nunse. Guli mwene munene wa bwiti gukubatimba. 15 Buno mitima zitambe nu beingi bakue ku isula lya mwino. Nakasile mwene gukukelima nu wakengwa buno gube kayikayika kwita. 16 Enda kwita ku seidume nu ku seikazi, nu kunsania kuukumona. 17 Natute nkasa zane, nu nizazie bongoa bwane, u bunatenda, nne, Yehowa.”
18 Iyuki lya Yehowa lyavule kundi lingo bunee: 19 “Uwe mwana wa muntu kita kalolesio ka nzila ibili, zavwe mu mukota wa Babeli na mwene wage. Zezo ibili zatuke ku kisi kimozi; kita kakengelezio ka kulolesia nzila ku mwino. 20 Lolesia nzila zavwe mwene ku Raba wa bana ba Amoni nu ku Yerusalema guli na mukolo mubibu mu Yuda. 21 Kubuno mukota wa Babeli emanine ku makano kubukya bugila. Atengezie misungu nako nako, abuzizie ku nkisi zage, alolile kitugu. 22 Mu kuboko kwage kwa seidume alenganizie na bugila buno anabika miti minene ku Yerusalema anga byaza bya kubungula bitutu buno beingile nu kwita. Balaluke n'iyuki inene lya bita nu kubika miti minene zabungule nibi za ku isula lya mwino nu kusakamia bitutu bya mikolo buno beitane. 23 Nu bwabe anga bulengania bwa buza ku babo balumbide. Tondo kuguna kwabo kwakengelwe, buno bakatwe.
24 Bubuno u bukutenda Yehowa, Mwiya Bwangato Bunsania, buno mwakatwe na magala, kubuno bwagi bweinyu nu mibi zeinyu zabisulwa nu misako mibi nu bwagi bweinyu bwamonekako.
25 Uwe mukota wa Israeli, mwiya bwagi bunene, busi bwobe bwika, nkungu za lusungio lwobe luzinda zabasa. 26 Bubuno u bukutenda Yehowa, Mwiya Bwangato Bunsania, tikya kalolesio ka bwangato nu nkumbu za bukota kubuno bibyo byagalukibwe. Sakika bibyo byabezaga gansi nu gezia bili kwigulu. 27 Nabibigie! Nabibigie, nu tabyabe lingo aaba nu kuvwa kwa wozo wisanana; nu nkamukasa byo.
28 Bubuno u bukutenda Yehowa, Mwiya Bwangato Bunsania bunee: ‘Uwe mwana wa muntu, lengania ku kitondo kya bwagi bwa bana ba Amoni, nu nsoni zabo bunee: “Mwene wa nganda watikibwa mu musagi nu wengibwa kuba kayikayika ku bita. Ube mukenzi wa kuzikya anga nkuba. 29 Ku nkungu zezo bibyo bibakumona mu kubukya byabe bya buza. Wozo mwene wabikwa ku makosi ma bagi nu wabeite, kubuno busi bwabo bwa lusungio luzinda bwika. 30 Usubye mu musagi. Kiziki kimwabumbilwe ku kisi, kimwabutilwe kukyo ukunkamusungizia. 31 Namongelwe bubibu nu bongoa bwane bwabe anga keiya ka kumugisia nu namukasane ku maboko ma beiti babo beizi nunse kwita. 32 Mwabe anga nkuzi za keiya nu mikila zeinyu zagele mu kisi nu tamukakengelwa lingo kubuno nne, Yehowa, u watendile bubo.”’”