Kulila kwa bakota bakeke ba Israeli
19
1 Atendile lingo bunee: “Inyuwe mitonge insania za Israeli lilazi. 2 Mutende bunee: ‘Nyoko abezaga nazi? Ibuti lya kimbwe lyabezaga munkatini mw'iyimba lya bimbwe. Liyombekile mulyo nu kulisia byana byage. 3 Lyakuzizie kyana kimozi nu kyabede kimbwe kinene. Kyalingile kwita nyama nu kulia bantu. 4 Bilongo byakalile lwango lwa kukyita nu kukyisa mu muzinga wabo. Bakibulutile na magobo ku kisi kya Misri.
5 Lilyo ibuti lya kimbwe lyakilindide nkungu ndazi nu kilemanizio kyage kyasilile. Ububo lyatolile kingo kyana kya kimbwe nu kukigisia kuba kimbwe kinene. 6 Kyendile nako nako munkatini mwa bimbwe nu kyabede kimbwe kinene. Kyalingile kwita nyama nu kulia bantu 7 Kyendwide mikolo za biziki byabo byalanga nu kwita miino zabo. Bantu bansania ba kisi bangamine nu bakule boba na kuzuga kwakyo. 8 Ububo bilongo binsania byakikumbide ndenge insania, bakitegede bukila nu kyakolokile mu muzinga wabo. 9 Bakibikile mu bulumba bunene n'igobo nu bakyekile ku mukota wa Babeli. Bakyingizizie mu mukolo buno iyuki lyakyo talyungubweko lingo ku miduko za Israeli.
10 Nyoko abezaga anga muzigi wa biguma wayikilwe mu ntungo mwa mazi mengi. 11 Wabezaga na ntabi za magala, misumbo za babo bangataga. Nu bulazi bwa kima kyage bwasakikilwe munkatini mwa ntabi nnene, nu bwamonekile ku bulazi bwago, bwingi bwa ntabi zago. 12 Tondo wayulilwe ku bongoa, wisilwe gansi nu lumpumpu lwa kukutukaga kisongo kya busi lwomezie biguma byago. Ntabi zago za magala zaketukile nu zakamine. Nu keiya kazigisizie. 13 Nu kano kaluma wayikwa mu kalula, mu kisi kyakama nu takili na mazi. 14 Nu keiya katukile ku bibenga bya ntabi zago; kagisizie biguma byago, aba munda mwago tamuli kibenga kya magala buno kibe musumbo wa kwangata.’
Bubuno buli idilo nu lyabe ku kulila.”