Muntu na muntu nawasungibwe ku bwagi wenyene
18
1 Iyuki lya Yehowa lyatendile kundi bunee: 2 “Bwisulilwa bwa musumo wono buli bukizi mu kisi kya Israeli? ‘Beisibo balide biguma bya ngigi tondo meinyo ma bana mabede bugugili.’ 3 Anga bunkulumbila, u bwatenda Yehowa, Mwiya Bwangato Bunsania, ntwise musumo wono lingo mu kisi kya Israeli. 4 Tulamo tunsania tuli twane, buli kalamo k'isibo u buli kalamo ka mwana, tuli twane. Muntu ukukita bwagi akue. 5 Tondo ndi muntu eli wisanana nu kukita bulili nu bwisanana, 6 aba ntalide mu biziki bya kukumbamina gantata ga miduko aba ntalambwide meiso mage ku nkisi za Israeli aba ntabigizie mukikulu wa munyage, aba ntakundile mukikulu mu nkungu za lusambo lwa mwezi, 7 aba ntakitide muntu bubi, tondo asubibizie mwima kwa nyene go, aba ntanyagile muntu bikulo byage ku magala tondo akasile beli na nzala idia nu kuvwalikya beli mundulu, 8 ntambizie bikulo buno amone mutali aba eibembukizie na bubi, atwide buli bulili lwabusio lwa bantu; 9 atabangile ku milembe zane nu kulanga makakizio mane kukita bulili, eli wisanana lebelebe alame, bubo u bukutenda Yehowa, Mwiya Bwangato Bunsania.
10 Abutile mwana uli mukali ukukubula mikila nu akitile kimozi kya bibino ku mubuto wage, 11 tondo ntakitile kimozi kya bibino wenyene tondo mwana alide ku biziki bya kukumbamina gantata miduko, nu kubigia mukikulu wa munyage; 12 abengile bazambi nu beiyanizi nu kubanyaga na magala. Aba ntasubizie mwima nu alolile ku nkisi nu kuzikumbamina; 13 Nu we ambizie ku kumona mutali nu kutola bya kwitila, ndi we alame? Ntalame! Akitile bibyo binsania bili bibi lebelebe akue nu kabamba ka lukuo lwage kabe kweli.
14 Nu lola, ndi abuta mwana nu amona ku bwagi bunsania bw'isi bwakitaga, nu we akue boba nu kutakita bubo, 15 aba ntalide ga biziki bya kukumbamina nkisi gantata miduko aba kukumbamina nkisi za numba za Israeli aba nu ntabigizie mukikulu wa munyage; 16 aba kukita muntu unsania bubi, ntakusigala na mwima, aba ntanyagile muntu bikulo byage na magala, tondo alisizie beli na nzala nu kuvwalikya beli mundulu. 17 Ntabengile bazambi aba ntakatile mutali kutinga, tondo akatile makakizio mane nu atabangile mu milembe zane, ntakue ku kabamba ka bwagi bw'isi, lebelebe alame. 18 Nu wozo isi, kubuno asungizie geteli kyombo, nu kunyaga bikulo bya mubuto wage, nu kukita buteli busoga mu bantu bage, lola, akue ku kabamba ka bwagi bwage.
19 Tondo muki mwatenda bunee: ‘Kubuni mwana ntakue ku lusungio lw'isi?’ Mwana wage akitile na bulili nu bwisanana nu anzile milembe zane, ntakue. 20 Wozo waga nti u wakue. Mwana nteke lusungio lwa bwagi bw'isi aba isi nteke lusungio lwa bwagi bwa mwana. Bwisanana bwa muntu wisanana bwabe kweli, nu bwagi bwa muntu ukwaga bwabe kweli wenyene. 21 Tondo ndi mwagi agaluka kutuka ku bwagi bwage bunsania bwakitaga, nu kulanga milembe zane insania, nu kukita bulili nu kwisanana, lebelebe alame, ntakue. 22 Misako zage za bwagi zaakitile tazakengelwe lingo. Ku kabamba ka kwisanana kwakitile, akalama.
23 Yehowa, Mwiya Bwangato Bunsania, akutenda bunee: ‘Ndi nkubogaboga na kukua kwa mwagi kutinga buno agaluke nu kutuka ku misako za bwagi nu kulama? 24 Tondo ndi wisanana agaluka mu kwisanana kwage nu kukita bwagi anga bunsania bukukita mwagi, ndi alame? Makitilo mage ma kwisanana maakitile tamakengelwe lingo. Ku kabamba ka kugaluka kwage nu bwagi bwage bwakitile akakua.’
25 Tondo muki mwatenda bunee: ‘Nzila za Yehowa tazili nsoga,’ ungwililazi kano kaluma, ee numba za Israeli, ndi nzila zane tazili nsoga? Ndi ta nzila zeinyu u ziteli nsoga? 26 Ndi wisanana agaluka mu kwisanana kwage, nu kukita bwagi nu kukua, nti akua ku kabamba ka misako za bwagi bwage. 27 Lingo nkungu zikugaluka mwagi ku bwagi bwage nu kukita bulili nu kwisanana, onie kalamo kage. 28 Kubuno eiyania nu kugaluka mu kwaga kwage kunsania, lebelebe alame ntakue. 29 Tondo numba za Israeli ndi nzila zane ta nsoga? Ndi ta nzila zeinyu u ziteli nsoga?
30 Yehowa, Mwiya Bwangato Bunsania, akutenda bunee: ‘Ee numba za Israeli namusungie, muntu na muntu ku kabamba ka misako zage. Igongazi, musige bwagi bweinyu bunsania buno bwagi tabumukinde. 31 Sigazi bwagi bweinyu bumwakitile nu mube na mitima mito nu muuza muto. Ku kabamba kakizi mukukua, ee numba za Israeli?’ 32 Yehowa, Mwiya Bwangato Bunsania, akutenda bunee: ‘Nsikubogaboga na lukuo lwa muntu umozi, ububo galukazi nu kulama.’”