Lusungio lwa Kalaga ku mukota wa Israeli
17
1 Iyuki lya Yehowa lyavule kundi nu lyatendile bunee: 2 “Uwe mwana wa muntu, isa tuzeni nu sambala misumo ku numba za Israeli; 3 tenda bunee: ‘Bubuno u bwatenda Yehowa, Mwiya Bwangato Bunsania, bunee: “Ndiu nne zili na byupi binene nu nsala ndazi za lukita na lukita lw'idangi, zabasile ku Lebanoni nu kukata ku ntonga za muti wa mwerezi. 4 Zasesile lutabi lukeke lwago nu zalwekile ku kisi kya bukunzia, zalubikile mu mwino wa bakunzia.
5 Zatolile mbuto za kisi nu kuziyika mu bisogo bisoga; zazibikile mu ntungo mwa mazi mengi, zazibikile anga muzigi ukwasa mu ntungo mwa luuzi. 6 Wasile nu wabede muzigi wagagana nu ntabi zago zalolile kweli, tondo mizi zage zasigede kunsi. Ububo muzigi wabede nu wasile ntabi nu ntonga zago. 7 Tondo kwabezaga engo ndiu nnene na byupi binene nu nsala ningi; nu mizi za muzigi zagalukile kwenda kuzo nu ntabi zago zagagenne kweli ga masina mago, buno zigunagye. 8 Wayikilwe mu bisogo bisoga bwigi na mazi mengi uvwame kulambya ntabi nu kukolama biguma, ube muzigi musoga.”
9 Nu tenda bunee: “Bubuno u bwatenda Yehowa, Mwiya Bwangato Bunsania, bunee: ‘Ndi tagunakula? Ndi ntunaguyula nu kusesa biguma byago nu nsamba zago nto, zome? Nu magala mago manene aba ma bantu beingi tamanawasia lingo. 10 Ububo ndi wayikwa, waase? Ndi tawome nunse mu nkungu za lumpumpu lwa kilimo? Nu wome mu kiziki kiwayikwa mukyo!’”’”
11 Iyuki lya Yehowa lyavule kundi lingo nu lyatendile bunee: 12 “Tenda kano kaluma ku babo baguni bunee: ‘Tamwizi bwisulilwa bwa musumo wono?’ Babule bunee: ‘Lola, mukota wa Babeli avule ku Yerusalema kutola mukota wago nu bakota bago bakeke nu kwiga nabo kwabo ku Babeli. 13 Atolile umozi ku ba kikanga kya mukota nu akitile idagano nage nu kilumbilo, nu kumwigia ku Babeli nu kwigia beiya magala mu kisi kyage. 14 Buno bukota bube gansi, tabwiyemanie, tondo bwemane ku kulanga idagano lyage.
15 Tondo wozo mwana wa mukota amugunine; asingile migenzi zage ku Misri buno bamukasie na farasi nu bantu beingi. Ndi mwiya kukita bitondo bibino one? 16 Anga bunkulumbila, nne Yehowa, Mwiya Bwangato Bunsania, bunee: “Lebelebe akakua mu Babeli, kisi kya mukota wamubikile ga kisumbi kyage, kubuno abengile kilumbilo kyage nu kwita idagano lyakitile nage. 17 Aba Farao ntakuvwa na mayombo manene nu bantu beingi kumukasia mu bita, nu beiti bakatimba mwino gantata biziki byasakama nu kwita mwino na ngabo, nu bantu beingi bakakua. 18 Kubuno abengile kilumbilo mu kwita idagano nu lola, alambizie kuboko kwage nu kukita bitondo bibino binsania, ntakona.”
19 Nu Yehowa, Mwiya Bwangato Bunsania, atenda bunee: “Anga bunkulumbila kilumbilo kyane kyabengile nu idagano lyane lyeitile, nakilusie kweli wenyene. 20 Nu nne namutegele bukila bwane nu we akatwe mu itega lyane, nu namulusie ku Babeli, nende nage myango gago ku kabamba ka kwaga kwage kwanagide. 21 Bakoloboyo bage bansania basoga bakue na mwene wa nganda, nu babo basigala mu mwino babalanganibwe mu ndenge insania inazi za kisi. Ububo mwamenye buno nne Yehowa natendile bitondo bibino.”
22 Yehowa, Mwiya Bwangato Bunsania, atenda bunee: “Nnenyene natikye lutabi lubisi lwa kuntata lwa muti wa mwerezi mulazi, nu naluyike gantata ga mwiduko mulazi nunse, 23 ku mwiduko mulazi wa Israeli, nu lwase ntabi nu kukolama biguma nu lwabe mwerezi musoga nunse. Tuzoni twa nkita insania twobake bizumba muzo nu tumunwe mu mpololo za ntabi zago. 24 Miti insania za lubanda zamenye buno nne Yehowa u ukusinda muti mulazi, nu ukwasia muti mukeke buno ube muti mulazi. Nkomia muti mubisi nu nkwasia muti wakama. Nne Yehowa u watendile bitondo bibino nu nabikite.”’”